امریکا کی 30 ریاستوں نے میٹا کے خلاف بچوں اور نوجوانوں پر منفی اثرات سے متعلق مقدمے میں انسٹاگرام اور فیس بک کے بنیادی فیچرز تبدیل کرنے کا مطالبہ کر دیا۔
کیلیفورنیا اور نیویارک سمیت 30 ریاستوں نے 2023 میں دائر مقدمے میں الزام عائد کیا ہے کہ میٹا نے بچوں کی پرائیویسی سے متعلق وفاقی اور ریاستی قوانین کی متعدد خلاف ورزیاں کیں ان ریاستوں نے میٹا سے ایک ٹریلین ڈالر سے زائد ہرجانے کے ساتھ ساتھ انسٹاگرام اور فیس بک کے نظام میں وسیع پیما نے پر تبدیلیوں کا مطالبہ کیا ہے۔
بی بی سی کے مطابق مقدمے کی کارروائی آج سے شروع ہو رہی ہے، جسے میٹا کے خلاف بچوں سے متعلق اب تک کے اہم ترین عدالتی چیلنجز میں شمار کیا جا رہا ہے،ریاستوں کے مطالبات میں نوجوان صارفین کے لیے ’لائیکس‘ کی تعداد ختم کرنا، لامحدود اسکرولنگ بند کرنا، والدین کی تصدیق کا نظام متعار ف کرانا اور ایسے سفارشاتی الگورتھمز میں تبدیلی شامل ہے جو صارفین کو زیادہ دیر فیس بک اور انسٹاگرام دیکھنے پر مجبور کرتے ہیں۔
مقدمے میں ریاستوں نے میٹا سے یہ بھی مطالبہ کیا ہے کہ نوجوانوں کی تصاویر میں ظاہری شکل تبدیل کرنے والے متعدد فلٹرز ختم کیے جائیں، ویڈیوز کا خودبخود چلنا بند کیا جائے، ایک سے زیادہ اکاؤنٹس بنانے پر پابندی لگائی جائے اور عارضی پوسٹس جیسا کہ انسٹاگرام اسٹوریز کا فیچر ختم کیا جائے۔
ریاستی حکام کا مؤقف ہے کہ یہ تمام فیچرز صارفین، خصوصاً بچوں اور نوجوانوں، کو زیادہ سے زیادہ وقت سوشل میڈیا پر گزارنے کے لیے استعمال کیے جاتے ہیں،بار بار آنے والی نوٹیفیکیشنز اور دیگر طریقوں کے ذریعے نوجوانوں کے لیے سوشل میڈیا کا استعمال کم کرنا بھی مشکل بنایا جاتا ہے،ریاستوں کا الزام ہے کہ میٹا نے کم عمر صارفین کو جان بوجھ کر اپنے پلیٹ فارمز کا عادی بنانے کی کوشش کی تاکہ صارفین کی تعداد اور کاروباری حجم میں اضافہ ہو میٹا کی موجودہ مارکیٹ ویلیو تقریباً 1.5 ٹریلین ڈالر بتائی جاتی ہے۔
جبکہ میٹا نے ان الزامات کی مسلسل تردید کی ہے کمپنی کی ترجمان کا کہنا ہے کہ میٹا الزامات سے سخت اختلاف کرتا ہے اور اسے یقین ہے کہ کیس میں پیش کیے جانے والے شواہد نوجوانوں کی مدد اور تحفظ کے لیے کمپنی کے طویل مدتی عزم کو ثابت کریں گے۔
واضح رہے کہ نیو میکسیکو میں ایک جج نے حال ہی میں میٹا پر مجموعی طور پر 942 ملین ڈالر جرمانہ عائد کیا اور اسے نوجوان صارفین کے لیے پلیٹ فارمز میں متعدد تبدیلیاں کرنے کا حکم دیا،ان تبدیلیوں میں 18 سال سے کم عمر صارفین کے لیے فیس بک اور انسٹاگرام پر لائیکس کی تعداد ختم کرنا، نوعمروں کے درمیان عریاں مواد بھیجنے یا وصول کرنے پر پابندی اور مخصوص اوقات کے علاوہ ایپس کی پش نوٹیفکیشن محدود کرنا شامل ہے۔ میٹا نے اس فیصلے کے خلاف اپیل کرنے کا اعلان کیا ہے۔
