خیبر پختونخوا کے صوبائی وزیر تعلیم وبلدیات مینا خان آفریدی کو پشاور ایئرپورٹ پر بیرون ملک جانے سے روک دیا گیا ہے۔
خیبرپختونخوا کے وزیر برائے اعلی تعلیم وبلدیات میناخان آفریدی کو ایف آئی اے حکام نے پشاور ائیرپورٹ سے بیرون ملک جانے سے روک دیا میناخان جرمنی میں ایک یونیورسٹی کی تقریب میں شرکت کےلئے جارہے تھے،میناخان آفریدی کو پشاورباچا خان انٹرنیشنل ائیرپورٹ سے ایف آئی اے حکام نے اس وقت بیرون ملک جانےسےروکا جبکہ وہ ابوظہبی کے لئے روانہ ہورہے تھے میناخان آفریدی کی ابوظہبی سے جرمنی پروازشیڈول تھی، وہ جرمنی کی ایک یونیورسٹی کی تقریب میں شرکت کے لئے جا رہے تھے انہیں ایف آئی اے حکام نے امیگریشن سے پہلے ہی روکا۔
صوبائی وزیر نے ایکس پر بتایا کہ پشاور ہائیکورٹ کی واضح اجازت کے باوجود انہیں ایف آئی اے امیگریشن نے فلائٹ پر سوار ہونے سے روکا وہ جرمن یونیورسٹی کی خصوصی دعوت پر بیرون ملک جا رہے تھے، جہاں دورے کے دوران کئی اہم سرکاری و تعلیمی معاملات طے کیے جانے تھے۔
واضح رہے کہ پشاور ہائیکورٹ نے ایک کیس کی سماعت کے دوران صوبائی وزیر مینا خان کو اپنے سرکاری فرائض کے سلسلے میں بیرون ملک دورے کی اجازت دے رکھی تھی، دو روز قبل جاری کیے گئے عدالتی حکم نامے میں کہا گیا تھا کہ مینا خان کا نام پی این آئی ایل میں شامل ہے، انصاف کے تقاضوں کو پورا کرتے ہوئے ان کو جرمنی میں تقریب میں شرکت کی اجازت دی جاتی ہے، درخواست گزار یونیورسٹی تقریب میں شرکت کے بعد 16 جون کو واپس آ ئیں گے، ایف آئی اے عارضی طور پر درخواست گزار کا نام لسٹ سے نکال دے۔