کراچی :سندھ کے شوگر ملز مالکان نے چینی برآمد کرنے کی اجازت دینے کا مطالبہ کردیا۔اطلاعات کے مطابق آئندہ سیزن میں گنے کی قیمت مقرر کرنے اور کرشنگ سیزن شروع کرنے سے متعلق منگل کو سندھ شگر کین بورڈ کا اجلاس ہوا جس کی صدارت مشیر زراعت منظور وسان نے کی۔
اجلاس میں سیکرٹری زراعت اعجاز مہسر،ڈی جی زراعت، سندھ آباد گار بورڈ،سندھ چیمبر آف ایگری کلچر اور پاکستان شوگر ملز ایسوسی ایشن سندھ زون کے عہدیداروں نے بھی شرکت کی۔
اجلاس میں کاشتکاروں کا کہنا تھا کہ سیلاب کے بعد گنے کی واحد فصل ہے جو بچ گئی ہے کاشتکاروں کو اس کی اچھی قیمت دینے کے لئے گنے کی امدادی قیمت 320 تا 330 روپے مقرر کی جائے جب کہ شوگر ملز مالکان کا کہنا تھا کہ ملک بھر میں گنے کی یکساں امدادی قیمت ہونی چاہیے ہر صوبے میں مختلف امدادی قیمت سے شوگر ملز کو مشکلات کا سامنا کرنا پڑتا ہے۔
شوگر ملز مالکان نے مشیر زراعت پر زور دیا کہ وہ وفاق سے چینی ایکسپورٹ کرنے کی اجازت دینے کے لئے بات کرے کیونکہ ان کے پاس اضافی چینی کے اسٹاک موجود ہے جب کہ اضافی اسٹاک برآمد کرنے کی اجازت نہیں دی جاتی شوگر ملز گنے کی خریداری شروع نہیں کرسکیں گے۔
صوبائی مشیر زراعت منظور وسان نے کاشتکاروں کو یقین دہانی کرائی کہ سندھ نے گزشتہ سال بھی گنے کی اچھی امدادی قیمت مقرر کی تھی اس سال بھی کسانوں کو سپورٹ کیا جائے گا۔ انہوں نے کہا کہ سندھ میں قانون کے مطابق 30 نومبر تک کرشنگ شروع ہوتی ہے کوشش ہے کہ جلد از جلد صوبے میں شوگر ملیں چلائی جائیں۔
شوگر ملز ذرائع کا کہنا ہے کہ ملک بھر میں اس وقت مقامی ضرورت سے 12 لاکھ ٹن اضافی چینی کے اسٹاک موجود ہیں حکومت چینی اضافی چینی برآمد کرنے کی اجازت دے تاکہ شوگر ملز کو نقصان نہ ہوا جب کہ چینی برآمد سے ملک کو قیمتی زرمبادلہ حاصل ہوسکے گا۔
دوسری جانب چیئرمین پاکستان سیریلز ایسوسی ایشن مزمل رؤف چیپل نے سماء ڈیجٹل کو رابطہ کرنے پر بتایا کہ ملک میں سیلاب کے نتیجے میں گنے کی فصل کو کتنا نقصان پہنچا ہے؟ ابھی تک درست اندازہ سامنے نہیں آیا انہوں نے تجویز دی کہ جب تک پوری گنے کی پیداوار سامنے نہیں آجاتی اس وقت تک چینی برآمد کرنے کی اجازت نہ دی جائے ایسا نہ ہو کہ پیداوار کم ہو نے کی وجہ سے ہمیں پھر چینی امپورٹ کرنی پڑی۔
