لاہور : آخری گولی کی بات تو ہوتی ہے مگر عمل کب ہوگا ، بھارت نے 1 کروڑ کشمیریوں کی سانس بند کررکھی ہے، اور حکومت خاموش تماشائی بنی ہوئی ہے ،ان خیالات کا اظہار امیر جماعت اسلامی پاکستان سینیٹر سراج الحق نے ماڈل ٹاﺅن لاہور میں یکجہتی کشمیر کنونشن سے خطاب کرتے ہوئے کیا۔سراج الحق نے کہا کہ بھارت کشمیر پر قبضہ کرکے پاکستان کو بنجر بنانا چاہتا ہے، مسئلہ کشمیر پر 72 سال سے حکمران محض بیانات پر اکتفا کررہے ہیں،
ماڈل ٹاﺅن لاہور میں یکجہتی کشمیر کنونشن سے خطاب کرتے سراج الحق نے کہا کہ حکمران آخری گولی اور آخری سانس کی بات کرتے ہیں مگر پہلا قدم اٹھانے کو کوئی تیار نہیں، بھارت نے کشمیر کو بڑی قتل گاہ بنا دیا ہے، 36 دنوں سے ایک کروڑ کشمیریوں کی سانس بند کر رکھی ہے، بھارت کے فضائی راستے بند اور ہر قسم کی تجارت ختم کرنے کا اعلان کیا جائے، سڑکیں اور ٹرین بند کی جائے۔آج تک مسئلہ کشمیر ہماری حکومتوں کی نااہلی اور نالائقی کی وجہ سے حل طلب ہے، موجودہ حکومت نے بھی اب تک آنیاں جانیاں کی ہیں، کوئی عملی قدم نہیں اٹھایا۔
سراج الحق نے مزید کہا کہ 6 اکتوبر کو زندہ دلان لاہور لاکھوں کی تعداد میں کشمیر مارچ میں شریک ہوکر اپنے کشمیر ی بھائیوں سے اظہار یکجہتی کریں گے۔ جس سے جماعت اسلامی پنجاب وسطی کے امیر محمد جاوید قصوری اور امیر جماعت اسلامی لاہور ڈاکٹر ذکر اللہ مجاہد نے بھی خطاب کیا۔اس موقع پر سیکرٹری اطلاعات جماعت اسلامی پاکستان قیصر شریف اور نائب امیر جماعت اسلامی لاہور ملک شاہد اسلم بھی موجود تھے۔
