قومی عدالتی پالیسی ساز کمیٹی نے اپنے 61ویں اجلاس میں نیشنل جوڈیشل ریفارم فریم ورک کی اصولی منظوری دے دی ہے-
سپریم کورٹ کی جانب سے جاری اعلامیے کے مطابق نیشنل جوڈیشل ریفارم فریم ورک کو ورلڈ جسٹس پراجیکٹ رول آف لا انڈیکس سے ہم آہنگ کیا گیا ہے، جس کا مقصد پاکستان میں شواہد پر مبنی عدالتی اصلاحات کو فروغ دینا، انصاف تک رسائی، شفافیت اور عدالتی نظام کی پیش گوئی کی صلاحیت کو مزید مضبوط بنانا ہے۔
چیف جسٹس آف پاکستان کی زیرِ صدارت قومی عدالتی پالیسی ساز کمیٹی کا اجلاس سپریم کورٹ میں منعقد ہوا، جس میں ملک بھر کی ہائی کورٹس کے چیف جسٹس صاحبان، وفاقی وزیر قانون و انصاف، سیکریٹری وزارتِ قانون و انصاف، پاکستان بار کونسل اور سپریم کورٹ بار ایسوسی ایشن کے نمائندوں نے شرکت کی۔
کمیٹی نے فیصلہ کیا کہ ہائیکورٹس نیشنل جوڈیشل ریفارم فریم ورک اور انٹرنیشنل فریم ورک فار کورٹ ایکسیلنس کی سیلف اسیسمنٹ چیک لسٹ اختیار کر سکیں گی، جبکہ اصلاحاتی اقدامات کی پیش رفت کا سہ ماہی جائزہ لینے اور مؤثر رپورٹنگ کا نظام بھی قائم کیا جائے گا۔
اعلامیے کے مطابق لا اینڈ جسٹس کمیشن آف پاکستان اور وزارتِ قانون و انصاف فریم ورک پر عمل درآمد کے لیے خصوصی سیل قائم کریں گے، لا اینڈ جسٹس کمیشن سیکریٹریٹ رول آف لا سے متعلق اشاریوں کی نشاندہی اور توثیق کرے گا، جنہیں مرحلہ وار نیشنل جوڈیشل اینالیٹکس ڈیش بورڈ میں شامل کیا جائے گا۔
اس مقصد کے لیے نیشنل انفارمیشن ٹیکنالوجی بورڈ کے تعاون سے ایک خصوصی ٹیکنالوجی پلیٹ فارم بھی تیار کیا جائے گا، جس کے ذریعے اصلاحات کی پیشرفت کی نگرانی اور باقاعدہ رپورٹس مرتب کی جائیں گی،سیکریٹریٹ عدالتی شعبے میں استعدادِ کار بڑھانے کے اقدامات کو بھی مربوط کرے گا۔
کمیٹی نے فیصلہ کیا کہ فریم ورک پر عمل درآمد سے متعلق پیش رفت کا جائزہ 8 اکتوبر 2026 کو ہونے والے آئندہ اجلاس میں لیا جائے گا، جبکہ پاکستان کی ورلڈ جسٹس پروجیکٹ رول آف لا انڈیکس میں سالانہ کارکردگی کا بھی باقاعدہ جائزہ لیا جائے گا، جس میں ادارہ جاتی مضبوطیوں، خامیوں اور مزید اصلاحات کے لیے سفارشات شامل ہوں گی۔
قومی عدالتی پالیسی ساز کمیٹی نے اس عزم کا اظہار کیا کہ عدالتی اصلاحات کو شواہد، قابلِ پیمائش نتائج اور بین الاقوامی معیارات کی بنیاد پر آگے بڑھایا جائے گا، جس سے ادارہ جاتی کارکردگی اور عوامی اعتماد میں مزید اضافہ ہوگا جدت، شواہد پر مبنی طرزِ حکمرانی اور جدید ٹیکنالوجی کے استعمال سے نظامِ انصاف کو مزید مؤثر بنایا جائے گا۔
اجلاس میں جبری گمشدگیوں سے متعلق مجوزہ کمیشن پر پیش رفت کا بھی جائزہ لیا گیا، کمیٹی نے اس ضمن میں حکومت کے اقدامات کو سراہاوفاقی وزیر قانون و انصاف نے کمیٹی کو بریفنگ دیتے ہوئے بتایا کہ کمیشن کی سربراہی کے لیے سپریم کورٹ کے سابق ججز کے نام زیرِ غور ہیں اور کمیشن کی تشکیل اور قواعدِ کار جلد مکمل کر لیے جائیں گے۔