پنجاب کے شہر فیصل آباد میں افسوسناک واقعہ پیش آیا ہے، گھر میں آگ لگنے کی وجہ سے دو بچوں کی موت ہو گئی جبکہ سات افراد زخمی ہو گئے.
اطلاع پر ریسکیو ٹیم موقع پر پہنچ گئی اور آگ کو بجھایا ،ریسکیو حکام کے مطابق ستیانہ روڈ پر محلہ شریف پورہ کے ایک گھر میں آگ لگنے کے باعث 9 افراد جھلس گئے تھے جنہیں ہسپتال منتقل کیا گیا ،دوران علاج 2 بہن بھائی زخموں کی تاب نہ لاتے ہوئے جان سے گئے، زخمیوں میں پانچ بچے اور دو خواتین شامل ہیں، جاں بحق ہونے والوں میں 6 سالہ دعا فاطمہ اور 9 سالہ محمد طحہٰ شامل ہے۔
ریسکیو حکام نے دعویٰ کیا کہ گھر میں آگ چارجنگ پر لگے لیپ ٹاپ کی بیٹری پھٹنے سے لگی، آگ پر قابو پالیا گیا ہے، پولیس کا کہنا ہے کہ واقعہ کی تحقیقات جاری ہیں، حکام کا مزید کہنا ہے کہ بچہ لیپ ٹاپ استعمال کررہا تھا، اچانک بیٹری دھماکے سے پھٹ گئی، زخمیوں کو طبی امداد کے لیے الائیڈ ہسپتال کے برن سینٹر میں منتقل کر دیا گیا ہے۔
دوسری جانب وزیراعلیٰ پنجاب مریم نواز نے فیصل آباد میں جھلسنے سے بچوں کے جاں بحق ہونے پر افسوس کا اظہار کرتے ہوئے ہسپتال انتظامیہ کو زخمیوں کو علاج و معالجے کی بہترین طبی سہولیات دینے کا حکم دیا۔
وزیرِاعلیٰ پنجاب مریم نواز شریف نے لیپ ٹاپ سکیم کی منظوری دے دی پنجاب کے طلبہ کو 7 سال بعد دوبارہ جدید ترین لیپ ٹاپ دیے جائیں گے
وزیراعلیٰ پنجاب مریم نواز کی زیر صدارت ہائر ایجوکیشن سیکٹر ریفارمز کے حوالے سے اجلاس ہوا،اجلاس میں ہائر ایجوکیشن کے فروغ، لیپ ٹاپ اور طالبات کو ٹرانسپورٹ کی سہولت پر تفصیلی بریفنگ دی گئی،اجلاس سے خطاب کرتے ہوئے وزیراعلیٰ پنجاب مریم نواز کا کہنا تھا کہ ہر ضلع میں انٹرنیشنل اسٹینڈرڈ کی یونیورسٹی اور تحصیل کی سطح پر کالج ہمارے اہداف میں شامل ہیں، وزیر اعظم شہباز شریف کی ” تعلیمی ایمرجنسی“ کے اعلان کا خیر مقدم کرتے ہیں۔ صوبے بھر میں طلبہ کو 20 ہزاور موٹر بائیکس دے رہے ہیں۔
اجلاس کو بتایا گیا کہ پنجاب کے طلبہ کو 7 سال بعد دوبارہ جدید ترین لیپ ٹاپ دئیےجائیں گے، مسلم لیگ ن کے ادوار میں ہائر ایجوکیشن کا بجٹ زیادہ رہا، پنجاب میں نجی اور سرکاری یونیورسٹیوں میں ساڑھے 6 لاکھ سے زائد طلبہ زیر تعلیم ہیں، یونیورسٹیوں میں زیر تعلیم طلبہ میں لڑکوں کا تناسب 44 اور لڑکیوں کا تناسب 56 فیصد ہے ،پسماندہ اضلاع میں ترجیحی بنیادوں پر نئی یونیورسٹیاں اور کالجز بنانے پر اتفاق کیا گیا،وزیراعلیٰ پنجاب مریم نواز کا کہنا تھا کہ ہر ضلع میں انٹرنیشنل سٹینڈرڈ کی یونیورسٹی اور تحصیل کی سطح پر کالج ہمارے اہداف میں شامل ہیں۔پنجاب حکومت نالج اکانومی اور آئی سی ٹی تعلیم کے فروغ کیلئے سرمایہ کاری کر رہی ہے
وزیراعلی پنجاب مریم نواز نے "”کلینک آن وہیل”” پروگرام کا افتتاح کر دیا
وزیراعلی پنجاب مریم نواز نے کلینک آن وہیل کی گاڑیاں باقاعدہ طور کر محکمہ صحت کے حوالے کر دیں، وزیراعلی پنجاب مریم نواز نے کلینک آن وہیل پروگرام کی افتتاحی تقریب سے خطاب کرتے ہوئے کہا کہ میں اللہ کا شکر ادا کرتی ہوں کہ ہمیں صحت کے شعبے میں ایک اور سنگ میل عبور کرنے کی توفیق دی، میں صحت کے دونوں وزرا، سیکرٹری صحت اور پورے محکمہ صحت کو مبارکباد دیتی ہوں ، یہ سچ ہے کہ 2 ماہ تو حکومت کو سیدھا کرنے میں لگ جاتے ہیں،گذشتہ حکومت نے نواز شریف اور شہباز شریف کے سیدھے کاموں کو الٹا کر دیا تھا ، نواز شریف اور شہباز شریف کے کامیاب منصوبوں کو میں آگے لے کر چل رہی ہوں، میرے منصوبوں سے سب سے زیادہ نواز شریف خوش اور مطمئن ہوتے ہیں،200 کلینک آن وہیل اور 100 سے زیادہ ایمبولینسز کے ذریعے صحت کی سہولیات عوام کی دہلیز پر پہنچا رہے ہیں ،ہمارا مقصد ہے کہ لوگوں کو ہسپتال نہ جانا پڑے ،شہباز شریف کو خراج تحسین پیش کرتی ہوں کہ یہ پروگرام انہوں نے شروع کیا تھا ،اب اس پروگرام کو مزید توسیع دی جا رہی ہے ،ان گاڑیوں میں ایک ڈاکٹر، ایک ایل ایچ وی اور ایک ڈسپنسر ہو گا،اس گاڑی میں ادویات، ضروری طبی ٹیسٹوں کی سہولت ہو گی ،اس میں زچہ بچہ کے لئے سہولت کے ساتھ کچھ گاڑیوں میں الٹراساونڈ کی سہولت بھی ہو گی،اس پروگرام سے سالانہ 40 لاکھ لوگوں کو سالانہ سہولت مل سکے گی ،میں خود روزانہ لوگوں کو کال کر کے پوچھتی ہوں کہ کیا انہیں صحت کی سہولیات کے حوالے سے کوئی مسئلہ تو نہیں،1034 ہیلپ لائن کے ذرہعے اس گاڑی سے حاملہ خواتین کو گھر سے ہسپتال اور وہاں سے واپس گھر لے جایا جا سکے گا ،حاملہ خواتین کو یہ سہولت مفت فراہم کی جائے گی،دوردراز علاقوں میں بھی ایسا پروگرام لا رہے ہیں کہ ہر بنیادی صحت مراکز میں ڈاکٹر، نرس اور طبی عملہ موجود ہو گا ،پبلک سروس کمیشن کے ذریعے نئے ڈاکٹروں کو بھرتی کیا جا رہا ہے ،پنجاب کو سیاہ دور سے نکال کر ترقی کی طرف لے کر جا رہے ہیں، کنٹینروں اور گاڑیوں کو صرف احتجاج کے لئے ہی نہیں بلکہ علاج کے لئے بھی استعمال کیا جا سکتا ہے ،جناح ہسپتال میں آج ایک بچے کا گردہ ٹرانسپلانٹ ہوا جس پر ڈاکٹروں کو مبارکباد دیتی ہوں،ہم جلد ایئر ایمبولینس لا رہے ہیں لیکن اس سے پہلے 8 اضلاع میں سٹیٹ آف دی آرٹ دل کے عارضے کی سہولیات لا رہے ہیں، تاکہ بڑے شہروں میں امراض قلب کا بروقت علاج ہو سکے ،ہم پنجاب میں فری انسولین کی سروس بھی جلد لائیں گے،
پاکستان سمیت دنیا بھر میں نوجوانوں کاعالمی دن آج منایا جا رہا ہے،جس کا مقصد نوجوانوں کو دورحاضر کے چیلنجز اور مشکلات کے بارے میں شعور و آگاہی فراہم کرنا ہے ۔
نوجوانوں کے عالمی دن کے موقع پر وزیراعظم شہباز شریف نے سماجی رابطے کی ویب سائٹ ٹویٹر پر ٹویٹ کرتے ہوئے کہا ہے کہ پاکستان کی 60 فیصد سے زائد آبادی جو نوجوانوں پر مشتمل ہے کو عالمی یومِ نوجوانان بہت بہت مبارک ہو.
وزیراعظم شہباز شریف کا کہنا تھا کہ پاکستان کو جہاں رب کریم نے بے شمار قدرتی وسائل سے نوازا ہے وہیں ہماری نوجوان افرای قوت ہماری سب سے بڑی طاقت ہے. بد قسمتی سے ماضی میں نوجوانوں کی ترقی کی طرف کوئی خاص توجہ نہ دی گئی مگر اللہ کے فضل و کرم سے جب جب عوام نے مجھے اپنے اعتماد سے اپنی خدمت کی ذمہ داری سونپی، میں نے اپنی تمام تر توانائیاں اس کوشش میں صرف کیں،گزشتہ 15 ماہ میں ہی میں نے نوجوانوں کیلئے بین الاقوامی معیار کی تعلیمی سہولیات، عالمی تقاضوں سے ہم آہنگ پیشہ ورانہ تربیت، لاتعداد وظائف، اینڈاؤمنٹ فنڈز، کھیلوں کی سہولیات، لیپ ٹاپس اور آسان قرض فراہم کئے. نوجوان ہمارا مستقبل ہیں، یہ ہمارے ملک کے معمار ہیں. نوجوانوں کی ترقی و خوشحالی پاکستان کی ترقی کی ضامن ہے.
وزیراعظم شہباز شریف نے کراچی میں تقریب سے خطاب کرتے ہوئے کہا ہے کہ وزیراعلیٰ سندھ ایک جواں سال وزیراعلیٰ ہیں، وزیراعلیٰ سندھ اور ان کی ٹیم بہت محنت کررہی ہے،گورنر ہاؤس میں نوجوانوں کیلئے شاندار پروگرام کا انعقاد کیا گیا، کراچی میں باصلاحیت نوجوانوں کو لیپ ٹاپ دیئے جارہے ہیں، وسائل کو نوجوانوں کے قدموں میں نچھاور کرنا چاہیے، ملکی ترقی کیلئے نوجوانوں کو تعلیم کے زیور سے آراستہ کرنا ہوگا، اگلے ماہ ہماری حکومت کی مدت پوری ہورہی ہے،کوئی سفارش یا رشوت نہیں، میرٹ پر لیپ ٹاپس مل رہے ہیں، پرائیویٹ اداروں میں تو لوگ مہنگی تعلیم حاصل کرلیتے ہیں، دوبارہ موقع ملا تو ہر سال 10 لاکھ لیپ ٹاپ پورے پاکستان میں دیں گے،
وزیراعظم شہباز شریف کا کہنا تھا کہ آئندہ الیکشن میں ہمیں موقع ملا توعوام کی فلاح و بہود کے لئے مزید اقدامات کئے جائیں گے۔ صوبوں کی مدد سے ہرسال 5 سے 10 لاکھ لیپ ٹاپ دیئے جائیں گے نوجوانوں کو اگر سہولیات فراہم کریں تو یہ نوجوان جو ہمارے مستقبل کی ضمانت ہیں ملک کے اربوں ڈالر کما کر لا سکتے ہیں۔ یوتھ لون سکیم کے تحت ملک بھر کے نوجوانوں میں 30 ارب روپے تقسیم کئے جاچکے ہیں اس پر ہم بینکوں کے تعاون کے شکر گزار ہیں اگر ہم نے چھوٹی اور درمیانے درجے کی صنعتوں کے لئے قرضوں کی تقسیم کا نظام وضع نہ کیا تو پھر ترقی نہیں ہو سکتی بینک بڑے بڑے کاروباری اداروں کو قرضے دیتے ہیں بینکوں کے لئے یہ بات لازم کر دینی چاہیے کہ چھوٹے کسانوں اور دکانداروں کے لئے قرضے کی رقم کا خاص حصہ مختص کریں ۔ہمیں چھوٹے اور درمیانے درجے کی صنعتوں کی سہولت کا انتظام کرنا ہو گا، ملک کو آگے لے جانے کےلئے ہمیں مل کر کے کوششیں کرنا ہوں گی پاکستان ڈیفالٹ کے خطرے سے نکل چکا ہے جادو ٹونے کرنے اور پھونکیں مارنے والے ملک کے بد خواہ ناکام ہو گئے ہیں اب ہم نے آگے کی طرف جانا ہے اب ہم نے معاشی ترقی کے لئے اصلاحات کرنی ہیں اور معیشت کو بہتر بنانا ہے
تقریب سے خطاب کرتےہوئے وزیراعظم کی معاون خصوصی برائے امور نوجوانان شزہ فاطمہ لیپ ٹاپ سکیم وزیراعظم محمد شہباز شریف کا انقلابی منصوبہ ہے ہونہار اورباصلاحیت طلباو طالبات کو میرٹ پر لیپ ٹاپ دیئے جائیں گے ،گورنر سندھ کامران ٹیسوری نے کہا کہ وزیراعظم لیپ ٹاپ اور یوتھ لون سکیم نوجوانوں کے محفوظ مستقبل کا بہترین منصوبہ ہے۔ ہمیں عوام کی فلاح و بہبود کے لئے زیادہ سے زیادہ اقدامات کرنے ہوں گے۔گورنر ہائوس میں ایک لاکھ طلبا و طالبات کے لئے آئی ٹی کورس شروع کرنے کے پروگرام کا آغازکیا ہے
وزیراعظم شہباز شریف نے نشر 2 اسپتال میں ترقیاتی کاموں کے جائزے کے بعد گفتگو کرتے ہوئے کہا ہے کہ مجھے یہاں آکر دکھ بھی ہوا اور خوشی بھی ہوئی. دکھ اس بات کا کہ ہم نے 2018 میں جب اس منصوبے کا باقاعدہ اعلان کیا اور سارے لوازمات کو مکمل کیا .جھرلو الیکشن کے بعد چاہیے تھا جو بھی عمران نیازی کو کندھوں پہ بٹھا کے لائے تھے وہ عمران نیازی حکومت سے یہ ہسپتال مکمل کرواتے.یہ ہسپتال ابھی زیر تکمیل ہے وزٹ کے دوران مجھے بتایا گیا ہے کہ انشاءاللہ یہ 30 ستمبر کو یہ اپنی تکمیل کے مراحل طے کرلے گا یہ عوامی خدمت کا ایک بہت بڑا منصوبہ ہے اور دکھی انسانیت کیلیے ایک خوشی کا پیغام ہے نوجوان وزیر اعلی محسن نقوی کی قیادت میں دن رات یہاں کام ہورہا ہے،حمزہ شہباز کی سربراہی میں اس کام کو اگے بڑھانے کا عمل شروع ہوا تھا لیکن جو انکی حکومت کے ساتھ ہوا وہ سب کو پتہ ہے،
وزیرِ اعظم نے ملتان میں علاج معالجے کی بین الاقوامی سہولیات سے آراستہ زیر تعمیر نشتر 2 اسپتال کا دورہ کیا اور جاری تعمیراتی کاموں کا جائزہ لیا. 500 بستروں پر مشتمل اس اسپتال سے جنوبی پنجاب کے دور دراز علاقوں کے لوگ مستفید ہونگے.
اللہ تعالیٰ نے موقع دیا تو 5 سالوں میں 50 لاکھ لیپ ٹاپ دینگے،وزیراعظم
وزیراعظم شہباز شریف نے ملتان میں کامیاب نوجوان پروگرام کی تقریب سے خطاب کرتے ہوئے کہا کہ میرٹ وہ اثاثہ ہے جس سے قومیں بنتی ہیں اور جو قومیں میرٹ سے ہٹ جاتی ہیں سفارش کرپشن اقربا پروری اور دوسری خرافات جب مل جائیں تو وہ قومیں تباہ ہوجاتی ہیں لیکن جو قومیں ماضی کی غلطیوں سے سبق حاصل کرکے آگے بڑھتی ہیں ان کا راستہ کوئی نہیں روک سکتا. اس ملک میں لاکھوں ایسی بیٹیاں موجود ہیں جن کے والدین کے پاس وسائل نہیں یا جن کے والدین دنیا سے کوچ کرگئے ہیں انکی تعلیم انکا رہنا سہنا ,علاج نہ صرف حکومت کی ذمہ داری ہے بلکہ معاشرے کے ان طبقوں کی بھی ذمہ داری جنہیں اللہ تعالیٰ نے بے شمار وسائل سے نوازا ہے.
وزیراعظم شہباز شریف کا کہنا تھا کہ آئی ایم ایف پروگرام کوئی حلوہ یا کھیر نہیں ہے یہ بہت سخت شرائط ہیں جنہیّ ہم نے ملک میں استحکام کی خاطر برداشت کیا.الیکشن کے بعد اگر اللہ تعالیٰ نے ہمیں موقع دیا تو یہ ایک 1 لاکھ لیپ ٹاپ نہیں ہم 5 سالوں میں 50 لاکھ لیپ ٹاپ دینگے
وزیراعظم پاکستان میاں محمد شہباز شریف ملتان میں مصروف دن گزاریں گے ضلعی انتظامیہ نے آج وزیراعظم پاکستان میاں محمد شہباز شریف کی ملتان آمد کے موقع پر سکیورٹی کے سخت ترین انتظامات کر دئیے، دوسری جانب ضلعی پولیس وزیراعظم کی ملتان امد کے سلسلے میں سکیورٹی پلان تیار کر لیا ہے
وزیرِ اعظم ملتان میں جنوبی پنجاب سے تعلق رکھنے والے باصلاحیت نوجوانوں میں وزیرِ اعظم یوتھ لون اسیکم کے تحت چیکس تقسیم کریں گے. وزیرِ اعظم یوتھ لون اسیکم کے تحت اب تک ایک لاکھ دس ہزار سے زائد باصلاحیت نوجوانوں کو 101.6 ارب روپے کے آسان اور کم سود والے قرضہ جات دیئے جا چکے ہیں جو انہیں اپنے زرعی و دیگر کاروبار سے با اختیار، خودمختار اور دوسرے نوجوانوں کیلئے روزگار پیدا کرنے کے قابل بنا رہے ہیں.وزیرِ اعظم ملتان میں باصلاحیت اور قابل طلباء و طالبات میں وزیرِ اعظم لیپ ٹاپ اسکیم کے تحت لیپ ٹاپس بھی تقسیم کریں گے.
باغی ٹی وی کی رپورٹ کے مطابق وزیراعظم محمد شہباز شریف نے نوجوان لیپ ٹاپ تقسیم کا افتتاح کر دیا
تقریب سے خطاب کرتے ہوئے وزیراعظم شہباز شریف نے کہا کہ نوجوانوں کو لیپ ٹاپ دے رہا ہوں کلاشنکوف نہیں،وسائل ہوں تو قوم کے بیٹے بیٹیوں کو 1 لاکھ نہیں 1 کروڑ لیپ ٹاپ تقسیم کروں، اپنے ہر دور میں میرٹ کی بنیاد پر تعلیمی وظائف دیے،نوجوانوں پر سرمایہ کاری سے بڑھ کر کوئی چیز نہیں، زرعی قرضوں پر اربوں روپے مختص کیے گئے،ایک لاکھ لیپ ٹاپ غریب اور مستحق لوگو کو جب تعلیمی میدان میں ملیں گے تو پاکستان کی ترقی کا کوئی راستہ نہیں روک سکے گا،خواہش ہے پورے پاکستان میں ہر طالبعلم کو لیپ ٹاپ دوں ،نوجوان قوم کا مستقبل اور خوشحالی کی ضمانت ہیں نوجوانوں پر سرمایہ کاری سے بڑھ کر کوئی چیز نہیں
لیپ ٹاپ کی تقسیم کی تقریب میں نوجوان کا وزیراعظم کوخوشگوار سرپرائز
وزیراعظم شہباز شریف کو لیپ ٹاپ کی تقسیم کی تقریب میں نوجوان نے خوش گوار سرپرائز دے دیا ،لیپ ٹاپ تقسیم کی تقریب میں نوجوان محسن نے تقریر کی اور بتایا کہ وہ تندور پرروٹیاں لگاتا تھا۔ محسن کی ذاتی جدوجہد، حصول تعلیم اور زندگی میں کامیابی کے سفر پر کیس سٹڈی پیش کی گئی۔ محسن نے وزیر اعلی شہباز شریف کے دئیے تعلیمی وظیفے پر تعلیم حاصل کی اور آج وہ میو کالج لاہور میں لیکچرر ہے۔ وزیراعظم شہباز شریف اپنی نشست سے اٹھ کر خاص طور پر نوجوان محسن کے پاس گئے اور اسے اپنے سینے سے لگا لیا ،وزیراعظم شہباز شریف نے نوجوان سے کہا کہ مجھے آپ جیسے نوجوانوں پر فخر ہے، اسی جذبے سے آگے بڑھتے رہیں، آپ کو مزید ترقی کرتے دیکھنا چاہتا ہوں۔وزیراعظم شہباز شریف جب محسن سے مل رہے تھے تو تمام شرکاء نے کھڑے ہو کر تالیاں بجائیں۔ اس موقع پر مناظر بھی نظر آئے اور کئی شرکاء کی خوشی سے آنکھیں نم ہو گئیں۔
لیپ ٹاپ کی تقسیم کی تقریب میں نوجوان کا وزیراعظم کوخوشگوار سرپرائز
محسن علی نے پاکستان کے نوجوانوں کو کامیابی کا راز سمجھایا ہے۔ مریم اورنگزیب
ن لیگی رہنما، وفاقی وزیر اطلاعات مریم اورنگزیب نے سماجی رابطے کی ویب سائٹ ٹویٹر پر ویڈیو شیئر کرتے ہوئے ٹویٹ کی اور لکھا کہ یہ قابل رشک اور قابل فخر محمد محسن علی کی کامیابی کی کہانی ہی نہیں بلکہ تعلیم کے ذریعے نوجوانوں کی زندگی اور معاشرے میں تبدیلی لانے کے ولولہ انگیز وژن اور سوچ کی کامیابی کی ایک بہترین مثال بھی ہے۔ پانچ گولڈ میڈل جیتنے والے حافظ آباد کے گاﺅں میاں رحیما کے اس قابل اور محنتی محسن علی نے پاکستان کے نوجوانوں کو کامیابی کا راز سمجھایا ہے۔ وزیراعلی پنجاب کے طورپر شہبازشریف نے محسن علی جیسے سینکڑوں ذہین لیکن غریب نوجوان بچوں اور بچیوں کی سرپرستی کی، تعلیمی وظائف ، بیرون ملک اعلی تعلیم حاصل کرنے کے مواقع دے کر ان کی حوصلہ افزائی اور سرپرستی کی جو آج قائدمحمد نوازشریف اور شہبازشریف کے یوتھ پروگرام کی کامیابی کے درخشاں ستارے بن چکے ہیں۔ اس وژن کی کامیابی کی گواہی دے رہے ہیں۔ آج محسن علی اُسی میوکالج لاہور میں لیکچرار ہے جس کے قریب واقع تندور میں وہ روٹیاں لگا کراپنے خاندان کے لئے رزق حلال کما رہا تھا۔ وزیراعظم شہبازشریف نے آج محسن علی کو کروڑوں پاکستانیوں کے سامنے سینے سے لگا کر شاباش دی۔ ایک شاباش نوازشریف اور شہبازشریف کو بھی ملنی چاہیے جن کے وژن نے محسن علی اور اس جیسے سینکٹروں غریبوں کو کامیابی کی اس منزل تک پہنچنے اور اپنے خواب سچ کردکھانے میں عملی مدد کی۔ یہ ہوتا ہے وژن، یہ ہوتی ہے عوام کی منتخب قیادت #چُھولوآسمان_نوجوان
یہ قابل رشک اور قابل فخر محمد محسن علی کی کامیابی کی کہانی ہی نہیں بلکہ تعلیم کے ذریعے نوجوانوں کی زندگی اور معاشرے میں تبدیلی لانے کے ولولہ انگیز وژن اور سوچ کی کامیابی کی ایک بہترین مثال بھی ہے۔ پانچ گولڈ میڈل جیتنے والے حافظ آباد کے گاﺅں میاں رحیما کے اس قابل اور محنتی محسن… pic.twitter.com/Yr8uVgfUcp
مصیبت میں گھرے لاکھوں خاندانوں کو 70ارب روپے شفاف طریقے سے تقسیم کیے،وزیرِ اعظم
دوسری جانب وزیرِ اعظم شہباز شریف نے بینظیر انکم اسپورٹ پروگرام کے تحت سماجی تحفظ اکاؤنٹ کے اجراء کی تقریب سے خطاب کرتے ہوئے کہا کہ پچھلے سال ایک تباہ کن سیلاب آیا تو ہم ہر جگہ پینچے چاروں طرف تباہی نظر آرہی تھی جن مشکل حالات میں ہم نے حکومت کی باگ ڈور سنبھالی لیکن اس وقت اگر کسی پروگرام نے مصیبت میں گھرے لاکھوں خاندانوں کو 70ارب روپے شفاف طریقے سے تقسیم کیے تو وہ بے نظیر انکم سپورٹ پروگرام ہے.یہ بات نامکمل ہوگی اگر میں یہ نہ کہوں کہ آج بھی سیلاب کی تباہ کاریاں اور انکے اثرات ہر جگہ نظر آتے ہیں اللہ تعالیٰ کرے گا کہ ہم ضرور اس قابل ہونگے کہ اپنے سیلاب زدگان کو مزید امداد ہم پہنچا سکیں.
وزیراعظم کا حوالدار لالک جان شہید نشان حیدر کو چوبیسویں یوم شہادت پر خراج عقیدت
دوسری جانب وزیراعظم شہبازشریف نے حوالدار لالک جان شہید نشان حیدر کو چوبیسویں یوم شہادت پر خراج عقیدت پیش کیا اور کہا کہ لالک جان شہید نے کارگل کی جنگ میں اپنی بے مثال جرات وبہادری سے دشمن کا مقابلہ کیا ،ناردرن لائٹ انفینٹری کے اس جانباز مجاہد نے انتہائی مشکل حالات میں مادروطن کا دفاع کرتے ہوئے جام شہادت نوش کیا ،قوم اپنے شہداءاور ان کی عظیم قربانیوں کو سلام پیش کرتی ہے ،شہداءاور غازی ہمارے سر کا تاج اور ملک وقوم کی سلامتی کا فولادی حصار ہیں ،اللہ تعالی شہداءکے درجات بلند فرمائے اور اُن کے اہل خانہ کو صبرجمیل دے۔ آمین
وزیراعظم محمد شہباز شریف کا کہنا ہے کہ رواں سال مختلف تقریبات ہوں گی ،محنتی بچوں کو لیپ ٹاپ دیئے جائیں گے –
باغی ٹی وی: وزیراعظم شہبازشریف نے کہا کہ نوجوانوں کی حوصلہ افزائی کا سلسلہ جاری رہے گا،پاکستان کی 68فیصد آبادی نوجوانوں پر مشتمل ہے ،صحت اور روز گار سے ہی پاکستان کی ترقی ہوگی-
وزیراعظم شہبازشریف نے کہا کہ یوتھ پروگرام کے ذریعے نوجوانوں کو آسان اقساط پر قرض دیئے گئے ،یوتھ پروگرام کو 10سال مکمل ہوگئے ہیں-
مخلوط حکومت نے رواں سال کو نوجوانوں کا سال قرار دیا ہے-
قبل ازیں نوجوانوں کو قرض (یوتھ لون) اسکیم کی افتتاحی تقریب سے خطاب کرتے ہوئے شہباز شریف نے کہا تھا کہ حکومت ایک لاکھ نوجوانوں میں میرٹ کی بنیاد پر مفت لیپ ٹاپ تقسیم کرے گی-
وزیراعظم نے میرٹ کے حوالے سے بتایا تھا کہ ملک بھر میں تعلیم کے شعبے میں نمایاں کارکردگی دکھانے والے نوجوانوں منتخب کر کے انہیں لیپ ٹاپ دیے جائیں گے۔
انہوں نے کہا تھا کہ نوجوانوں کو کوئی کلاشنکوف نہیں دے رہا بلکہ ہم انہیں بہتر مستقبل اور روزگار کیلیے لیپ ٹاپ دے رہے ہیں پنجاب حکومت نے پہلے جو لیپ ٹاپ دیئے وہ نوجوانوں کیلئے روزگار کا باعث بنے۔
قومی اسمبلی کی قائمہ کمیٹی برائے ریاستی و سرحدی امورنے فاٹا ہاؤس اسلام آباد پر وزارت داخلہ کے قبضے پر شدید برہمی کااظہار کرتے ہوئے وزارت داخلہ کو فاٹا ہاؤس اسلام آباد صوبہ خیبر پختونخوا کے حوالے کرنے کی ہدایت کردی۔
کمیٹی نے ایچ ای سی کو وفاق المدارس کے ساتھ مل کر دینی مدارس کے بچوں کو بھی لیپ ٹاپ دینے کے حوالے سے طریقہ کار بنانے کی ہدایت کردی ۔ قائمہ کمیٹیوں میں ارکان کی عدم دلچسپی کی وجہ سے کورم کا سنگین مسائل پید اہونا شروع ہوگئے کورم نہ ہونے کی وجہ سے سیفران کمیٹی 45منٹ تاخیر سے شروع ہوئی ۔حکام نے کمیٹی کو بتایا کہ شمالی وزیرستان کے متاثرہ دکاندارروں کو معاضہ دینے کے لیے فنڈز ہی نہیں ہیں فنڈز ملیں گے تو تقسیم کردیں گے ۔چیئرمین ایچ ای سی ڈاکٹر مختار نے کہاکہ مدارس والے بھی ہمارے بچے ہیں ان کو مین سٹریم میں لانا چاہئے، ان کے لئے لیپ ٹاپ کے لیے اگلے مالی سال میں علیحدہ پراجیکٹ بناتے ہیں۔
قومی اسمبلی کی قائمہ کمیٹی برائے ریاستی و سرحدی امور( سیفران) کااجلاس چیئرمین محمد جمال الدین کی زیرصدارت پارلیمنٹ ہاوس میں ہوا۔اجلاس کے مقرہ وقت پر صرف ایک رکن محمدافضل کھوکھر اجلاس میں آئے ۔ کورم نہ ہونے کی وجہ سے اجلاس شروع کرنے میں 45منٹ کی تاخیر ہوئی ۔ اجلاس میں سیکرٹری سیفران، ای ڈی ایچ ای سی، ایڈیشنل سیکرٹری داخلہ، کے پی کے حکام نے شرکت کی ۔پہلے ایجنڈے کے محرک محسن داوڑ کمیٹی میں آئے تو کورم نہیں تھا جس پر انہوں نے کہاکہ آدھی پارلیمنٹ باہر بیٹھی ہوئی ہے اور باقی آدھے وزیر بن گئے ہیں کمیٹی میں شرکت کے لیے کوئی نہیں بچا ہے۔ وفاقی سیکرٹری سیفران نے کمیٹی کو بتایا کہ وزیر سیفران عمرے پر گئے ہوئے ہیں جس پر چیئرمین کمیٹی جمال الدین نے کہا کہ عمرے کے پیسے ہمارے اوپر تقسیم کرتے تو زیادہ ثواب ہوتا۔اس دوران رکن آفرین خان کمیٹی میں آئے جس کے بعد 11 بج کر 15منٹ پر رکن نصیبہ چنا،چوہدری محمداشرف اور نوید عامر جیو آئے تو کورم مکمل ہوا اور اجلاس کی کارروائی شروع ہوئی اس دوران اجلاس تاخیر سے شروع کرنے پر رکن کمیٹی محمدافضل کھوکھر کمیٹی سے چلے گئے ۔
کمیٹی میں محسن داوڑ کا شمالی وزیرستان میں دہشتگردی کے خلاف جنگ کے دوران متاثر ہونے والی تاجر برادری میں فنڈز کی تقسیم کا معاملہ زیر بحث آیا۔پی ڈی ایم اے خیبرپختونخوا حکام نے بتایا کہ دکانیں تباہ ہونے والوں کو معاوضہ دینے کے لیے 6.7 ارب روپے کی درخواست بھیجی ہوئی ہے،فاٹا کے لئے 17 ارب روپے سالانہ مختص ہوتے تھے، گزشتہ سال 17 ارب مختص ہوئے لیکن12 ارب ریلیز ہوئے، اس سال وہ پیسے مختص ہی نہیں ہوئے، تو کس طرح معاوضہ دے سکتے ہیں ہمارے پاس فنڈز نہیں ہیں اس لئے معاوضوں کی ادائیگی روکی ہوئی ہے۔ایجنڈے کے محرک محسن داوڑ نے کہا کہ ہمارا ایجنڈا پیسوں کی تقسیم کے حوالے سے ہے اگر پیسے ہی نہیں تو تقسیم کے طریقہ کار پر بات کرنا وقت کا ضائع ہے اس لیے جب تک پیسے نہیں ملتے اس وقت تک یہ ایجنڈا موخر کیاجائے ۔ کمیٹی نے فنڈز نہ ہونے کی وجہ سے معاملہ موخر کردیا۔
اجلاس میں فاٹا ہاؤس اسلام آباد پر وزارت داخلہ کے قبضے سے متعلق معاملہ زیر بحث آیا ۔ایڈیشنل سیکرٹری داخلہ نے کمیٹی کوبتایاکہ فاٹا ہاوس میں ہمارے دفاتر بنے ہوئے ہیں وہاں کام ہورہا ہے ہم نے بھی فاٹا ہاوس میں 6 ملین روپے خرچ کئے ہیں فاٹا ہاوس کے حوالے سے جو کمیٹی فیصلہ کرے گی ہم اس کو مانیں گے،فاٹا ہاوس ہمارے زیر استعمال ہے ۔محسن داوڑ نے کہا کہ آپ نے 6ملین خرچ کرکے اربوں کی جائیداد پر قبضہ کرلیا ہے فاٹا کے پی کے میں ضم ہوگیا ہے تو فاٹا ہاؤس بھی کے پی کے کو دیا جانا چاہیے آپ نے بلڈنگ ہڑپ کر لی ہے، پوری بلڈنگ پر قبضہ کر لیا ہے، کس قانون کے تحت یہ عمارت آپ نے قبضے میں لی ہے کس نے لکھ کر دیا ہے کہ آپ نے اس پر قبضہ کرلیا ہے ۔صوبہ کے پی کے کے حکام نے کمیٹی کو بتایا کہ فاٹا ہاوس کا قبضہ واپس لینے کے لیے ہم نے باقاعدہ خط لکھا ہے مگر ابھی تک اس کا جواب وزارت داخلہ نے نہیں دیاہے ۔ چیئرمین کمیٹی جمال الدین نے کہاکہ آپ فاٹا ہاؤس صوبے کو واپس کریں، اسے کے پے کے ہاؤس 2 ٹو کا نام دیا جائے، آدھا اسلام آباد انہی لوگوں کے پاس ہے، ہمیں فاٹا ہاؤس واپس کریں ۔محسن داوڑ نے کہاکہ کمیٹی کی جانب سے وزارت داخلہ کو ایک خط بھی بھیجا جائے،کہ فوری طورپر فاٹاہاؤس کو واپس کیاجائے ۔کمیٹی نے وزارت داخلہ کو فاٹا ہاؤس اسلام آباد صوبہ خیبر پختونخوا کے حوالے کرنے کی ہدایت کردی ۔
دینی مدارس کے طلباء کو وزیراعظم لیپ ٹاپ اسکیم میں شامل نہ کئے جانے کا معاملہ زیر بحث آیا۔چیئرمین کمیٹی نے ایچ ای سی حکام کو کہاکہ سابقہ فاٹا اوردینی مدارس کو لیپ ٹاپ دینے کے حوالے سے بتائیں۔چیئرمین ایچ ای سی ڈاکٹر مختار احمد نے کمیٹی کو بریفنگ دیتے ہوئے کہاکہ 9500 لیپ ٹاپ پہلے بھی سابقہ فاٹا کے طلبہ کو ملے ہیں اب بھی سابقہ فاٹا کے بچوں کو ملیں گے۔دینی مدارس کا مینڈیٹ ہمارا نہیں ہے ۔ہم ان کو بھی لیپ ٹاپ دینے کے حق میں ہیں ۔مدارس کے طلبا کا ڈیٹا ایچ ای سی کے پاس نہیں ہے مدارس کے بچوں کو بھی مین سٹریم میں لایا جائے ۔اس وقت جو لیپ ٹاپس آرہے ہیں وہ پورے پاکستان کی پبلک سیکٹر یونیورسٹیوں کے لئے ہیں،ہم نے کوشش کی کہ دینی مدارس کا ڈیٹا مل جائے،ہم سپورٹ کرتے ہیں کہ ان کو بھی آن بورڈ کیا جائے،وہ ہمارے بچے ہیں ان کو مین سٹریم میں لانا چاہئے، ان کے لئے اگلے مالی سال میں علیحدہ پراجیکٹ بناتے ہیں، اس وقت سکیم صرف یونیورسٹیوں کے بچوں کے لئے ہے، میرٹ پر لیپ ٹاپس دیئے جائیں گے۔ کمیٹی نے چیئرمین ایچ ای سی کو ہدایت کی کہ وفاق المدارس کے ساتھ مل کر دینی مدارس کے بچوں کو بھی لیپ ٹاپ دینے کے حوالے سے طریقہ کار بنایا جائے ۔
