مودی سرکار کے تحت بھارتی فضائیہ کی نااہلی اور غیرپیشہ ورانہ طرزعمل نے ایک بار پھر دنیا کے سامنے اپنی حقیقت عیاں کر دی ہے۔
بھارتی فضائیہ کے سربراہ ائیر چیف مارشل اے پی سنگھ نے اس بات کا اعتراف کیا ہے کہ جنگی طیاروں کی کمیشن میں تاخیر بھارتی فضائیہ کی ناکامی کی ایک بڑی مثال ہے۔ بھارتی میڈیا کے مطابق، انہوں نے ان مسائل پر اپنے شدید ردعمل کا اظہار کیا اور اس بات کا اعتراف کیا کہ بھارتی فضائیہ میں جدید طیاروں کے حصول میں سنگین مشکلات کا سامنا رہا ہے۔بھارتی فضائیہ کے سربراہ نے بتایا کہ ‘تیجس پروجیکٹ’ کا آغاز 1986 میں کیا گیا تھا، لیکن اس کا پہلا طیارہ 17 سال بعد یعنی 2003 میں اڑان بھر سکا۔ اس کے بعد، اس طیارے کی ٹیسٹنگ اور بہتری کے مراحل میں مزید 16 سال گزر گئے، اور تب جا کر یہ طیارہ بھارتی فضائیہ کے بیڑے میں شامل ہوا۔ سربراہ نے اس بات کا بھی ذکر کیا کہ اب تک بھارتی فضائیہ میں 40 طیارے بھی مکمل طور پر شامل نہیں ہو سکے ہیں، جو کہ بھارتی فضائیہ کی صلاحیتوں پر ایک بڑا سوالیہ نشان ہے۔
ائیر چیف مارشل اے پی سنگھ نے مزید کہا کہ وقت کی حساسیت کو نہ سمجھتے ہوئے بھارتی فضائیہ کے ریسرچ اینڈ ڈیولپمنٹ شعبہ نے اپنی اہمیت کھو دی ہے۔ انہوں نے واضح کیا کہ ناکامی کے خوف کی وجہ سے بھارتی فضائیہ نے اپنے اہم پروجیکٹس کو مکمل کرنے میں بہت وقت ضائع کیا۔ ان کا کہنا تھا کہ "جو ملک اہم پروجیکٹس کو بر وقت مکمل نہیں کر سکتا، اسے ٹیکنالوجی کا کوئی فائدہ نہیں ہو سکتا۔”
بھارتی فضائیہ کی طیاروں کی مینوفیکچرنگ میں مسلسل توسیع نے بھارتی حکومت کی ناکام پالیسیوں کو بے نقاب کر دیا ہے۔ مودی حکومت کے دور میں بھارتی فضائیہ بے شمار فضائی حادثات کا شکار ہوئی ہے۔ گزشتہ پانچ سالوں میں بھارتی فضائیہ کے 46 حادثات ہوئے، جن میں 42 بھارتی پائلٹس اپنی جان سے ہاتھ دھو بیٹھے۔ ان حادثات کی بڑھتی ہوئی تعداد اور بھارتی فضائیہ کی ناکامیوں نے یہ ثابت کر دیا ہے کہ مودی سرکار ملکی اداروں کو مالی فائدے کے لیے تباہ کرنے کی پالیسی اپنائے ہوئے ہے۔
آئے روز حادثات کا سلسلہ: بھارتی فضائیہ کی ناکامی کا واضح ثبوت
بھارتی فضائیہ کے طیاروں کے آئے روز حادثات نہ صرف بھارتی فضائیہ کے غیرپیشہ ورانہ طرزعمل کا منہ بولتا ثبوت ہیں، بلکہ یہ بھی ظاہر کرتے ہیں کہ بھارتی حکومت نے اپنی ناکامیوں کے باوجود ان مسائل پر مناسب توجہ نہیں دی۔ بھارتی فضائیہ کی ناقص کارکردگی اور حادثات کی بڑھتی ہوئی تعداد ملک کی قومی سلامتی کے لیے ایک سنگین خطرہ بن سکتی ہے۔
مودی سرکار کی ناقص حکومتی پالیسیوں اور بھارتی فضائیہ کی مسلسل ناکامیوں نے ایک بار پھر یہ ثابت کر دیا ہے کہ جب تک بھارت اپنے اداروں کو درست حکمت عملی کے تحت چلانے میں کامیاب نہیں ہوتا، اس کی فضائیہ اور دیگر اہم شعبے اپنی ساکھ اور کارکردگی میں مزید تنزلی کا شکار ہوں گے۔
مودی سرکار ناکام،منی پور میں سکیورٹی کی بگڑتی صورتحال،،تھانے پر حملہ
لاس اینجلس میں تاریخ کی بدترین آگ، 6 ہزار گھر تباہ
