کراچی :بلاول بھٹو کو تنقید کا نشانہ بنانے پر عبدالقادر پٹیل نے شیخ رشید کو آڑے ہاتھوں لے لیا۔اطلاعات کے مطابق وفاقی وزیر صحت عبدالقادر پٹیل نے اپنے ایک بیان میں کہا کہ شیخ رشید بلاول بھٹو زرداری کیخلاف بیان بازی کرکے میڈیا میں زندہ رہنا چاہتے ہیں، وزیرخارجہ بلاول بھٹو کا عالمی وقار دیکھ کر شیخ رشید کا جلنا بنتا ہے۔
پی پی رہنما عبدالقادر پٹیل کا کہنا تھا کہ وزیر خارجہ بلاول بھٹو زرداری نے مختصر مدت میں دنیا میں پاکستان کا اعتماد بحال کیا ہے۔
عبدالقادر پٹیل نے کہا وزیر خارجہ کیخلاف شیخ رشید کی بیان بازی کا مقصد میڈیا میں زندہ رہنے کے سوا کچھ نہیں، شکر ہے قومی اسمبلی گٹر زبان والے سے پاک ہوگئی ہے، شیخ رشید کے فریڈم ہاوس میں کیا کیا مشقیں ہوتی ہیں ہمیں سب معلوم ہے۔
واضح رہے کہ شیخ رشید نے اپنے بیان میں کہا تھا کہ بلاول بھٹو 2 ہفتوں سے امریکا میں مزے کررہا ہے، اُسے سندھ کے سیلاب زدگان کی کوئی فکر نہیں۔
دوسری طرف وزیر محنت و افرادی قوت سندھ اور رہنما پیپلزپارٹی سعید غنی نے اپنے ایک بیان میں کہا کہ ہم تو پہلے دن سے کہہ رہے تھے کہ عمران نیازی ملک کیلئے بدنامی کا باعث ہے۔انہوں نے کہا کہ عمران نیازی ملک کی سلامتی کو بھی کھیل سمجھ رہے تھے ، قوم نیازی صاحب سے پوچھ رہی ہے گھناؤنے کھیل میں میچ کس کے ساتھ فکس کیا تھا۔
سعید غنی کا کہنا تھا کہ عمران نیازی نے سفارتی سائفر کی غلط تشریح کرکے ملک کے خارجہ امور کو تماشہ بنایا۔
ان کا یہ بھی کہنا تھا کہ وزیر خارجہ بلاول بھٹو زرداری نے بڑی محنت کرکے ملک کی دوبارہ ساکھ قائم کی ہے جبکہ عمران کی نالائقی اور کرتوت کی وجہ سے کوئی حکمران ان سے ملنا گوارا نہیں کرتا تھا۔
رہنما پیپلزپارٹی سعید غنی کا مزید کہنا تھا کہ اسرائیلیوں اور بھارتیوں نے عمران خان کی فنڈنگ خاص ایجنڈے کے تحت کی تھی جبکہ عمران نیازی نے نوجوان نسل کو گمراہ کرکے مہذب معاشرے کو بھی تباہ کیا ہے۔
