نجی بس سروس فیصل موورز کی جانب سے مہنگے ٹکٹوں کے باوجود سہولیات کی عدم فراہمی پر مسافروں میں شدید غم و غصہ پایا جا رہا ہے۔ اس حوالے سے خاتون صحافی سعدیہ خالد کی ایک ویڈیو سامنے آئی ہے جس میں انہوں نے دورانِ سفر بس سروس کے ناقص انتظامات کو بے نقاب کیا ہے
ویڈیو بیان میں خاتون صحافی سعدیہ خالد کا کہنا تھا کہ وہ لاہور سے اسلام آباد سفر کر رہی تھیں اور انہوں نے مہنگی ٹکٹ اس امید پر خریدی کہ انہیں معیاری سہولیات فراہم کی جائیں گی، تاہم عملی طور پر صورتحال اس کے برعکس نکلی۔ ان کے مطابق بس میں نہ تو وعدے کے مطابق فری وائی فائی دستیاب تھا اور نہ ہی دیگر بنیادی سہولیات فراہم کی گئیں۔انہوں نے مزید کہا کہ جب عملے سے اس حوالے سے شکایت کی گئی تو ان کا رویہ انتہائی غیر سنجیدہ اور غیر ذمہ دارانہ تھا۔ بس اٹینڈنٹ نے شکایت سننے کے بجائے انہیں ٹکٹ پر درج ہیلپ لائن نمبر پر رابطہ کرنے کا کہا، مگر مذکورہ نمبر بھی بند پایا گیا۔سعدیہ خالد کا کہنا تھا کہ کمپنی مسافروں سے ڈبل قیمت وصول کرتی ہے اور سہولیات کے نام پر صرف دعوے کیے جاتے ہیں بس میں لگی اسکرین پر صرف ڈرامے اور فلمیں دیکھنے کی سہولت موجود تھی جبکہ باقی تمام وعدے محض اشتہاری دعوے ثابت ہوئے
سعدیہ خالد نے حکومت پنجاب اور وزیر اعلیٰ مریم نواز سے مطالبہ کیا کہ وہ اس معاملے کا نوٹس لیں اور ٹرانسپورٹ سیکٹر میں مبینہ مافیا کے خلاف کارروائی کی جائے تاکہ مسافروں کو ان کے حقوق کے مطابق سہولیات فراہم کی جا سکیں۔
دوسری جانب سوشل میڈیا صارفین نے بھی ویڈیو پر شدید ردعمل دیتے ہوئے متعلقہ اداروں سے فوری ایکشن کا مطالبہ کیا ہے۔ عوام کا کہنا ہے کہ اگر نجی ٹرانسپورٹ کمپنیاں بھاری کرایہ وصول کرتی ہیں تو انہیں معیاری سروس فراہم کرنا بھی یقینی بنانا چاہیے۔سعدیہ خالد کی ویڈیو پر کمنٹ میں عباس ملک کا کہنا تھا کہ ایک اور چیز جو آپ مس کر گئیں ان کی گاڑیوں کا تاخیر سے ٹرمینل سے نکلنا معمول کی بات ہے ۔جب ٹرمینل پر اس حوالے سے پوچھا جائے کہ گاڑی کیوں لیٹ ہے تو ان کاعملہ مسافروں کو ایک دوسرے کی طرف بھیجتا ہے کہ فلاں کے پاس جائیں۔وزیراعلی پنجاب مریم نواز ،وزیر ٹرانسپورٹ پنجاب کو نوٹس لینا چاہیے
