کراچی میں بریانی سینٹر سے بھتہ مانگنے والے ملزم کو پولیس نے گرفتار کرلیا۔
باغی ٹی وی کی رپورٹ کے مطابق ایس ایس پی اسپیشل انویسٹی گیشن یونٹ شعیب میمن نے اس حوالے سے پریس کانفرنس میں بتایا کہ کراچی کے مختلف علاقوں میں دکانداروں، بالخصوص مشہور بریانی شاپس، کو بھتہ وصولی کے لیے ملائیشیا سے دھمکیاں موصول ہو رہی تھیں جن کے خلاف مختلف تھانوں میں درخواستیں بھی دی جا رہی تھیں اور مقدمات بھی ہو رہے تھے۔ ایس آئی یو نے ٹیکنیکل بنیادوں پر کارروائی کرتے ہوئے فراز نامی ملزم کو اس وقت رنگے ہاتھوں گرفتار کیا جب وہ ایک دکاندار سے بھتے کے 1 لاکھ روپے وصول کر چکا تھا۔ اس ملزم نے دوران تفتیش حیرت انگیز انکشافات کیے ہیں۔ ملزم فراز کے مطابق وہ ملائیشیا میں مقیم بھتہ گینگ کی خاتون لیڈر صبوری اور اس کے شوہر حماد کے لیے کام کرتا ہے۔ رشتے میں بھتہ گینگ کی خاتون لیڈر صبوری گرفتار ملزم کی بہن ہے۔ ملزمان کا طریقہ واردات یہ ہے کہ کراچی میں موجود ملزمان پہلے ان دکانوں، بریانی شاپس کی ریکی کرتے ہیں جن کا کام زیادہ چلتا ہے۔ اس کی باہر اور اندر سے ویڈیو بنا لی جاتی ہے اور ملائیشیا میں صبوری اور حماد کو بھیجی جاتی ہے۔ بھتہ خور گروہ کے سرغنہ مذکورہ دکاندار کو اس کی دکان کی ویڈیو بھیجتے ہیں اور بتاتے ہیں کہ بھتہ دو ورنہ تمہاری جان کو نقصان ہو سکتا ہے۔ ملزمان 20 لاکھ سے لے کر پارٹی کی ساکھ کے حساب سے بھتہ طلب کرتے ہیں۔ بھتے کی رقم پنجاب میں موجود ساتھی کے اکاؤنٹ میں ٹرانسفر کی جاتی ہے جو اس رقم کو ملائیشیا میں پہنچانے کا کام کرتا ہے۔ ملزمان شاہ فیصل، دہلی کالونی، لیاقت آباد، جوہرآباد اور گلبرگ سمیت مختلف علاقوں میں بھتہ خوری کر چکے ہیں۔ ملائیشیا میں موجود صبوری کے ساتھی پہلے بھی گلبرگ اور لیاقت آباد میں بھتہ وصولی کے کیس میں ایس آئی یو کے ہاتھوں ہی گرفتار ہو چکے ہیں۔ ان ملزمان کو جیسے ہی پتہ چلا کہ اسپیشلائزڈ یونٹ نے ان کا اہم ساتھی گرفتار کیا ہے تو ان کی جانب سے فوری طور پر جن سے بھی بھتہ طلبی کی گئی تھی ان کو "سوری” کے میسج بھی کیے گئے کہ ہم سے غلطی ہو گئی، ہمیں معاف کر دیں۔ ایسے عناصر شہریوں کے ڈر سے کھیلتے ہیں۔ شہر میں بھتہ خوری کے واقعات نہ ہونے کے برابر ہیں۔ کیس صرف وہی حل نہیں ہوتے جو رپورٹ نہیں کروائے جاتے۔ شہریوں سے بھی درخواست ہے کہ ایسے عناصر کے خلاف فوری رپورٹ کروائیں۔ ملزم کے ملائیشیا میں مقیم بہن، بہنوئی بھتے کے لیے کال کرتے تھے۔ایس ایس پی نے کہا ہے کہ کراچی سے ملزم کو گرفتار کیا گیا جبکہ ملائیشیا سے دیگر ملزمان کی گرفتاری کے لیے کارروائی جاری ہے۔شعیب میمن نے بتایا کہ بھتہ وصولی کے لیے بینک اکاؤنٹ لاہور سے استعمال ہو رہے تھے۔
سندھ ہائیکورٹ کا میئر کراچی کے براہ راست انتخاب سے متعلق درخواست پر تحریری حکم جاری
