پاکستان شوبز انڈسٹری سے تعلق رکھنے والی اداکارہ ماہرہ خان نے کوئٹہ کے اسپتال میں لیڈی ڈاکٹر پر تیزاب پھینکنے کے واقعے پر برہمی کا اظہار کیا ہے۔
اداکارہ نے اپنی انسٹا اسٹوری پر لکھا کہ ایک خاتون دوسروں کی زندگیاں بچانے کیلئے گئی اور کسی نے اس کے چہرے پر تیزاب پھینک دیا میں تصور بھی نہیں کرسکتی، ڈاکٹر ماہ نور ناصر پر اسپتال میں حملہ کیا گیا، یہ وحشیانہ عمل اور برائی ہے، میں غصے سے کانپ رہی ہوں، یہ عورت مکمل حفاظت کی مستحق ہے، اس ظالم شخص نے خاتون ڈاکٹر کو تقریباً زندہ جلا دیا کیونکہ وہ سمجھتا تھا کہ اس کے پاس ایک ڈاکٹر کی زندگی کو تباہ کرنے کا حق ہے، یہ وقت صرف خواتین کے لیے ہی نہیں بلکہ مردوں کے لیے بھی ہے کہ بولیں اپنی آواز بلند کریں اور غصے کا اظہار کریں۔
واضح رہے کہ کوئٹہ کے سنڈیمن اسپتال میں ایک شخص نے لیڈی ڈاکٹر پر تیزاب پھینک دیا تھا جس وہ شدید متاثر ہوئیں،متاثرہ خاتون ڈاکٹر کو اسپتال میں ابتدائی طبی امداد فراہم کی گئی جس کے بعد انہیں علاج کے لیے نجی اسپتال منتقل کیا گیا اور پھر بہتر سہولیات اور علاج کیلئے ائیر ایمبولینس سے کراچی منتقل کیا گیا۔
اس ہولناک تیزاب گردی کے خلاف ینگ ڈاکٹرز ایسوسی ایشن (وائی ڈی اے) بلوچستان کی جانب سے کوئٹہ میں ایک بڑی احتجاجی ریلی نکالی گئی ہے، جو شہر کی مختلف شاہراہوں سے ہوتی ہوئی کوئٹہ پریس کلب کے سامنے پہنچ کر احتجاجی مظاہرے کی شکل اختیار کرگئی۔
مظاہرین نے سول ہسپتال میں سیکیورٹی کے ناقص انتظامات پر سخت برہمی کا اظہار کرتے ہوئے سیکرٹری صحت بلوچستان، ایم ایس اور سیکیورٹی انچارج سول ہسپتال کے خلاف شدید نعرے بازی کی اور ان کی فوری معطلی کا مطالبہ کیا۔