اسلام آباد: پاکستان تحریک انصاف کے چیئرمین عمران خان نے کہا ہے کہ دشمن ہماری فوج کو کمزور کرنے کی کوشش کررہا ہے۔
باغی ٹی وی :سماجی رابطے کی ویب سائٹ ٹوئٹر اسپیس میں گفتگو کرتے ہوئے عمران خان نے کہا کہ مسلم لیگ (ن) قائد نوازشریف کو ’این آر او ٹو‘ دینے کے خلاف پوری قوم کے ساتھ سڑکوں پر نکلوں گا اور اس کے خلاف بھرپور آواز اٹھاؤں گا، نوازشریف اور آصف زرداری نے حکومت میں رہتے ہوئے فوج کو کمزور کرنے کی کوشش کی۔
پی ٹی آئی چیئرمین نے کہا کہ چاہے جو بھی خطرہ ہو ہر حال میں کل کے جلسے میں جاؤں گا، مینار پاکستان کا جلسہ ایک تاریخی جلسہ ہوگا،گھبرانے کی ضرورت نہیں میں نے 26 سال مافیا کے خلاف جدوجہد کی، 2 خاندان پاکستان پر بادشاہت کررہے ہیں، تبدیلی کے لیے محنت کی تو کرپٹ ٹولہ ایک ساتھ ہو گیا تبدیلی کے لیے سسٹم کو تبدیل کرنا انتہائی ضروری ہوتا ہے،مجھے معلوم تھا یہ سب ایک دن اکٹھے ہوجائیں گے، شوگر اور کرپٹ مافیا سب ایک ہو گئے ہیں۔
عمران خان نے کہا کہ جب تک ملک میں عدالتی نظام مضبوط نہیں ہوتا،یہ طاقتور کو قانون کے نیچے نہیں لاسکتا، آزاد عدلیہ کے لیے میں جیل بھی گیا،ان لوگوں نے 30 سال سے کرپشن کی مگر ہمارا نظام ان کو جیلوں میں نہیں ڈال سکا۔
سابق وزیراعظم نے کہا کہ ہم نے جلسےکے لیے فنڈ جمع کرنے کی مہم چلائی، چند دنوں میں 20 کروڑ روپے سے زائد رقم جمع ہو چکی ہے، اگرفارن فنڈنگ کیس تمام جماعتوں کیخلاف چلے تو تحریک انصاف سرخرو ہو گی الیکشن کمشنر تحریک انصاف کے مخالف ہے، ہمارے سسٹم میں بیٹھے غداروں نے بیرونی قوتوں کی بھرپور مدد کی، آج ایسے لوگ مسلط کیے گئے ہیں جو صرف اور صرف کرپشن میں ملوث ہیں پہلی بار قوم کو احساس ہوا ہے کہ بیرونی طاقت کے ذریعے حکومت تبدیل کی گئی۔
پی ٹی آئی چیئرمین نے کہا کہ فارن فنڈنگ کیس میں پی ٹی آئی کے خلاف ماحول بنایا جا رہا ہے، مینار پاکستان سے تحریک کا پوری طرح سے آغاز کریں گے، اس مرتبہ الیکشن بھرپور انداز میں لڑیں گے۔
انہوں نے کہا کہ ہم نے فوج کے خلاف کبھی بات نہیں کی، ہم نے اپنی فوج کو مضبوط کرنا ہے، فوج اس ملک کے لیے عمران خان سے زیادہ ضروری ہے فوج نہ ہوتی تو ہمارے ملک کے تین ٹکڑے ہو جاتے دشمن ہمیشہ فوج پر اٹیک کرتے ہیں سابق حکومتیں فوج کو نشانہ بناتی رہیں-
چئیر مین پی ٹی آئی نے کہا کہ اداروں میں انسان ہوتے ہیں اگر ایک انسان خلاف ہو تو اس کا یہ مطلب نہیں کہ پورا اداراہ خلاف ہے یا پورا اداراہ خراب ہے-
عمران خان نے کہا کہ سندھ میں ایسے حالات ہیں جیسے کراچی میں ایم کیو ایم کا خوف تھا، آصف علی زرداری اور پیپلز پارٹی نے اندرون سندھ میں لوگوں کو غلام بنایا ہوا ہے، پولیس سے ڈرا دھمکا کر زرداری مافیا سندھ میں حکومت کرتا ہے۔
ان کا کہنا تھا کہ 3 ماہ پہلے یہ پتہ چل گیا تھا کہ کچھ اینکرز اور میڈیا چینلز میں پیسہ چل رہا ہے، سوشل میڈیا کے ذریعے آج عوام کی آواز کوئی بند نہیں کرسکتا، امپورٹڈ حکومت نامنظور ایک بہترین احتجاج ہے۔
چیئرمین پی ٹی آئی نے کہا کہ ماضی میں ہونے والی غلطیاں اب نہیں کریں گے، پرویز مشرف نے نوازشریف اور زرداری کو این آر او دے کر بہت بڑی غلطی کی،اگر اب نواز شریف کو دوسری بار این آر او ملا تو ملک کیلئے بہت خطرناک ہو گا اور یہ ہم کسی بھی صورت برداشت نہیں کریں گے حکومت کس طرح چلائی جاتی ہے اب پتہ چل گیا ہے،اس بار ٹکٹوں کی تقسیم بہتر طریقے سے کریں گے، ہمیں حکومت میں بلیک میل کیاگیا، ہمارے ساتھ غداری کی گئی۔
