بالی وڈ اداکارہ سوناکشی سنہا کودہلی میں طلباء کے مظاہروں کی حمایت کرنے پر سوشل میڈیا پر شدید تنقید کا سامناہے، اس معاملے پر اب ان کے والد اداکار شتروگھن سنہا نےبی جے پی کے آئی ٹی سیل پر کڑی تنقید کی ہے۔
ایک حالیہ انٹرویو کے دوران شتروگھن سنہا سے جب یہ پوچھا گیا کہ سوناکشی کو دہلی کے مظاہروں کی حمایت کرنے پر نشانہ کیوں بنایا جا رہا ہے، تو انہوں نے اپنی بیٹی کا دفاع کرتے ہوئے واضح طور پر کہا کہ یہ ٹرولنگ نیچرل نہیں بلکہ مصنوعی ہےمیری بیٹی کے خلاف جو بھی شور شرابا کیا جا رہا ہے وہ سب پیسے دے کر کروایا جا رہا ہے۔
انہوں نے کہا کہ بی جے پی کا آئی ٹی سیل اور جو لوگ ان کی پالیسیوں کو مانتے ہیں، وہ یہ سب کروا رہے ہیں یہ سب ٹرولنگ تیار شدہ ہے، انہیں جو لکھ کر دیا جاتا ہے وہ وہی بولتے ہیں اور انہیں خود بھی معلوم نہیں ہوتا کہ وہ کیا کہہ رہے ہیں، سوناکشی بہت مضبوط ہے اور اس نے بالکل درست کیا ہے کہ وہ ایسی فضول ٹرولنگ پر دھیان ہی نہیں دیتی، سوناکشی نے واضح طور پر کہا ہے کہ وہ ٹرولنگ پر توجہ نہیں دیتیں اور اپنی بات پُرامن انداز میں رکھنے کو ترجیح دیتی ہیں۔
شتروگھن سنہا سے جب یہ سوال کیا گیا کہ کیا سوناکشی مستقبل میں سیاست میں قدم رکھنے کا ارادہ رکھتی ہیں، تو انہوں نے کوئی حتمی جواب نہیں دیا،کہا کہ پہلے میں ان سے یہ سوال پوچھ لیا کرتا تھا، لیکن اب میں صرف اتنا کہہ سکتا ہوں کہ وہ ایک قابل باپ کی سب سے قابل بیٹی ہے۔
سوناکشی کے سیاسی خیالات کے بارے میں انہوں نے اشارہ دیا کہ ان کی رائے اکثر ان کی اپنی رائے سے بھی زیادہ مضبوط اور دو ٹوک ہوتی ہے۔