لاہور کی سیشن کورٹ میں مسجد وزیر خان میں گانے کی فلمبندی کے مقدمے میں نامزد اداکارہ صباقمر اور گلوکار بلال سعید کی جانب سے حاضری معافی کی درخواست دائر کی گئی تھی جو کہ سیشن کورٹ نے منظور کر لی ہے-
باغی ٹی وی : ادکارہ صبا قمر اور گلوکار بلال سعید کے خلاف مسجد وزیر خان میں شوٹنگ کرنے پر تھانہ اکبری گیٹ پولیس نے مقدمہ درج کیا گیا تھا تاہم اب لاہور کی سیشن کورٹ میں ایڈیشنل سیشن جج نے ادکارہ صبا قمر اور گلوکار بلال سعید کی درخواست ضمانت پر سماعت کی-
اداکارہ صبا قمر اور بلال سعید کے وکلاء نے عدالت سے استدعا کی کہ اُن کی جان کو خطرہ ہے اس لیے عدالت نہیں آسکتے، لہذا اُن کی حاضری معاف کردی جائے جس پر عدالت نے سماعت کرتے ہوئے دونوں فنکاروں کی حاضری معافی کی درخواست منظور کرنے کا حکم دے دیا تھا-
اس موقع پر مدعی کے وکیل نے اعتراض کیا کہ ملزمان کا عبوری درخواست میں عدالت میں موجود ہونا ضروری ہوتا ہے اور عدالت حاضری معافی کی درخواست مسترد کرتے ہوئے دونوں کی درخواست ضمانتیں بھی خارج کر دے۔
عدالت نے کاروائی کرتے ہوئے صبا قمر اور بلال سعید کے حاضری معافی کی درخواست منظور کرتے ہوئے آئندہ سماعت پر طلب کرلیا اور دونوں کی عبوری درخواست ضمانتوں میں 3 ستمبر تک توسیع کردی۔
دونوں فنکاروں کے خلاف مسجد وزیر خان میں گانے کی شوٹنگ کرنے پر تھانہ اکبری گیٹ پولیس نے مقدمہ درج کیا تھا۔
دونوں نے درخواست میں موقف اختیار کیا کہ مسجد میں گانے کی شوٹنگ نہیں کی مسجد کے تقدس کا خیال ہے اور عدالت عبوری درخواست ضمانت منظور کرنے کا حکم دے –
سیشن عدالت نے صبا قمر اور بلال سعید کو 3 ستمبر کو طلب کر لیا اور پولیس کو 3ستمبر تک بلال سعید اور صبا قمر کو گرفتار کرنے سے روک دیا ہے۔
پاکستانی گلوکار بلال سعید اور اداکارہ صبا قمر نئے گانے ’قبول ہے‘ کی تاریخی مسجد میں ڈانس کرنے کے مناظر کی عکس بندی پر تنازع کا شکار ہو گئے تھے ، مسجد میں ڈانس ویڈیو وائرل ہونے کے بعد معروف مذہبی و سیاسی شخصیات سمیت عوام نے غم و غصے کا اظہار کرتے ہوئے حکومت سے دونوں فنکاروں کے خلاف قانونی کارروائی کرنے کا مطالبہ کیا تھا-
جس کے بعد اداکارہ صبا قمر اور بلال سعید کے خلاف دفعہ 295 کے تحت مقدمہ درج کیا گیا ہے ایف آئی آر میں کہا گیا ہے کہ اداکارہ صبا قمر اور بلال سعید نے مسجد کا تقدس پامال کیا لہٰذا ان دونوں کے خلاف کارروائی کی جائے گی جس پر عدالت نے ابتدائی سماعت کے بعد دونوں پر مقدمہ دائر کرنے کا حکم دیا تھا۔
بعد میں دونوں فنکاروں نے عوام کا دل دُکھانے پر معافی بھی مانگی تھی اور یقین دہانی کرائی تھی کہ وہ یہ مناظر گانے کی ویڈیو سے ہٹا دیں گے- بلال سعید اور صبا قمر کا گانا ’قبول‘ 12 اگست کو ریلیز ہوا، جس میں لاہور کی تاریخی مسجد وزیر خان میں فلمائے گئے مناظر شامل نہیں کیے گئے تھے