لاہور: پاکستان سمیت دنیا بھر میں محنت کشوں کا عالمی دن آج منایا جا رہا ہے-
باغی ٹی وی: غربت، بیروزگاری ،مہنگائی اور کم اجرت آج کے دور میں مزدوروں کے بڑے مسائل ہیں محنت کشوں کے لیے منائے جانے والے دن بھی مزدور اس دن کی اہمیت سے بے خبر اپنے بچوں کی روٹی کے لیے کام میں جتا ہوا ہے۔
لیبر ڈے پر گوگل نے بھی ڈوڈل کے ذریعے مزدوروں کو خراج تحسین پیش کیا ہے جبکہ ملک بھر میں آج عام تعطیل ہے۔
1886 کو یکم مئی کے دن امریکا کے شہر شکاگو کے مزدور، سرمایہ داروں اور صنعتکاروں کی جانب سے کیے جانے والے استحصال پر سڑکوں پر نکلے لیکن پولیس نے جلوس پر فائرنگ کرکے سیکڑوں مزدوروں کو ہلاک اور زخمی کیا جبکہ درجنوں کو اپنے حق کے لیے آواز بلند کرنے پر پھانسی دی گئی۔
شکاگو کے محنت کشوں کے ساتھ اظہار یکجہتی کے لیے دنیا کے بیشتر ممالک میں یکم مئی کو محنت کشوں کا عالمی دن منایا جاتا ہےیکم مئی کو ہر سال یہ دن اس عہد کے ساتھ منایا جاتا ہے کہ مزدوروں کے معاشی حالات تبدیل کرنے کے لیے کوششیں تیز کی جائیں۔
پاکستان میں قومی سطح پر یوم مزدور منانے کا آغاز 1973 میں ذوالفقار علی بھٹو کے دور حکومت میں ہوا، اس دن کی مناسبت سے ملک بھر کے تمام چھوٹے بڑے شہروں میں تقریبات، سیمینارز،کانفرنسز اور ریلیوں کا انعقاد کیا جاتا ہے۔
دوسری جانب نگراں حکومت پنجاب نے پاکستان تحریک انصاف (پی ٹی آئی) کو لاہور میں یکم مئی کی ریلی نکالنے کی مشروط اجازت دے دی ڈپٹی کمشنرلاہور نےیوم مزدور پر پی ٹی آئی کو دوپہرایک بجےسے شام چھ بجے تک لبرٹی سے ناصر باغ تک ریلی نکالنے کی اجازت دے دی۔
ڈپٹی کمشنر لاہور نے پی ٹی آئی کو اجازت نامہ جاری کردیا، انتظامیہ نے تحریک انصاف سے حلف نامہ لینے کے بعد اجازت دی اجازت نامہ میں کہا گیا ہے کہ ریلی کیلئے استقبالیہ کیمپ نہیں لگائے جائیں گے، ریلی انتظامیہ ہی اسٹیج اور سیکیورٹی کی ذمہ دار ہوگی، عدلیہ اور اداروں کے خلاف تقاریر کی اجازت بھی نہیں ہوگی۔
پاکستان تحریک انصاف نے یکم مئی یوم مزدور پر لاہور کے لبرٹی چوک سے ریلی نکالنے کا اعلان کر رکھا ہے۔
نگراں حکومت پنجاب کی اجازت سے قبل الیکشن کمیشن نے تحریک انصاف کو ریلی منسوخ کرنے کی ہدایت کی تھی۔ الیکشن کمیشن نے تحریک انصاف کو ضابطہ اخلاق کی خلاف ورزی پر نوٹس بھی جاری کیا، نوٹس چیئرمین تحریک انصاف عمران خان کے نام جاری کیا گیا۔
الیکشن کمیشن کا کہنا تھا کہ ریلیوں کے لیے ضلعی انتطامیہ سے اجازت لینا ضروری ہے، سیاسی جماعتیں ریلیوں سے قبل انتظامیہ کو آگاہ کرنے کی پابند ہیں۔
الیکشن کمیشن کے مطابق ریلی سے پیشگی اجازت کا مقصد یہ ہے کہ انتظامیہ مناسب سکیورٹی اور دیگر ضروری انتظامات کرسکے۔
ذرائع کا کہنا ہے کہ پی ٹی آئی کی سینئرقیادت نے پنجاب حکومت سے رابطہ کیا اور یکم مئی پر ریلی سے متعلق حکومتی تحفظات دور کیے، جس کے بعد انھیں اجازت دی گئی۔
الیکشن کمیشن نے جب پی ٹی آئی کو ضابطہ اخلاق کی خلاف ورزی پر نوٹس جاری کیا تھا تو تحریک انصاف کی جانب سے سخت ردعمل بھی سامنے آیا تھا۔ فوادچوہدری کا کہنا تھا کہ عمران خان کی قیادت میں پیر کو بھرپورریلی نکالی جائے گی۔
فواد چوہدری نے کہا تھا کہ الیکشن کمیشن کا نوٹس حیرت انگیز ہے، یکم مئی کو سارا معاشرہ اپنے مزدوروں کے ساتھ کھڑا نظر آتا ہے، یہ حیران کن بات ہے کہ آپ یکم مئی کو ریلی نہیں نکال سکتے، پاکستان میں کوئی جمہوریت نہیں رہی۔
رہنما پی ٹی آئی اسد عمر نے کہا تھا کہ الیکشن کمیشن کوئی انوکھا الیکشن کروانا چاہتا ہے جس میں عملی طور پر مہم کرنے کی اجازت نہیں، پاکستان کی تاریخ میں کسی الیکشن میں ایسے قواعد و ضوابط نہیں دیکھے گئے، لگتا ہے پورا نظام اپنے ہی ملک کی عوام سے خوفزدہ ہے۔
