راولپنڈی: انجمن تاجران نے شنگھائی تعاون تنظیم (ایس سی او) کانفرنس کے لیے سیکیورٹی اقدامات کے حوالے سے پولیس کے ساتھ مکمل تعاون کی یقین دہانی کراتےہوئے کہا ہے کہ پاکستان کی ترقی اور کامیابی کے لیے حکومت اور انتظامیہ کے ساتھ کھڑے ہیں۔
باغی ٹی وی: انجمن تاجران کے وفد نے سی پی او راولپنڈی خالد ہمدانی سے ملاقات کی جہاں ایس ایس پی آپریشنز، ایس پی راول اور دیگر سینئر افسران بھی شریک تھے جبکہ تاجروں کی جانب سے صدر انجمن تاجران شاہد غفور پراچہ، جنرل سیکرٹری راجا توحید اور دیگر عہدیداران نے شرکت کی، ملاقات شہر کے معروف تجارتی مرکز کمرشل مارکیٹ اور ملحقہ علاقوں کی حدود پر مشتمل تھانہ نیوٹاؤن میں ہوئی۔
سی پی او خالد ہمدانی نے انجمن تاجران سے ایس سی او کے حوالے سے کیے جا رہے سیکیورٹی انتظامات پر تفصیلی بات چیت کی، جس پر انجمن تاجران کی جانب سے کانفرنس کے ضمن میں سیکیورٹی انتظامات کے سلسلے میں پولیس کو مکمل تعاون کی یقین دہانی کرائی۔
پاکستان کا پاور سیکٹر اقتصادی ترقی میں رکاوٹ بنا ،عالمی بینک
صدر انجمن تاجران شاہد غفور پراچہ کا کہنا تھا کہ پاکستان میں آنے والے غیر ملکی مہمانوں کو خوش آمدید کہتے ہیں، سیکیورٹی انتظامات کے لیے شہر بھر میں دوکانیں یا کاروبار بند کرنے کے لیے تیار ہیں تاجران نے متفقہ طور پر کہا کہ پاکستان کے لیے تین دن دکانیں اور کاروبار بند رکھیں گے، پاکستان کی ترقی اور کامیابی کے لیے حکومت اور انتظامیہ کے ساتھ کھڑے ہیں۔
سی پی او سید خالد ہمدانی نے بھرپور تعاون پر صدر انجمن تاجران اور دیگر عہدیداران کا شکریہ ادا کیا اور کہا کہ وطن عزیز کی سالمیت ترقی اور خوش حالی اہم ترین ہے، ایس سی او کے لیے فول پروف سیکیورٹی انتظامات کو یقینی بنایا جائے گا۔
