قصور میں بجلی کی بدترین لوڈشیڈنگ، شہری سراپا احتجاج، قصور رائیونڈ روڈ بند رہا
تفصیلات کے مطابق لیسکو واپڈا قصور کی مبینہ غفلت اور بجلی کی طویل بندش کے باعث قصور میں شہریوں کے مسائل میں شدید اضافہ ہوگیا ہے، جبکہ بجلی کی عدم فراہمی پر احتجاج کے باعث امن و امان کی صورتحال بھی متاثر ہونے لگی ہے
ذرائع کے مطابق گزشتہ کئی روز سے بجلی کی طویل بندش سے تنگ مقامی افراد نے بطور احتجاج قصور رائیونڈ روڈ کو کل شام موضع نول اور موضع اٹھیل پور کے مقامات پر بند کردیا جس کے باعث ٹریفک کی روانی متاثر ہوئی۔ ضلعی انتظامیہ کی جانب سے بجلی کی فراہمی اور مسائل کے حل کی یقین دہانی کے بعد مظاہرین نے احتجاج ختم کرکے سڑک کو ٹریفک کے لیے بحال کردیا
دوسری جانب بابا بلھے شاہ ہسپتال قصور میں بھی بجلی کی فراہمی کے حوالے سے شدید مسائل کی اطلاعات سامنے آئی ہیں، جس کے باعث مریضوں اور ان کے لواحقین کو مشکلات کا سامنا کرنا پڑا
شہریوں کا کہنا ہے کہ قصور کے مختلف علاقوں، خصوصاً دیہی علاقوں میں لوڈشیڈنگ ناقابلِ برداشت حد تک بڑھ چکی ہے۔ بجلی کے ٹرانسفارمر جلنے کی صورت میں بھی شہریوں کو مبینہ طور پر مرمت اور تبدیلی کے لیے اضافی رقم ادا کرنا پڑتی ہے، جبکہ دوسری جانب بھاری بجلی کے بل بھی وصول کیے جا رہے ہیں
مقامی افراد نے مطالبہ کیا ہے کہ لیسکو حکام قصور میں بجلی کی غیر اعلانیہ اور طویل لوڈشیڈنگ کا فوری نوٹس لیں، ٹرانسفارمرز کی خرابی اور بجلی کی فراہمی سے متعلق شکایات کا فوری ازالہ کیا جائے اور صارفین کو مبینہ اضافی ادائیگیوں سے نجات دلائی جائے
شہریوں نے خبردار کیا ہے کہ اگر بجلی کی صورتحال فوری طور پر بہتر نہ کی گئی تو عوام بڑے احتجاج پر مجبور ہوسکتے ہیں، جس سے علاقے میں امن و امان کی صورتحال مزید خراب ہونے کا خدشہ ہے
عوامی حلقوں نے ضلعی انتظامیہ اور اعلیٰ لیسکو حکام سے مطالبہ کیا ہے کہ لیسکو واپڈا قصور کی کارکردگی کا فوری نوٹس لیتے ہوئے بجلی کی فراہمی یقینی بنائی جائے اور شہریوں کے مسائل ترجیحی بنیادوں پر حل کیے جائیں
