گورنر پنجاب محمد بلیغ الرحمان نے گورنر ہائوس لاہور میں سیلاب زندگان کی امداد کے لئے فلڈ ریلف فنڈ کے حوالے سے منعقدہ پریس کانفرنس سے خطاب کرتے ہوئے کہا کہ سیلاب زدگان کے لیے وفاقی حکومت اور صوبائی حکومتیں ایک ساتھ کام کر رہی ہیں۔اُنہوں نے کہا کہ سیلاب متاثرین کی مدد اور بحالی کے لیے سب کو سیاست سے بالاتر ہو کر بلا تفریق ساتھ چلنا چاہئے۔انہوں نے کہا کہ موجودہ حکومت سیلاب متاثرین کی حتی المقدور امداد فراہم کرنے کے لئے ہر ممکن اقدامات اٹھا رہی ہے۔انہوں نے کہا کہ وزیر اعظم محمد شہباز شریف نے متاثرہ علاقوں میں امدادی سرگرمیوں کو مزید تیز کرنے کی ہدایت کی ہے ۔انہوں نے کہا کہ وزیر اعظم شہباز شریف کی زیر نگرانی سیلابی ریلوں میں اپنی جانوں کی بازی ہارنے والوں کے لواحقین کو اب تک 80فیصد امدادی چیک دیئے جا چکے ہیں۔

گورنر پنجاب محمد بلیغ الرحمان نے کہا کہ اس وقت ہمارا ملک شدید بارشوں اور سیلاب کے باعث مختلف علاقوں میں تباہی اور بدحالی سے دوچار ہے ۔ انہوں نے کہا کہ صاحب ثروت افراد اور مالی وسعت رکھنے والے طبقے پر لازم ہے کہ وہ آزمائش اور مصیبت کی اس گھڑی میں اپنے بھائیوں کی بھر پور مدد کریں۔ انہوں نے کہا کہ قوموں پر مشکل وقت آتے رہتے ہیں وہی قومیں اپنی منزل حاصل کرتی ہیں جو اتحاد و یگانگت اور قوت ارادی کے ساتھ آگے بڑھتی ہیں۔انہوں نے کہا کہ مشکل کی اس گھڑی میں مخیر حضرات، فلاحی تنظیموں سمیت تمام لوگوں کو آگے آنا ہوگا اور ہم وطنوں کی بڑھ چڑھ کر مدد کرنا ہوگی۔
اس موقع پر گورنر پنجاب محمد بلیغ الرحمان نے مخیر حضرات کے سیلاب زدگان کی مدد اور بحالی کے حوالے سے کام کو سراہتے ہوئے کہا کہ کاروباری برادری نے ہمیشہ فلاح و بہبود کے کاموں میں اپنا حصہ ڈالا ہے ۔اس موقع پر گورنر پنجاب محمد بلیغ الرحمان نے 31مئی 2022سے اب تک اپنی تمام تنخواہ سیلاب متاثریں کے لئے دینے کا اعلان بھی کیا۔ انہوں نے کہا کہ بطور چانسلر انہوں نے یونیورسٹیوں کے وائس چانسلرز کو بھی ہدایت کی ہے کہ طلبا اور فیکلٹی ممبرز سیلاب زدگان کے لیے امدادی سامان اور ریلیف فنڈز اکٹھا کرنے میں کردار ادا کریں۔
گورنر پنجاب محمد بلیغ الرحمان نے آخر میں مخیر حضرات کے تعاون سے سیلاب زدگان کیلئے 14 امدادی ٹرک بھی روانہ کیے۔اس موقع پر حذیفہ رفیق اور شاہد حسن شیخ بھی موجود تھے۔
٭٭٭٭
دریں اثنا گورنر پنجاب محمد بلیغ الرحمان نے آج پبلک سیکٹر یونیورسٹیوں اور پرائیویٹ یونیورسٹیوں کو مراسلے کے ذریعے ہدایت کی ہے کہ جنوبی پنجاب اور بلوچستان کے سیلاب متاثرین کے لیے فوری فلڈ ریلیف مہم شروع کی جائے ۔انہوں نے تاکید کی ہے کہ یونیورسٹی فیکلٹی اور طلبا سیلاب متاثرین کے لیے فنڈز، کپڑے، خوراک اور ضروری سامان اکٹھا کریں۔گورنر پنجاب نے کہا کہ سیلاب متاثرین کے لیے اکٹھا کیا گیا فنڈ وزیراعظم پاکستان اور وزیراعلی پنجاب ریلف فنڈ میں جمع کرایا جائے۔انہوں نے مزید کہا کہ جامعات فنڈز اپنے ترجیحی میکنزم کے ذریعے بھی سیلاب زدگان کے لیے استعمال کر سکتی ہیں۔انہوں نے کہا کہ مشکل حالات کی اس گھڑی میں اپنے سیلاب زدگان بہن، بھائیوں کے ساتھ کھڑا ہونا ہمارا قومی فریضہ ہے۔

وزیراعلیٰ پنجاب چودھری پرویز الٰہی نے جنوبی پنجاب کے سیلاب متاثرین کی جلد بحالی کیلئے فی الفور 5 ارب روپے مختص کرنے کا اعلان کیا ہے۔ وزیراعلیٰ چودھری پرویز الٰہی نے سیلاب متاثرین کی آبادکاری کیلئے ”وزیراعلیٰ پنجاب فلڈ ریلیف فنڈ“ قائم کرنے کا بھی اعلان کیا ہے۔

عالمی اداروں کا سیلاب متاثرین کے لیے 50 کروڑ ڈالرز سے زائد فوری امداد کا اعلان

وزیراعلیٰ چودھری پرویز الٰہی نے کہا ہے کہ سیلاب متاثرین کیلئے ہرممکن وسائل فراہم کریں گے۔مخیر حضرات اپنے مشکل میں گھرے بہن بھائیوں کی مدد کیلئے آگے آئیں۔”وزیراعلیٰ پنجاب فلڈ ریلیف فنڈ“ کی پائی پائی متاثرین کی بحالی پر خرچ کی جائے گی۔

مصیبت کی اس گھڑی میں ہر سیلاب زدہ فرد تک پہنچنا ہے۔ آرمی چیف

وزیراعلیٰ چودھری پرویز الٰہی سے وزیراعلیٰ آفس میں صوبائی وزراء اور ارکان صوبائی اسمبلی نے ملاقات کی۔سابق وفاقی وزیر مونس الٰہی اور پرنسپل سیکرٹری وزیراعلیٰ محمد خان بھٹی بھی اس موقع پرموجود تھے۔ وزیراعلیٰ چودھری پرویز الٰہی نے اس موقع پر گفتگو کرتے ہوئے کہا کہ پنجاب حکومت کی پوری مشینری مصیبت میں گھرے بہن بھائیوں کی مدد میں مصروف ہے۔

وفاقی کابینہ کے ارکان نے ایک ماہ کی تنخواہ سیلاب متاثرین کے لیے عطیہ کردی

انہوں نے کہا کہ میری ہدایت پر چیف سیکرٹری پنجاب کامران افضل متاثرہ علاقوں میں خود امدادی سرگرمیوں کا جائزہ لے رہے ہیں۔ انہوں نے کہا کہ تونسہ، ڈی جی خان اور راجن پور میں ہونے والے جانی و مالی نقصانات پر دلی دکھ اور افسوس ہے۔ سیلاب سے ہونے والی تباہی کو الفاظ میں بیان کرنا ممکن نہیں۔جو کچھ انسانی بس میں ہوا، آزمائش کی اس گھڑی میں اپنے بہن بھائیوں کیلئے کر گزریں گے۔انہوں نے کہا کہ میں نے نقصانات کے ازالے کیلئے سروے کا حکم دے دیا ہے۔ سیلاب متاثرین کی بحالی حکومت پنجاب کی پہلی ترجیح ہے۔

پنجاب حکومت مشکل کی گھڑی میں متاثرین کے ساتھ کھڑی ہے اور متاثرین کی دوبارہ آبادکاری تک چین سے نہیں بیٹھیں گے۔سیلاب سے متاثرہ ہر فرد کو اس کا حق دیا جائے گا اور انشاء اللہ قوم کی تائید و حمایت سے اس چیلنج سے بھی سرخرو ہو کر نکلیں گے۔ وزیراعلیٰ چودھری پرویز الٰہی نے کہا کہ امدادی سرگرمیوں اور بحالی کے کاموں میں پاک فوج کا تعاون لائق تحسین ہے۔ ریسکیو اینڈ ریلیف کے حوالے سے پاک فوج کے کردار کو سراہتے ہیں۔پاک فوج قابل فخر ادارہ ہے جو ناگہانی صورتحال سے دوچار لوگوں کی مدد میں بھی پیش پیش ہے۔فوجی جوان سول انتظامیہ کے ساتھ مل کر امدادی سرگرمیوں اور بحالی کے آپریشن میں حصہ لے رہے ہیں۔

انہوں نے کہا کہ زلزلہ ہو یا سیلاب یا کوئی اور ناگہانی آفت، پاک فوج ہر آزمائش کی گھڑی میں قوم کی توقعات پر پورا اتری ہے۔پاک فوج کے دستوں نے لوگوں کی بروقت مدد کی اور محفوظ انخلاء کو یقینی بنایاجس پر کورکمانڈر ملتان کا تہہ دل سے مشکور ہوں۔پاک فوج کے تعاون سے کئی قیمتی جانوں کو پچاناممکن ہوا۔ وزیراعلیٰ سے ملاقات کرنے والوں میں غضنفر عباس چھینہ،شہاب الدین خان، محمد عامر عنایت شاہانی،غضنفر عباس شاہ، غلام علی اصغر خان لہری،گلریز افضل گوندل،تیمور علی لالی، سردار محمد محی الدین خان کھوسہ، محمد علی رضا خان خاکوانی، محمد اعجاز حسین اور محمد احسن جہانگیرشامل تھے۔

قومی احتساب بیورو (نیب)،لاہور میں چیک تقسیم کرنیکی دوسری تقریب کا اہتمام کیا گیا۔ تقریب میں ٹویوٹا گوجرانوالہ موٹرز، ہوم لینڈ رئیل اسٹیٹ اور لینڈ ایکوزیشن کلکٹر میاں عبدالرؤف و دیگر کیخلاف مقدمات میں ملزمان سے برآمد کروائی گئی 36 کروڑ 71 لاکھ مالیت پر مشتمل رقوم کے چیک تقسیم کئے گئے۔ نیب لاہور کے ڈائریکٹر انویسٹی گیشن سید حسنین احمد نے تقریب میں مہمانِ خصوصی کے طور پر شرکت کی۔

تقریب میں متاثرین سے خطاب کے دوران نیب لاہور کے ڈائریکٹرسید حسنین احمد نے کہاکہ نیب لاہور نے گوجرانوالہ موٹرز کرپشن کیس میں ملزمان سے ڈیڑھ ارب (1.5 بلین) کی پلی بارگین کی ہے جبکہ اس رقم میں سے 1 ارب 21 کروڑ روپے متعلقہ متاثرین میں تقسیم بھی کئے جا چکے ہیں اسکے علاوہ ہوم لینڈ رئیل اسٹیٹ سکینڈل کیس میں نیب لاہور کیجانب سے 8 کروڑ 46 لاکھ روپے کی پلی بارگین کی گئی جو کہ مکمل رقم آج کی تقریب کے ذریعے متاثرین کو واپس لوٹائی جا رہی ہے۔

ڈائریکٹر نیب کا کہنا تھا کہ نیب کی اعلی قیادت کی جانب سے واضح ہدایات ہیں کہ کرپشن کیسز میں ملوث بدعنوان عناصر سے فوری ریکوری کو یقینی بنایا جائے جبکہ نیب لاہور نے عوام کو منافع کا لالچ دے کر لوٹ مار کرنے والے عناصر کیخلاف درج مقدمات کو ترجیحی بنیادوں پر حل کرنے کا عزم کر رکھا ہے۔

سید حسنین احمد نے مزیدکہا کہ عوام سے دھوکہ دہی کے مقدمات میں مخصوص طبقہ کو ٹارگٹ کئے جانے کے شواہد حاصل ہوئے ہیں تاہم نیب آفیسران عوام کے مفادات کے تحفظ کو یقینی بنانے کیلئے سر توڑ کوششیں جاری رکھے ہوئے ہیں۔ اس ضمن میں حال ہی میں نیب لاہور کیجانب سے تاریخ کی سب سے بڑی 16 ارب مالیت کی پلی بارگین بھی کی گئی ہے تاکہ متاثرین کو ان کے نقصان کا ازالہ کروایا جا سکے۔ انہوں نے مزید کہا کہ نیب کی حقیقی کامیابی ملزمان سے لوٹی گئی مکمل رقوم کی برآمدگی اور ملزمان کو کیفرِ کردار تک پہنچانا ہے۔

تقریب کے اختتام پر مہمانِ خصوصی ڈائریکٹرسید حسنین احمد نے 728متاثرین میں مجموعی طور پر 36کروڑ 71 لاکھ مالیت کے چیک تقسیم کئے تاہم متاثرین کیجانب سے ڈائریکٹر جنرل نیب لاہور کی سربراہی میں لاہور ریجن کی کارکردگی اور اعلی اقدامات کو بھرپورسراہا گیا.