کوئٹہ :وزیراعلیٰ بلوچستان میر عبدالقدوس بزنجوکی صحبت پور میں ہونے والے بم دھماکے کی مذمت ،اطلاعات کے مطابق وزیراعلیٰ بلوچستان میر عبدالقدوس بزنجو نے صحبت پور میں ہونے والے بم دھماکے کی مذمت کی ہے۔
اپنے ایک بیان میں وزیراعلیٰ بلوچستان میر عبدالقدوس بزنجو نے صحبت پور میں ہونے والے بم دھماکے کی مذمت کرتے ہوئے کہا کہ دہشت گردی کی ایسی بزدلانہ کارروائیوں سے ہمارے حوصلے پست نہیں ہو سکتے۔
عبدالقدوس بزنجو نے کہا کہ تخریب کار عناصر صوبے کا امن خراب کرنا چاہتے ہیں،عوام کے تعاون سے صوبے میں دیرپا امن قائم کریں گے۔
وزیراعلیٰ بلوچستان میر عبدالقدوس بزنجو نے علاقے کی سکیورٹی مزید مؤثر بنانے کی ہدایت کرتے ہوئے کہا کہ تمام زخمیوں کو علاج معالجے کی بہتر سہولیات فراہم کی جائے۔
اس سے قبل ڈیرہ اللہ یار کے صحبت پور چوک پر ۔نامعلوم مسلح موٹر سائیکل سواروں کی جانب سے چوک پر کھڑے پولیس اہلکاروں پر دستی بم حملہ کیا گیا جس کے باعث 2 پولیس اہلکاروں سمیت 16 افراد زخمی ہو گئے ہیں۔
پولیس ذرائع کا کہنا ہے کہ دھماکہ دستی بم کے ذریعے کیا گیا ہے جبکہ دھماکے سے عبدالرشید، محمد علی، وزیر خان، عبدالرسول، شمن، ایاز، انور، فرہاد، سرور، رحمت اللہ، اللہ ڈنہ، پولیس اہلکار مہردل، غلام حیدر، حبیب اللہ اور مجن علی زخمی ہوگئے۔
پولیس کا کہنا ہے کہ اطلاع ملنے پر سٹی پولیس اور قانون نافذ کرنے والے اہلکار جائے وقوعہ پر پہنچ گئے اور علاقے کو گھیرے میں لے کر بی ڈی ٹیم کو طلب کرلیا گیا۔
پولیس ذرائع کا مزید کہنا ہے کہ زخمیوں کو شہریوں نے اپنی مدد آپ رکشوں کے ذریعے ہسپتال پہنچایا، زخمیوں کو طبعی امداد کے بعد مزید علاج کے لئے لاڑکانہ کی ہسپتال ریفر کردیا گیا ہے۔
