پاکستان تحریک انصاف (پی ٹی آئی) کے بانی چیئرمین عمران خان اور ان کی اہلیہ بشریٰ بی بی کے خلاف توشہ خانہ 2 کیس میں استغاثہ کے ایک اور گواہ کی جرح مکمل کر لی گئی-
اڈیالہ جیل رالپنڈی میں اسپیشل جج سینٹرل شاہ رخ ارجمند نے بانی چیئرمین پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ 2 کیس کی سماعت کی،آج سماعت کے دوران عمران خان اور بشریٰ بی بی کو جیل سے کمرہ عدالت میں پیش کیا گیا جبکہ ملزمان کی جانب سے وکیل صفائی قوسین فیصل مفتی عدالت پیش ہوئے۔
اس کے علاوہ استغاثہ کی جانب سے اسپیشل پبلک پراسیکیوٹرز ذوالفقار عباس نقوی اور عمیر مجید ملک عدالت میں پیش ہوئے سماعت کے دوران استغاثہ کے مزید ایک گواہ شفقت محمود پر جرح مکمل کر لی گئی جبکہ دورانِ سماعت استغاثہ کے گواہ محسن حسن پر بانی پی ٹی آئی کے وکیل نے جزوی جرح بھی کی۔
کیس میں مجموعی طور پر 9 گواہوں پر جرح مکمل کر لی جبکہ 10 ویں گواہ پر جزوی جرح کی گئی، 26 جولائی کو عمران خان کے وکیل گواہ محسن حسن پر جرح مکمل کریں گے،عدالت نے توشہ خانہ ٹو کیس کی سماعت 26 جولائی تک ملتوی کر دی، اس روز بانیٔ پی ٹی آئی کے وکیل گواہ محسن حسن پر جرح مکمل کریں گے۔
توہینِ مذہب کے الزامات پر کمیشن کی تشکیل پر عملدرآمد روک دیا گیا
دوسری جانب عمران خان کی بہن علیمہ خان نے اڈیالہ جیل کے باہر میڈیا سے گفتگو کرتے ہوئے کہا کہ آج توشہ خانہ ٹو کیس کی سماعت اڈیالہ جیل میں تھی، ہمیں گزشتہ رات 12 بجے سماعت کی اطلاع دی گئی، آج صرف 2 وکلا کو اندر جانے کی اجازت دی گئی، فیملی، وکلا اور میڈیا کو آج اندر داخل نہیں ہونے دیا گیا، ہم ساڑھے 4 گھنٹے تک اڈیالہ جیل کے دروازے پر انتظار کرتے رہے،عمران خان نے علی امین گنڈا پور، بیرسٹر گوہر خان اور سلمان اکرم راجہ کو ہدایت کی ہے کہ بھرپور تحریک چلائیں، انہوں نے کہا ہے سلیمان اور قاسم ان کی اولادیں ہیں وہ اپنے باپ کے لیے اگر آواز اٹھارہے ہیں یہ ان کا حق ہے۔
پی ٹی آئی رہنماؤں کے خلاف کارروائیاں ہمیں دبانے کی کوشش ہے،بیرسٹر گوہر
