الیکشن کمیشن آف پاکستان کے قومی اسمبلی کے دو اور پنجاب اسمبلی کے ایک حلقے میں ضمنی انتخابات کے شیڈول کا اعلان کر دیا۔
جاری کردہ اعلامیے کے مطابق قومی اسمبلی کے حلقہ این اے 66 وزیرآباد، این اے 129 لاہور اور پنجاب اسمبلی کے حلقہ پی پی 87 میانوالی میں ضمنی انتخاب 18 ستمبر 2025 کو منعقد ہوں گے۔الیکشن کمیشن کے مطابق این اے 66 وزیرآباد کی نشست محمد احمد چٹھہ جبکہ پی پی 87 میانوالی کی نشست ایم پی اے احمد خان بھچر کی نااہلی کے باعث خالی ہوئی۔ دونوں رہنما 9 مئی کے مقدمات میں سزا یافتہ ہونے کے بعد نااہل قرار پائے۔ اسی مقدمے میں پی ٹی آئی کے سینیٹر اعجاز چوہدری بھی نااہل ہو چکے ہیں۔
دوسری جانب این اے 129 لاہور کی نشست میاں اظہر کے انتقال کے باعث خالی ہوئی ہے۔الیکشن کمیشن کے شیڈول کے مطابق کاغذات نامزدگی 4 سے 6 اگست تک جمع کروائے جا سکیں گے۔کاغذات کی جانچ پڑتال 11 اگست تک مکمل کی جائے گی۔اپیلوں پر ٹریبونل فیصلے 22 اگست تک دیں گے۔امیدوار 25 اگست تک کاغذات واپس لے سکیں گے۔انتخابی نشان 26 اگست کو الاٹ کیے جائیں گے۔
الیکشن کمیشن نے تمام امیدواروں، سیاسی جماعتوں اور ووٹرز سے شفاف اور پرامن انتخابی عمل کو یقینی بنانے کی اپیل کی ہے۔
بلیک مارکیٹ کے خلاف کارروائی سے روپیہ مستحکم، غیر رسمی ڈالر تجارت محدود