امریکا کے ڈینور انٹرنیشنل ایئرپورٹ پر فرنٹیئر ایئرلائنز کے ایک مسافر طیارے نےٹیک آف کے دوران رن وے عبور کرنے والے ایک شخص کو ٹکر مار کر ہلاک کردیا ۔
ایئرپورٹ انتظامیہ کے مطابق حادثہ جمعہ کی رات اس وقت پیش آیا جب فرنٹیئر ایئرلائنز کی لاس اینجلس جانے والی پرواز روانگی کے لیے ٹیک آف کر رہی تھی،طیارے کے عملے نے رن وے پر ایک شخص سے ٹکرانے کی اطلاع دی جس کے بعد پرواز فوری طور پر روک دی گئی، نامعلوم شخص ائیرپورٹ کی حفاظتی باڑ پھلانگ کر رن وے تک پہنچا تھا اور صرف 2 منٹ بعد رن وے عبور کرتے ہوئے طیارے کی زد میں آگیا ہلاک ہونے والا شخص ایئرپورٹ کا ملازم نہیں تھا۔
حادثے کے بعد ایئربس اے 321 طیارے کے انجن میں مختصر آگ بھڑک اٹھی جبکہ کیبن میں دھواں بھر گیا،طیارے میں سوار 224 مسافروں اور عملے کے 7 ارکان کو بحفاظت باہر نکال لیا گیا 12 افراد کو معمولی زخمی ہونے کی شکایات ہوئیں جبکہ 5 افراد کو مقامی اسپتال منتقل کیا گیا۔
فرنٹیئر ایئرلائنز نے واقعے کی تحقیقات شروع کرتے ہوئے کہا ہے کہ وہ ایئرپورٹ انتظامیہ اور دیگر حفاظتی اداروں کے تعاون سے مزید معلومات جمع کر رہی ہے، واقعے کے مقام کو کلیئر کرنے کے بعد مقامی وقت کے مطابق صبح 10 بج کر 55 منٹ پر متعلقہ رن وے دوبارہ کھول دیا گیا جس باڑ کو عبور کیا گیا تھا اس کا معائنہ کیا گیا اور وہ درست حالت میں پائی گئی۔
امریکی وزیرِ ٹرانسپورٹ شان ڈفی نے کہا ہے کہ مقامی قانون نافذ کرنے والے ادارے فیڈرل ایوی ایشن ایڈمنسٹریشن اور ٹرانسپورٹیشن سیکیورٹی ایڈمنسٹریشن کی معاونت سے واقعے کی تحقیقات کر رہے ہیں۔