کراچی کے علاقے ملیر قائد آباد میں 3 سال کی بچی سے مبینہ زیادتی اور تشدد کے بعد قتل کا مقدمہ مقتولہ کے والد کی مدعیت میں درج کرلیا گیا۔
مقدمہ اغوا، قتل، زیادتی، تشدد اور دیگر دفعات کے تحت درج کیا گیا ہے، معصوم بچی کی تشدد زدہ لاش بوری میں بند ملی تھی پولیس سرجن ڈاکٹر سمعیہ کا کہنا ہے کہ یہ کیس بدترین اور سفاکانہ زیادتی کی مثال ہے، مقتولہ کے پوسٹ مارٹم میں زیادتی اور تشدد کی تصدیق ہوئی ہے، وجہ موت کے تعین کیلئے پوسٹ مارٹم رپورٹ محفوظ کرلی گئی ہے جبکہ کیمیکل ایگزا من رپورٹ آنے پر موت کی وجہ کا تعین ہوگا۔
ایف آئی آر میں والد نے بتایا ہے کہ بیٹی 12 بجے گھر سے باہر کھیلنے گئی تھی واپس نہیں آئی، جس پر اہلیہ نے کال کرکے اطلاع دی، میں فوری گھر آیا، بیٹی کو کافی تلاش کیا مگر وہ نہیں ملی، پونے 8 بجے جب گھر واپس آئے تو گلی میں ہجوم تھا، محلے والوں نے بتایاکہ نامعلوم افراد بیٹی کی لاش بوری میں پھینک کرگئے ہیں، بچی کے دادا نے میری بیٹی کلثوم کی لاش کی تصدیق کی تھی۔
آئی جی سندھ جاوید عالم اوڈھو نے افسوسناک واقعے کا نوٹس لیتے ہوئے ڈی آئی جی ایسٹ کی سربراہی میں تحقیقاتی کمیٹی قائم کردی ہے، کمیٹی میں ایس ایس پی ایس آئی یو، ایس ایس پی اور ایس ایس پی اسپیشل برانچ سمیت دیگر ادارے بھی شامل ہیں، کمیٹی تمام پہلوؤں کاجائزہ لےکر جلد رپورٹ پیش کرے گی جبکہ کمیٹی روزانہ کیس میں ہونیوالی پیش رفت سے آئی جی سندھ کو آگاہ کرے گی۔
اس حوالے سے آئی جی سندھ جاوید عالم اوڈھو نے کہا کہ قتل میں ملوث عناصر کسی رعایت کے مستحق نہیں، ملزمان کو سخت سزا دلانے کیلئے ہرممکن اقدامات کیے جائیں گے، متاثرہ خاندان کو انصاف کی فراہمی سندھ پولیس کی اولین ترجیح ہے۔