Tag: ساحر لودھی

کراچی:ٹی وی میزبان اور اداکار ساحر لودھی کے خلاف چیک باؤنس ہونے کے معاملے پر کراچی پولیس نے عدالت کے حکم پر مقدمہ درج کرلیا۔

میڈیا رپورٹس کے مطابق کراچی کے شاہ لطیف ٹاؤن تھانے کے ایس ایچ او غلام نبی آفریدی نے بتایا کہ میزبان کی مبینہ کاروباری شراکت دار نغمہ گل نے 8 سے 9 چیک باؤنس ہونے کے معاملے پر عدالت سے رجوع کیا تھا، عدالت کے حکم پر پولیس نے ساحر لودھی کے خلاف پاکستان پینل کوڈ کی دفعہ 489-ایف یعنی بدنیتی سے ایسا چیک جاری کرنا جس کی رقم ادا نہ ہوسکے اور دفعہ 34 کے تحت مقدمہ درج کیا ہے، پولیس کے مطابق اس معاملے میں تاحال کوئی گرفتاری عمل میں نہیں آئی۔

ایف آئی آر کے مطابق مدعیہ نے مؤقف اختیار کیا کہ وہ بیوہ اور لانڈھی کی رہائشی ہیں، ان کے مطابق ایک جاننے والے کے مشورے پر انہوں نے سرما یہ کاری کی غرض سے ساحر لودھی کو 40 لاکھ روپے دیے تھے، ساحر لودھی نے اس سرمایہ کاری پر انہیں ایک مرتبہ 2 لاکھ 50 ہزار روپے اور دوسری مرتبہ 4 لاکھ روپے منافع ادا کیا۔

ایف آئی آر میں مزید کہا گیا ہے کہ ساحر لودھی نے مختلف اوقات میں انہیں مزید 8 چیک دیے تاہم بینک اکاؤنٹ میں مطلوبہ رقم موجود نہ ہونے کے باعث تمام چیک باؤنس ہوگئے، چیکوں کی رقم ادا نہ ہونے پر انہوں نے قانونی کارروائی کے لیے ملیر کے ڈسٹرکٹ جج سے رجوع کیا جس کے بعد عدالت کی ہدایت پر پولیس نے ساحر لودھی کے خلاف مقدمہ درج کرلیا۔

پولیس کا کہنا ہے کہ معاملے کی مزید تفتیش جاری ہے اور مقدمے میں نامزد کسی شخص کو تاحال گرفتار نہیں کیا گیا۔

ڈاکٹر عامر لیاقت حسین کی اچانک موت نے سب کو پریشان کر کے رکھ دیا ہے۔ہر آنکھ اشکبار ہے خصوصی طورپر ان کے دوست۔ جن میں وسیم بادامی ،فیصل قریشی اور ساحر لودھی کا نام قابل ذکر ہے یہ تینوں عامر لیاقت کے جنازے پر پھوٹ پھوٹ کر روئے ایسے روئے کہ جیسے کوئی چھوٹا بچہ کوئی چیز کھو جانے پر روتا ہے۔ فیصل قریشی نے کہا کہ یہ دنیا صرف سوشل میڈیا تک رہ گئی ہے کوئی مرے یا جیے بس سٹیٹس لگا دو، شرکت نہ بھی ہو بس کچھ لکھ دو تاکہ ہر جگہ چھپ جائے۔کل افسوس ہوا یہ دیکھ کر کہ جن کے لئے عامر لیاقت نے بہت کچھ کیا وہ ان کے جنازے میں نہیں آئے۔

خیر جو شہرمیں نہیں تھے وہ سمجھ آتا ہے لیکن یہاں ہوتے ہوئے بھی نہ آئے بے حسی ہے۔وسیم بادامی نے کہا کہ آخری دنوں میں وہ بہت دل شکستہ تھے ہم نے کوشش کی کہ ان کو دوبارہ زندگی کی طرف لائیں میں نے دو بار فون ملا یا کوشش کی کہ بات ہو سکے لیکن انہوں نے بس اتنا کہا کہ یار میرے ساتھ اچھا نہیں ہوا میں نے کوشش کی کہ ملاقات ہوجائے لیکن نہیں ہو سکی میری دعا ہے کہ جو بھی ان کے ساتھ ہوا اور جو دکھ انہوں نے دیکھے ان کا آخرت میں مداوا ہو۔