پاکستان چین فارماسیوٹیکل اینڈ ہیلتھ کیئر بزنس ٹو بزنس انویسٹمنٹ کانفرنس 17 جولائی کو اسلام آباد میں منعقد ہوگی۔
اعلامیے کے مطابق اس 2 روزہ کانفرنس کا انعقاد اسپیشل انویسٹمنٹ فسیلیٹیشن کونسل، وزارت قومی صحت، ضوابط و رابطہ اور ڈرگ ریگولیٹری اتھار ٹی آف پاکستان کے اشتراک سے کیا جا رہا ہے کانفرنس کا مقصد پاکستان اور چین کے درمیان اقتصادی تعاون کو مزید فروغ دینا، سرمایہ کاری میں اضافہ ، جد ت طرازی کی حوصلہ افزائی اور فارماسیوٹیکل، ہیلتھ کیئر اور بایوٹیکنالوجی کے شعبوں میں اسٹریٹجک شراکت داری کو مضبوط بنانا ہے۔
اعلامیے میں کہا گیا ہے کہ یہ کانفرنس براہِ راست غیر ملکی سرمایہ کاری کے فروغ اور پائیدار صنعتی ترقی کے لیے سازگار ماحول کی فراہمی کے حوالے سے ایس آئی ایف سی کے عزم کی عکاسی کرتی ہے یہ کانفرنس ایک اعلیٰ سطح کے بزنس ٹو بزنس پلیٹ فارم کے طور پر منعقد کی جا رہی ہے، جس میں پاکستا ن کی معروف فارماسیوٹیکل، ہیلتھ کیئر اور بایوٹیکنالوجی کمپنیوں کے ساتھ چینی سرمایہ کار، صنعت کار، ٹیکنالوجی فراہم کرنے والے ادارے اور دیگر کاروباری ر ہنما شریک ہوں گے۔
اعلامیے کے مطابق، کانفرنس کے دوران شرکا کو تجارتی شراکت داری قائم کرنے، سرمایہ کاری کے مواقع تلاش کرنے اور دونوں ممالک کے درمیان کاروباری تعاون کو فروغ دینے کے مواقع میسر آئیں گے،کانفرنس میں منظم بزنس ٹو بزنس ملاقاتیں، نیٹ ورکنگ سیشنز اور سرمایہ کاری سے متعلق مذاکرات بھی ہوں گے، جن کا مقصد مشترکہ منصوبوں، ٹیکنالوجی کی منتقلی، کنٹریکٹ مینوفیکچرنگ، تحقیق میں تعاون اور مقامی سطح پر پیداوار کے فروغ جیسے شعبوں میں تعاون بڑھانا ہے۔
اعلامیے میں مزید کہا گیا ہے کہ اس کانفرنس سے پاکستان کے ہیلتھ کیئر نظام کی جدید خطوط پر ترقی، فارماسیوٹیکل صنعت کی مسابقتی صلاحیت میں اضافہ اور دونوں ممالک کے درمیان بامعنی کاروباری روابط کو فروغ ملنے کی توقع ہے پاکستان چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس 2026 دونوں ممالک کے دیرینہ اسٹریٹجک تعلقات کو مزید مستحکم کرنے، طویل المدتی صنعتی تعاون کو فروغ دینے اور پائیدار اقتصادی ترقی و مشترکہ خوشحالی کے لیے سرمایہ کاری کے نئے مواقع پیدا کرنے میں اہم کردار ادا کرے گی۔