جوہانسبرگ: پاکستان اور جنوبی افریقا کے درمیان تین ایک روزہ میچز کی سیریز کا آخری میچ اتوار کو کھیلا گیا جہاں اسٹیڈیم میں دو غیر معمولی مگر خوشگوار واقعات ہوئے –
باغی ٹی وی : جوہانسبرگ میں کھیلے گئے میچ میں پاکستان نے میزبان ٹیم کو ڈک ورتھ لوئس میتھڈ کے تحت 36 رنز سے شکست دی، وینڈیررز اسٹیڈیم میں کھیلا گیا یہ میچ صرف میچ نہیں بلکہ زندگی، محبت اور کرکٹ کا جشن بن گیا –
اسٹیڈیم میں ایک تماشائی خاتون نے بچے کو جنم دیا، میچ دیکھنے والے جوڑے کے ہاں بیٹے کی پیدائش ہوئی جس کا اعلان اسکور بورڈ پر کیا گیا،اسکور بورڈ پر لکھا تھا ‘مسٹر اینڈ مسز رابینگ کو صحت مند بچے کی پیدائش پر مبارک ہو’۔
دوسری جانب ایک تماشائی نے اسٹیڈیم میں ہی ایک لڑکی کو شادی کی پیشکش کی جسے اس نے قبول کرلیا۔
دونوں کی تصویریں سوشل میڈیا پر گردش کر رہی ہیں صارفین دنیا بھر سے جوڑے اور دنیا میں آنے والے بچے کے لیے نیک خواہشات کا اظہار کررہے ہیں۔
واضح رہے کہ گزشتہ روز پاکستان کرکٹ ٹیم نے جنوبی افریقہ کی سرزمین پر نئی تاریخ رقم کرتے ہوئے میزبان ملک کو پہلی مرتبہ ون ڈے سیریز میں وائٹ واش کیا تھاسیریز کے تیسرے اور آخری ون ڈے میچ میں پاکستان نے جنوبی افریقا کو 36 رنز سے شکست دے کر یہ تاریخی کارنامہ انجام دیا۔
آخری ون ڈے میں قومی ٹیم کی جیت میں اوپنر صائم ایوب نے اہم کردار ادا کیا اور 91 گیندوں پر 101 رنز کی اننگز کھیلی، شاندار کارکردگی پر انہیں میچ کا بہترین کھلاڑی قرار دیا گیا۔
