نیشنل سائبر کرائم انویسٹی گیشن ایجنسی (این سی سی آئی اے) نے آن لائن استخارہ کرنے، اور تعویذ دھاگے دینے کے بہانے خواتین کو اپنے جال میں پھنسا کر بلیک میل اور ہراساں کرنے والے ایک ملزم کو گرفتار کر لیا ہے۔
این سی سی آئی اے کے ترجمان کے مطابق ملزم آن لائن استخارہ، مختلف تعویذ اور وظائف فراہم کرنے کے نام پر معصوم خواتین کو اپنے جال میں پھنساتا تھا ملزم پہلے دھوکے سے خواتین کا اعتماد حاصل کرتا تھا اور بعد میں بلیک ملیکنگ اور استحصال شروع کر دیتا تھا ملزم نے دھوکہ دہی کے ذریعے خواتین کی نازیبا تصاویر اور نجی ویڈیوز حاصل کیں اور بعد میں اس مواد کا استعمال کرتے ہوئے متاثرہ خواتین سے بھاری رقوم بٹورنا شروع کر دیں کارروائی کے دوران ملزم کا موبائل فون قبضے میں لے کر فرانزک معائنے کے لیے بھیج دیا گیا ہے تاکہ مزید شواہد اکٹھے کیے جا سکیں۔
ملزم کے خلاف پریوینشن آف الیکٹرانک کرائمز ایکٹ (پیکا) کے تحت مقدمہ درج کر لیا گیا ہے جبکہ تفتیش کاروں نے سائبر کرائم اور آن لائن بلیک میلنگ کی ان سرگرمیوں میں ملزم کی مدد کرنے والے دیگر ساتھیوں کی شناخت اور گرفتاری کے لیے بھی کوششیں شروع کر دی ہیں معاملے کی تفتیش کا عمل تیزی سے جاری ہے اور اس سلسلے میں مزید گرفتاریوں کو مسترد نہیں کیا جا سکتا۔