گجرات کے علاقے سرائے عالمگیر میں ایک دل دہلا دینے والا حادثہ پیش آیا، جس میں ایک شادی کی خوشیوں کے دوران دلہا اور اس کی سالی جاں بحق ہو گئے۔ یہ حادثہ اس وقت پیش آیا جب دلہا راجا اسامہ اپنی ولیمے کی تقریب کے بعد گاڑی میں سوار ہو کر واپس جا رہا تھا۔
حادثہ سرائے عالمگیر کے علاقے بولانی میں پیش آیا، جہاں دلہا راجا اسامہ ولیمے کی تقریب کے بعد اپنی سالی اور دیگر خواتین کے ساتھ ایک گاڑی میں جا رہا تھا۔ اس دوران گاڑی کی زد میں آ کر یہ گاڑی سرائے عالمگیر کے قریب نہر میں جا گری۔ حادثے کے نتیجے میں دلہا راجا اسامہ اور اس کی سالی مریم موقع پر ہی جاں بحق ہو گئے۔ریسکیو 1122 کے اہلکار فوری طور پر موقع پر پہنچے اور دلہن سمیت تین خواتین کو زخمی حالت میں گاڑی سے نکال کر محفوظ مقام پر منتقل کیا۔ دلہا اور اس کی سالی کی لاشوں کو اسپتال منتقل کیا گیا، جہاں ان کی موت کی تصدیق کر دی گئی۔دلہا اور اس کی سالی کی موت کی خبر سے علاقے میں غم کی لہر دوڑ گئی، اور ان کے اہل خانہ میں کہرام مچ گیا۔ شادی کے اس موقع پر یہ دلخراش حادثہ شادی کی خوشیوں کو غم میں بدل گیا۔
دوسری جانب، حیدرآباد کے علاقے ٹنڈو جام میں بھی ایک افسوسناک واقعہ پیش آیا جہاں شادی کی تقریب میں ہوائی فائرنگ کے دوران ایک لڑکی جاں بحق ہو گئی۔ یہ واقعہ 2 روز قبل پیش آیا، جب لڑکی کو زخمی حالت میں اسپتال منتقل کیا گیا، تاہم وہ جانبر نہ ہو سکی اور اسپتال میں دم توڑ دیا۔متاثرہ لڑکی کے والد کا کہنا ہے کہ ان کی بیٹی ایک آرٹسٹ تھی اور وہ شادی کی تقریب میں اپنے فن کا مظاہرہ کرنے کے لیے آئی تھی۔ تاہم، اس دوران تقریب میں ہوائی فائرنگ کی زد میں آ کر وہ زخمی ہو گئی اور بعد ازاں دم توڑ گئی۔
