پشاور: دُھند اور حد نگاہ کم ہونے کے باعث بند کی گئی پشاور سے برہان تک بند کی گئی موٹروے آمدورفت کیلئے کھول دی گئی۔
باغی ٹی وی: ترجمان موٹروے پولیس کے مطابق دھند کی وجہ سے آج صبح پشاور سے برھان تک موٹروے پر ٹریفک کا داخلہ بند کردیا گیا تھا حد نگاہ بہتر ہونے پر موٹروے پشاور سے برہان تک کھول دی گئی ہے،شہریوں کو دھند کے اوقات میں غیر ضروری سفر کرنے سے بھی گریز کرنے کا کہا گیا ہے ساتھ ہی دوران سفر گاڑیوں میں فوگ لائٹس کا استعمال کرنے کی بھی ہدایت کی گئی ہے۔
دوسری جانب نیشنل ہائی وے و موٹروے پولیس کی جانب سے 15 نومبر سے ملک کی تمام موٹریز و قومی شاہراہوں پر اوور لوڈنگ کرنے والی گاڑیوں کے خلاف سخت قانونی کارروائی کرنے کا فیصلہ کیا گیا ہے ،اس حوالے سے اعلی حکام کا ایک اجلاس ہوا جس میں فیصلہ کیا گیا کہ موٹرویز و ہائی ویز پر اوولوڈنگ پر قابو پانے کیلئے صوبائی حکومتوں کے تعاون سے 100فیصد ایکسل لوڈ کنٹرول رجیم پر مکمل عمل درآمد کو ہر صورت میں یقینی بنایا جائے گا اور اس میں کسی قسم کی کوئی رعایت نہیں دی جائے گی۔
سیکرٹری مواصلات شیر عالم محسود نے نیشنل ہائی وے اتھارٹی اور نیشنل ہائی ویز اینڈ موٹروے پولیس کے اعلی حکام کو ہدایات جاری کرتے ہوئے کہا کہ ایکسل لوڈ کنٹرول ایک قومی مسئلہ ہے جس کیلئے تمام اسٹیک ہولڈرز کو مل کر کام کرنا ہوگا ،اوور لوڈنگ کی وجہ سے ہماری شاہراہیں بہت کم عرصے میں تباہ ہو جاتی ہیں جس کی وجہ سے قومی خزانے کو اربوں روپے کا نقصان برداشت کر نا پڑرہا ہے۔
واضح رہے کہ نیشنل ہائی وے اتھارٹی (این ایچ اے) کے مطابق موٹر ویز پر ایم ٹیگ لگانا لازمی قرار دیا گیا ہے بصورت دیگر گاڑیوں کو جرمانہ ادا کرنا پڑے گا 31 دسمبر 2023 کے بعد ایم ٹیگ کے بغیر موٹر ویز پر گاڑیوں کا داخلہ ممنوع ہوگا-
