جنس تبدیلی

سابق بھارتی کرکٹر سنجے بانگر کے بیٹے نے جنس کی تبدیلی کرالی،لڑکا سے لڑکی بن گیا

سابق بھارتی آل راؤنڈر سنجے بانگر کے 23 سالہ بیٹے، جو پہلے آریان کے نام سے جانے جاتے تھے، نے اپنی جنس تبدیل کرالی ہے اور اب انہوں نے اپنی نئی شناخت "عنایہ” اختیار کرلی ہے۔ بھارت کے مشہور کرکٹر کے بیٹے کی جنس کی تبدیلی کا یہ سفر سوشل میڈیا پر شیئر کرنے کے بعد بہت زیادہ توجہ کا مرکز بن گیا ہے۔بھارتی میڈیا رپورٹس کے مطابق، آریان نے 2023 میں ہارمونل ریپلیسمنٹ تھراپی شروع کی تھی اور اس کے بعد انہوں نے اپنی جنس تبدیل کر کے ایک ٹرانس جینڈر لڑکی کے طور پر اپنی نئی زندگی کا آغاز کیا۔ سوشل میڈیا پر اپنے تجربات اور اس جذباتی سفر کو شیئر کرنے کے بعد وہ ٹرینڈ کرنے لگے ہیں اور ان کی کہانی نے لوگوں کو متاثر کیا ہے۔

عنایہ اس وقت برطانیہ میں کرکٹ کھیل رہی ہیں اور انہوں نے اپنے اس پیچیدہ، مگر ہمت افزا سفر کی تفصیلات سوشل میڈیا پر شیئر کی ہیں تاکہ دوسروں کو بھی اپنی حقیقت کا سامنا کرنے میں حوصلہ مل سکے۔عنایہ نے اپنے انسٹاگرام پر متعدد پوسٹس اور اسٹوریز شیئر کی ہیں جن میں انہوں نے ہارمون ریپلیسمنٹ تھراپی ے اثرات پر تفصیل سے بات کی۔ وہ گزشتہ 11 ماہ سے اس علاج کے زیر اثر ہیں۔

ہارمون ریپلیسمنٹ تھراپی وہ علاج ہے جس میں قدرتی ہارمونز کی کمی کو پورا کرنے کے لئے مصنوعی ہارمونز دیے جاتے ہیں۔ عنایہ نے اپنی حالیہ انسٹاگرام ویڈیو میں کہا کہ یہ تھراپی ان کی جسمانی طاقت کم کر رہی ہے، لیکن وہ اس تبدیلی کو خوشی کے ساتھ قبول کر رہی ہیں۔عنایہ نے کہا کہ "طاقت کھو رہی ہوں، مگر خوشی حاصل کر رہی ہوں۔ جسم بدل رہا ہے، ڈسفوریا کم ہو رہا ہے ابھی بھی طویل سفر باقی ہے، لیکن ہر قدم مجھے زیادہ میں محسوس ہوتا ہے۔”

عنایہ بانگر جو اب مانچسٹر میں مقیم ہیں، نے کرکٹر بننے کے اپنے خواب کو چھوڑنے کا دکھ بھی شیئر کیا اور اپنے والد کے نقش قدم پر چلنے کی آرزو کا ذکر کیا۔اور کہا کہ "بچپن سے ہی کرکٹ میری زندگی کا حصہ تھی۔ میں اپنے والد کو کھیلتے اور کوچنگ کرتے ہوئے دیکھتی تھی اور میرا بھی یہی خواب تھا کہ میں ان کی طرح ملک کی نمائندگی کروں گی۔ کرکٹ میرا جذبہ، میری محنت اور میرا مستقبل بن چکا تھا۔ میں نے اپنی ساری زندگی اس کھیل میں مہارت حاصل کرنے میں گزار دی، اس امید پر کہ ایک دن مجھے بھی اپنے ملک کی نمائندگی کا موقع ملے گا۔”

عنایہ اس وقت ایک کاؤنٹی کرکٹ کلب کے لئے کھیل رہی ہیں۔ اگرچہ کلب کے نام کی ابھی تک تصدیق نہیں ہو سکی، لیکن فری پریس جرنل نے رپورٹ کیا ہے کہ عنایہ نے حال ہی میں ایک مقامی میچ میں 145 رنز بنائے ہیں،

عنایہ کی پوسٹ اس وقت سامنے آئی ہے جب انگلینڈ اور ویلز کرکٹ بورڈ نے 2025 سے اعلیٰ سطح پر خواتین کی کرکٹ میں حصہ لینے والی ٹرانسجینڈر خواتین کے لئے ایک نیا اصول متعارف کرایا ہے۔ اس نئے ضابطے کے تحت وہ ٹرانسجینڈر خواتین جو مردانہ بلوغت کا تجربہ کر چکی ہیں، انہیں خواتین کی اعلیٰ سطح کی کرکٹ میں شرکت کی اجازت نہیں ہوگی۔یہ ضابطہ خواتین کی کرکٹ کے دو اعلیٰ درجوں میں لاگو ہوگا، جن میں اہم گھریلو لیگز اور "دی ہنڈرڈ” کے خواتین کے مقابلے شامل ہیں۔

یہ خبر نہ صرف ایک اہم شخصی تبدیلی کی نشاندہی کرتی ہے بلکہ اس بات کی بھی عکاسی کرتی ہے کہ معاشرتی تبدیلیوں کے ساتھ ساتھ کھیل کی دنیا میں بھی بہت سی نئی حقیقتوں کا سامنا کیا جا رہا ہے۔ جنس کی تبدیلی ایک پیچیدہ اور حساس معاملہ ہے، اور سنجے بانگر کے بیٹے کی کہانی ہمیں اس بات کا احساس دلاتی ہے کہ خود کی شناخت کا سفر کبھی بھی آسان نہیں ہوتا، لیکن اس پر قائم رہنا اور اس سفر کو دوسروں کے ساتھ شیئر کرنا کسی حد تک انقلابی عمل ہو سکتا ہے۔