پاکستان مرکزی مسلم لیگ کی کراچی میں شہدا غزہ کانفرنس،عوام کا جم غفیر،فلسطینی پرچموں کی بہار،حماس رہنما نے خصوصی شرکت کی.
باغی ٹی وی کے مطابق پاکستان مرکزی مسلم لیگ کی شہدائے غزہ کانفرنس سے خطاب کرتے ہوئے قائدین نے کہا ہے کہ سیکیورٹی کونسل کا اجلاس بلاکر غزہ میں فوری جنگ بندی کروائی جائے۔ دنیا میں امن کے لیے اسرائیلی مظالم کا سلسلہ روکا جائے۔ مسلم ممالک کے حکمران مسئلہ فلسطین کو بنیاد بناکر متحد ہو جائیں۔ غزہ میں جنگ فلسطین کی جنگ نہیں پوری مسلم امہ کی جنگ ہے۔ پاکستان بطور ایٹمی طاقت مسلم ممالک کی قیادت کرے۔ وزیر اعظم اور آرمی چیف غزہ میں قتل عام رکوانے کے لیے کردار ادا کریں۔ عوام اسرائیلی مصنوعات کے بائیکاٹ کا سلسلہ جاری رکھیں۔ کراچی سے شروع ہونے والی احتجاجی تحریک کا دائرہ ملک بھر میں پھیلائیں گے۔
ان خیالات کا اظہار جنرل سیکرٹری پاکستان مرکزی مسلم لیگ سیف اللہ خالد، حماس رہنما ڈاکٹر ناجی ظہیر، صدر مرکزی مسلم لیگ سندھ فیصل ندیم، صدر مرکزی مسلم لیگ کراچی احمد ندیم اعوان، صدر مسلم میڈیکل مشن ڈاکٹر ناصر ہمدانی، رکن مرکزی رویت ہلال کمیٹی پاکستان مفتی یوسف کشمیری، ناظم اعلی اتحاد المدارس پاکستان یحییٰ مجید، صوبائی رہنما مرکزی مسلم لیگ سندھ حافظ محمد انور، صدر مسلم یوتھ لیگ سندھ بلال حیدر، رہنما جمعیت علمائے پاکستان قاضی احمد نورانی، صدر حیدر آباد ڈویژن عقیل احمد لغاری، نائب صدر کراچی انجینئر نعمان علی، مہدی اسحاق، شہباز عبدالجبار، صدر مسلم وومن لیگ کراچی نازیہ فیصل و دیگر نے کیا۔ شاہراہ قائدین پر کانفرنس میں ہزاروں مرد و خواتین نے شرکت کی۔ شرکا کا جوش و جذبہ قابل دید تھا۔ شرکا نے ہاتھوں میں فلسطین کے جھنڈے اٹھا رکھے تھے اور غزہ میں اسرائیلی مظالم کے خلاف بھرپور نعرے بازی کرتے رہے۔
جنرل سیکرٹری پاکستان مرکزی مسلم لیگ سیف اللہ خالد نے کہا کہ ہم کل بھی فلسطین کے لیے جمع ہوئے تھے اور آج بھی ساتھ کھڑے ہیں۔ مشکل وقت میں غمزدہ ہونے کی ضرورت نہیں۔ ہم استقامت کے ساتھ اہل غزہ کے ساتھ رہیں گے۔ اسرائیلی نے غزہ میں مظالم کی انتہا کر دی۔ حماس نے تاریخ ساز معرکہ سرانجام دیا۔ اسرائیل جو کچھ کر رہا ہے اپنی بد حواسی کی وجہ سے کر رہا ہے۔ اللہ نے غزہ میں اسرائیل کے مقابلے کے لیے عظیم قوت کھڑی کر دی ہے۔ میدان میں ڈٹے رہنے سے بہت جلد اللہ فتح دلائے گا۔ جو تحریک کراچی سے شروع ہوتی ہے وہ پورے ملک میں پھیل جاتی ہے۔ مسلمان قربانیوں سے مایوس نہیں ہوتے، ان کے حوصلے بلند ہوتے ہیں۔
حماس رہنما ڈاکٹر ناجی ظہیر نے کہا کہ اہل غزہ کے ساتھ یکجہتی پر اہل پاکستان کا مشکور ہوں۔ اہل غزہ نے اسرائیل کے خلاف مزاحمت میں کمزوری نہیں دکھائی۔ اسرائیل کے مقابلے میں ہمارے حوصلے آج بھی بلند ہیں۔ تمام تر مظالم کے باوجود ہم استقامت کے ساتھ کھڑے ہیں۔ غزہ میں جاری جنگ صرف فلسطینیوں کی جنگ نہیں یہ مسلم امہ کی جنگ ہے۔ ہم مسجد اقصٰی اور قبلہ اول کے تحفظ کی جنگ لڑ رہے ہیں۔ مسلمان مسلمان کا بھائی ہے، وہ اس پر ظلم کرتا ہے اور نہ ظلم کے لیے چھوڑتا ہے۔
صدر پاکستان مرکزی مسلم لیگ سندھ فیصل ندیم نے کہا کہ غزہ کے معاملے پر خطابات نہیں عملی اقدام کا وقت ہے۔ ہم شرمسار ہیں کہ غزہ کے مسلمانوں کی مدد نہیں کر پا رہے ہیں۔ حکمرانوں سے پوچھنا چاہتا ہوں کہ کب تک ہم خاموش تماشائی بنے رہیں گے۔ غزہ میں قتل عام کے لیے امریکا اسرائیل کے ساتھ کھڑا ہے۔ کراچی کی سڑکوں پر جمع ہونے والوں سے پوچھنا چاہتا ہوں کہ کیا امریکا ہمارے مسائل حل کرے گا۔ ہمارے مسائل مسلم حکمرانوں کے اتحاد سے حل ہوں گے۔ آرمی چیف سے کہتا ہوں کہ قرآن کے مطابق جو لوگ مدد کے لیے پکارتے ہیں ان کی مدد کرنا ہم پر فرض ہے۔ وزیر اعظم اسلام آباد میں مسلم حکمرانوں کو جمع کرکے غزہ کے لیے علمی کردار ادا کریں۔
صدر پاکستان مرکزی مسلم لیگ کراچی احمد ندیم اعوان نے کہا کہ اہل کراچی نے ہمیشہ ظلم کے خلاف آواز بلند کی۔ اسرائیل نے دنیا کے کسی قانون اور اصول کی پاسداری نہیں کی۔ ایک چھوٹی سی بستی غزہ کو ملبے کا ڈھیر بنا دیا گیا۔ اہل غزہ ڈیڑھ سال سے حوصلے کے ساتھ کھڑے ہیں۔ غزہ میں اٹھنے والے جنازے مسلم حکمرانوں کے ہیں جو اس ظلم پر بے بس نظر آتے ہیں۔ آج دنیا بھر میں غزہ کے لیے احتجاج ہو رہا ہے، لیکن حکمران خاموش ہیں۔ صدر مسلم میڈیکل مشن ڈاکٹر ناصر ہمدانی نے کہا کہ غزہ میں بنیادی ضرورتوں کی شدید قلت ہے۔ غزہ کی ناکہ بندی کرکے غذائی قلت پیدا کی گئی۔ مسلم میڈیکل مشن نے ہر موقع پر اہل غزہ کی خدمت کی۔
رکن مرکزی رویت ہلال کمیٹی پاکستان مفتی یوسف کشمیری نے کہا کہ جو مسلمان اہل غزہ کے ساتھ یکجہتی کر رہے ہیں وہ قابل تحسین ہیں۔ اسرائیل کے ساتھ دوستی کی بات کرنے والے بزدل ہیں۔ علماء نے مسلم ممالک کے سربراہان پر جہاد کی فرضیت کا فتویٰ دے دیا ہے۔ مسلم حکمران کمزوری کا مظاہرہ نہ کرے۔ ناظم اعلیٰ اتحاد المدارس پاکستان یحییٰ مجید نے کہا کہ اہل فلسطین کے ساتھ ہمارا تعلق ایک جسم کی مانند ہے۔ اہل غزہ نے قربانیاں پیش کیں لیکن وہ پیچھے نہیں ہٹے۔ استقامت کا مظاہرہ کرنے والے کامیاب ہوتے ہیں۔
صوبائی رہنما مرکزی مسلم لیگ سندھ حافظ محمد انور نے کہا کہ ہم اہل غزہ کو پیغام دے رہے ہیں کہ آپ اکیلے نہیں۔ ہم سب اہل غزہ کے ساتھ ہیں اور ساتھ رہیں گے۔ صدر مسلم یوتھ لیگ سندھ بلال حیدر نے کہ کہ آج یہاں موجود مرد و خواتین اسرائیل کو پیغام دینے کے لیے جمع ہیں۔ غزہ کے نوجوان آزادی کی تحریک میں تنہا نہیں ہم سب ان کے ساتھ ہیں۔ رہنما جمعیت علمائے پاکستان قاضی احمد نورانی نے کہا کہ غزہ کی جنگ نے دنیا کا چہرہ ننگا کر دیا ہے۔ ہم حکمرانوں سے کہیں گے کہ نرمی نہ دکھائیں۔ بائیکاٹ کا سلسلہ جاری رکھا جائے۔ صدر مرکزی مسلم لیگ حیدر آباد ڈویژن عقیل احمد لغاری نے کہا کہ امت مسلمہ میں قیادت کا بہت بڑا فقدان ہے۔ غزہ میں لہو بہہ رہا ہے اور 57 اسلامی ممالک کے سربراہان بے بس ہیں۔ اہل غزہ کے دکھ درد کو محسوس کیا جائے۔ صدر مسلم وومن لیگ کراچی نازیہ فیصل نے کہا کہ ہم اہل غزہ کے ساتھ ہیں۔ ہم اہل غزہ کے دکھ درد کو محسوس کرتے ہیں۔ ہم اسرائیلی مصنوعات کا بائیکاٹ جاری رکھیں گے۔
امریکی سپریم کورٹ نے تارکین وطن کو فوری ریلیف دے دیا
اسلام آباد یونائیٹڈ کے آسٹریلوی آل راؤنڈر پی ایس ایل 10 سے باہر
حکومت ملک سے پولیو کے مکمل خاتمے کے لیے پرعزم ہے،وزیراعظم
