کراچی :سندھ حکومت صوبے میں امن وامان قائم کرنے میں ناکام:ایک بارپھرکراچی پولیس سربراہ بدل دیا گیا ،اطلاعات ہیں کہ یہ فیصلہ صوبے میں امن و امان کی بگڑتی ہوئی صورت حال کے پیش نظرکیا گیا ہے
اس حوالے سے جاری نوٹیفکیشن کے مطابق کراچی پولیس کے چیف عمران یعقوب منہاس کو اب ایڈیشنل آئی جی سی ٹی ڈی لگادیا گیا ہے جب کہ غلام نبی میمن کو ایک بار پھر کراچی پولیس چیف تعینات کیا گیا ہے۔
نوٹیفکیشن کے مطابق جاویداوڈھو کو ایڈیشنل آئی جی اسپیشل برانچ تعینات کیا گیاہے۔
واضح رہے کہ اس سے قبل بھی غلام نبی میمن کراچی پولیس چیف کی ذمہ داریاں نبھاچکے ہیں اور ان کا گزشتہ سال مئی میں تبادلہ کرکے عمران یعقوب کو ان کی جگہ تعینات کیا گیا تھا۔
یاد رہے کہ اس وقت کے نوٹیفکیشن کے مطابق ایڈیشنل آئی جی پولیس غلام نبی میمن کا اسپیشل برانچ میں تبادلہ کیا گیا تھا ۔
جہاں تک عمران یعقوب کی پروفائل کا تعلق ہے تو عمران یعقوب منہاس نے ابتدائی اور اعلیٰ تعلیم کراچی سے حاصل کی اور انہوں نے 1991 میں 19ویں کامن کورس میں سول سروس جوائن کی۔
عمران یعقوب منہاس کا تعلق پولیس سروس آف پاکستان سے ہے جبکہ انہوں نے پولیس فورس میں ملازمت کا آغاز پنجاب سے کیا، پھر وہ کچھ سال سندھ اور پھر بلوچستان میں تعینات رہے۔
وہ ٹاؤن پولیس افسر کلفٹن، ڈی آئی جی ویسٹ کراچی، ڈی آئی جی ٹریفک پولیس، انسپکٹر جنرل جیل خانہ جات اور ایڈیشنل آئی جی اسپیشل برانچ سندھ پولیس تعینات رہ چکے ہیں۔عمران یعقوب منہاس کی شہرت ایک قابل اور اچھی شہرت کے حامل پولیس افسر کی ہے۔
