3 روزہ تعطل کے بعد بلوچستان سے ٹرین سروس بحال کر دی گئی-
ریلوے حکام کے مطابق جعفر ایکسپریس ہفتے کے روز کوئٹہ سے پشاور کے لیے روانہ ہو گئی، جس کے ساتھ ہی صوبے اور ملک کے دیگر حصوں کے درمیان ریلوے رابطہ دوبارہ بحال ہو گیاپاکستان ریلوے نے بلوچستان سے ٹرینوں کی آمد و رفت دوبارہ بحال کرتے ہوئے ہفتے کے روز جعفر ایکسپریس کو کوئٹہ سے پشاور کے لیے روانہ کر دیا۔
ریلوے حکام کے مطابق صوبے سے تمام ٹرین آپریشن معمول کے مطابق بحال کر دیے گئے ہیں جعفر ایکسپریس اپنے مقررہ وقت پر کوئٹہ سے روانہ ہوئی، جبکہ واپسی کی سروس بھی شیڈول کے مطابق پشاور سے کوئٹہ کے لیے روانہ ہوگی اس اقدام سے بلوچستان کا ملک کے دیگر علاقوں کے ساتھ ریلوے رابطہ دوبارہ بحال ہو گیا ہے۔
واضح رہے کہ کوئٹہ اور پشاور کے درمیان چلنے والی واحد مسافر ٹرین جعفر ایکسپریس گزشتہ اتوار کو ایک خودکش حملے کے بعد معطل کر دی گئی تھی، یہ حملہ چمن ریلوے کراسنگ کے قریب ایک شٹل ٹرین کو نشانہ بنانے کے لیے گاڑی میں نصب دھماکہ خیز مواد کے ذریعے کیا گیا تھا حملے کے وقت جعفر ایکسپریس روانگی کے لیے تیار تھی، تاہم سیکیورٹی صورتحال کے پیش نظر فوری طور پر اسے روک دیا گیا اور بعد ازاں ٹرین منسوخ کر دی گئی مسافروں کو ٹکٹوں کی رقم واپس حاصل کرنے کی ہدایت کی گئی تھی، 2 روز بعد ٹرین سروس بحال کر دی گئی تھی، تاہم بدھ کے روز اسے ایک مرتبہ پھر معطل کر دیا گیا، ریلوے حکام نے کوئٹہ اور پشاور دونوں جانب سے جعفر ایکسپریس کی معطلی کی وجوہات کے بارے میں کوئی باضابطہ وضاحت نہیں کی تھی۔