ممبئی: کرن جوہر کے دھرما پروڈکشن کے پچاس فیصد حصص سیرین انٹرٹینمنٹ کے مالک آدار پوناوالا نے بھارتی ہزار کروڑ روپے میں حاصل کرلیے ہیں۔
باغی ٹی وی : دھرما پروڈکشن کے حصص خریدنے میں ریلائنس انڈسٹری کے مالک مکیش امبانی اور انٹرٹینمنٹ کمپنی سارے گاما بھی دلچسپی رکھتی تھی، لیکن آدار پونا والا کی قیادت میں سیرین انٹر ٹینمنٹ نے دھرما پروڈکشن کے نصف شیئرز حاصل کرنے کے بعد فیصلہ کیا ہے کہ وہ دھرما پروڈکشن میں کرن جوہر کی قیادت کو برقرار رکھیں گے۔
بالی ووڈ پروڈکشن ہاؤس کے اعلان کے مطابق، پونا والا کی سیرین انٹرٹینمنٹ نے 1000 کروڑ روپے میں دھرما پروڈکشن کے 50 فیصد حصص خریدے ہیں جبکہ کرن جوہر بقیہ 50 فیصد ملکیت اپنے پاس رکھیں گے۔
دھرما پروڈکشن ہندوستان کی معروف فلم پروڈکشن اور ڈسٹری بیوشن کمپنیوں میں سے ایک ہے، جس کی بنیاد یش جوہر نے 1976 میں رکھی تھی، 2003 میں یش کے انتقال کے بعد اُن کے بیٹے کرن جوہر نے ادارے کی باگ ڈور سنبھالی، گزشتہ چار دہائیوں سے دھرما پروڈکشن نے کئی سپر ہٹ یادگار فلمیں دی ہیں، جن میں کچھ کچھ ہوتا ہے، کبھی خوشی کبھی غم، مائی نیم اِز خان، اسٹوڈنٹ آف دی ایئر وغیرہ شامل ہیں۔