وزیراعظم شہباز شریف نے مملکتِ سعودی عرب کے سفیر نواف بن سعید المالکی سے ٹیلیفونک گفتگو کی، جس میں قطر میں امریکی فوجی اڈے پر ایران کے میزائل حملے سے متعلق تشویشناک صورتحال پر تبادلہ خیال کیا گیا۔
گفتگو کے دوران وزیراعظم نے خطے میں بڑھتی ہوئی کشیدگی پر گہری تشویش کا اظہار کیا اور زور دیا کہ فوری طور پر کشیدگی میں کمی لانے اور امن و استحکام کی بحالی کے لیے تمام ممکنہ کوششیں کی جانی چاہئیں۔وزیراعظم نے اس حوالے سے یقین دہانی کرائی کہ پاکستان سعودی عرب کے ساتھ مل کر مشرق وسطیٰ میں قیام امن کے لیے اپنی کوششیں جاری رکھے گا۔
سعودی سفیر نواف المالکی نے وزیراعظم کا شکریہ ادا کرتے ہوئے کہا کہ اس اہم اور نازک موقع پر پاکستان کی فوری توجہ اور رابطہ قابلِ قدر ہے۔ انہوں نے اس بات سے اتفاق کیا کہ سعودی عرب اور پاکستان کو خطے میں جاری تنازع کے پُرامن حل کے لیے قریبی تعاون اور ہم آہنگی کے ساتھ کام جاری رکھنا چاہیے۔
