میکسیکو میں سابق ملکہ حسن کیرولائنا فلورس گومیز کو مبینہ طور پر ان کی ساس نے گولی مار کر ہلاک کر دیا۔
بین الاقوامی میڈیا رپورٹس کے مطابق یہ واقعہ 15 اپریل کو میکسیکو سٹی کے پوش علاقے پولانکو میں پیش آیا واقعے کی ویڈیو میں دکھایا گیا ہے کہ 27 سالہ کیرولائنا اپنے گھر میں موجود تھیں جب ان کی ساس اچانک ان کے پیچھے آئیں اور فائرنگ کر دی۔
رپورٹس کے مطابق جب مقتولہ کا شوہر اپنے بچے کو گود میں اٹھائے کمرے سے باہر آیا تو ملزمہ نے کہا کہ اس نے مجھے غصہ دلایا، اس پر شوہر نے جواب دیا کہ وہ میرا خاندان ہے، جس کے جواب میں ساس نے مبینہ طور پر کہا کہ تم میرے ہو، اس عورت نے تمہیں مجھ سے دور کر دیا ہے۔
پولیس کے مطابق واقعے کے بعد ملزمہ موقع سے فرار ہو گئی، جس کی تلاش جاری ہے حکام اس پہلو کی بھی تحقیقات کر رہے ہیں کہ آیا مقتولہ کے شوہر کا اس واقعے میں کسی قسم کا کردار یا معاونت شامل تھی یا نہیں۔
واضح رہے کہ کیرولائنا فلورس گومیز نے 2017 میں مس ٹین یونیورس باخا کیلیفورنیا کا ٹائٹل جیتا تھا وہ سوشل میڈیا پر بطور کانٹینٹ کریئیٹر بھی سرگرم تھیں اور حال ہی میں ایک بچے کی ماں بنی تھیں۔
