سینئر وزیر سندھ اور پیپلز پارٹی سندھ کے سیکریٹری اطلاعات شرجیل انعام میمن نے کہا ہے کہ پیپلز پارٹی کی صوبائی حکومت عوامی خدمت اور ترقیاتی کاموں کے میدان میں اپنی روایت کو مزید آگے بڑھا رہی ہے اور سندھ کے ہر ضلع میں ترقیاتی منصوبوں کا جال بچھا دیا گیا ہے۔
حیدرآباد میں پیپلز پارٹی سندھ کے انفارمیشن ونگ کے اجلاس کی صدارت کرتے ہوئے شرجیل میمن نے کہا کہ صحت کے شعبے میں این آئی سی وی ڈی کا نیٹ ورک صوبے بھر میں قائم ہے جہاں دل کے امراض کا علاج مفت فراہم کیا جاتا ہے، جبکہ سائبر نائف جیسا مہنگا علاج بھی حکومت سندھ کی جانب سے بلا معاوضہ فراہم کیا جا رہا ہے۔انہوں نے بتایا کہ جناح اسپتال اور نیشنل انسٹیٹیوٹ آف چائلڈ ہیلتھ میں جدید سہولتیں فراہم کی گئی ہیں، جبکہ تعلیم کے شعبے میں نئے اسکول، کالجز اور یونیورسٹیز قائم کرنے کے ساتھ ساتھ موجودہ اداروں کو اپ گریڈ کیا جا رہا ہے۔
سینئر وزیر نے کہا کہ ٹرانسپورٹ کے میدان میں پیپلز بس، پنک بس اور الیکٹرک بسیں شہریوں کو جدید اور آرام دہ سہولتیں فراہم کر رہی ہیں۔ توانائی کے شعبے میں ہوا سے بجلی بنانے کے منصوبے اور تھر کول پراجیکٹ سندھ کی ترقی کے ضامن ہیں۔انہوں نے مزید کہا کہ سیلاب کے دوران متاثرہ خاندانوں کو مالی امداد، خیمے، خوراک اور علاج فراہم کیے گئے، جبکہ سندھ پیپلز ہاؤسنگ فاؤنڈیشن کے ذریعے 21 لاکھ گھر تعمیر کیے جا رہے ہیں اور 2 لاکھ سے زائد خاندانوں کو سولر سسٹم مہیا کیا جا رہا ہے۔
شرجیل میمن کے مطابق تمام اقدامات شفافیت کے ساتھ اور عوامی مفاد کو مدنظر رکھتے ہوئے کیے جا رہے ہیں۔اس موقع پر رکن قومی اسمبلی شرمیلا فاروقی نے کہا کہ پیپلز پارٹی کے کارکن ایک خاندان ہیں اور پارٹی کا پیغام دلیل اور شائستگی پر مبنی ہونا چاہیے۔
ملک بھر میں آٹے کی قیمتوں میں اضافہ
سندھ حکومت کا روڈ کٹنگ فنڈز کی تحقیقات کا فیصلہ، اخراجات زیرِ سوال
کسانوں پر 7 ارب روپے کا اضافی بوجھ ڈالا گیا، آڈٹ رپورٹ میں انکشاف
