اداکار محب مرزا اور صنم سعید کی رومانٹک کامیڈی ایکشن فلم "عشرت میڈ ان چائنا” کو پاکستان بھر کے سینماؤں میں پیش کردیا گیا۔
باگی ٹی وی ن: "عشرت میڈ ان چائنا” محب مرزا کے 2006 کے مقبول کامیڈی ڈرامے”عشرت باجی” کا تسلسل ہے اور مذکورہ فلم میں جہاں انہوں نے ہدایت کاری کی دنیا میں بھی قدم رکھا ہے فلم کی شوٹنگ چین کے بجائے تھائی لینڈ میں کی گئی ہے اور ابتدائی طور پر فلم کو 2021 میں ہی ریلیز کیا جانا تھا مگر کورونا کے باعث اس کی ریلیز تاخیر کا شکار ہوئی۔
فلم کا پریمیئر 3 مارچ کو کراچی میں منعقد کیا گیا تھا، جس میں متعدد شوبز شخصیات سمیت میڈیا سے وابستہ افراد نے بھی شرکت کی تھی۔
احسن رضا فردوسی کی لکھی گئی فلم میں اسسٹنٹ ڈائریکٹرز کی حیثیت سے محب مرزا کا ساتھ تحسین خان اور پرمیش ادیوال نے بھی دیا ہے۔
"عشرت میڈ ان چائنا” سے فلمی کیریئر کا آغاز کرنے والے فیشن ڈیزائنر حسن شہریار یاسین (ایچ ایس وائے) نے اس میں منفی کردار ادا کیا ہے اور ان کے کردار کو بہت سراہا جا رہا ہے فلم میں ’عشرت‘ کا مرکزی کردار محب مرزا نے ادا کیا ہے جب کہ صنم سعید نے ان کی محبت ’اختر‘ کا کردار ادا کیا ہے۔
فلم میں نہ صرف ایکشن اور رومانس کو دکھایا گیا ہے بلکہ اس میں کامیڈی اور مصالحے کو بھی شامل کیا گیا ہے فلم کی کاسٹ میں صنم سعید، سارہ لورین، شمعون عباسی، علی کاظمی، مانی، شبیر جان، نیر اعجاز، امام سید اور مصطفیٰ چوہدری شامل ہیں۔
انڈپینڈنٹ اردو کو دیئے گئے انٹرویو میں محب مرزا نے اسے ’پیسہ وصول‘ فلم کہا، جسے دیکھ کر شائقین بہت خوش ہوں گے یہ فلم عشرت کے زندگی کے سفر اور چین میں اس کی کایا پلٹنے پر مشتمل ہے۔
محب مرزا نے کہا کہ یہ فلم تفریح سے بھرپور ہے، شاید آپ کو کچھ چیزیں سمجھنے کے لیے اسے دوبارہ دیکھنا پڑے۔ اس میں ڈسکس کرنے کے لیے بہت چیزیں ہیں اپنی فلم کو نوجوانوں کے لیے ہنسی مزاح، موسیقی اور ایکشن سے بھرپور قرار دیتے ہوئے محب مرزا نے کہا کہ ’پاکستان میں ایسا ایکشن اس سے پہلے کبھی نہیں دیکھا گیا ہوگا۔
فلم کی مرکزی کرادر صنم سعید نے کہا کہ یہ لفظوں اور ناموں سے کھیلنے کی ایک کوشش ہے۔ فلم میں ہیرو کا نام عشرت ہے تو ہیروئن کا نام اختر رکھا گیا۔ یہ مزاحیہ تھا پرانے زمانے میں ایسے نام ہوا کرتے تھے۔میری آنٹی کا نام اختر ہے۔ میری دادی کا نام جمال تھا ساتھ ہی انہوں نے مشہور گلوکارہ اقبال بانو کا بھی نام لیا کہا کہ پرانے زمانے میں یہ نام عام تھے اور امید ہے کہ اب بھی لوگوں کو یہ یاد آئے گا اور لڑکیوں کے ایسے نام رکھے جائیں گے۔
اداکارہ نے بتایا کہ چونکہ اس فلم کا سکرپٹ، ہدایت کار اور کاسٹ اچھی تھی تو اسی وجہ سے انہوں نے اس میں کام کرنے کی حامی بھری صنم سعید نے اپنے کردار کو ناظرین کے لیے ’شاکنگ‘ قرار دیتے ہوئے کہا کہ سکرین پر میں نے اس طرح کا کردار پہلے کبھی نہیں کیا۔
اداکارہ نے کہا کہ ناظرین کے لیے یہ شاک ویلیو ہوگی، کیونکہ میں چاہتی ہوں کہ لوگ یہ دیکھ سکیں کہ میں ہر قسم کا کردار کرسکتی ہوں اور کرنا چاہتی ہوں اختر‘ ایک چلبلی، پُر اعتماد، مزیدار اور شوقین مزاج لڑکی ہے میرے پہلے کے کردار تھوڑے سے سنجیدہ اور سیدھے سادھے تھے، تو یہ جو تھوڑا سا الگ کام ہے، مجھے اسے کرنے میں بہت مزا آیا اور امید ہے کہ لوگوں کو یہ پسند آئے گا۔
