کراچی کے علاقے منگھو پیر مہران سٹی میں ڈکیتی مزاحمت پر مسلح افراد کی فائرنگ سے 15 سالہ نوجوان روشم جاں بحق ہو گیا۔
تفصیلات کے مطابق منگھو پیر کے علاقے اجتماع گاہ کے قریب مہران سٹی بلاک 6 گھر میں ڈکیتی کی واردات کے دوران ڈاکوؤں کی فائرنگ سے ایک نوجوان لڑکا جاں بحق ہوگیا، مقتول کی لاش ایدھی ایمبولینس کے ذریعے عباسی شہید اسپتال منتقل کی گئی۔
ترجمان کراچی پولیس کے مطابق مقتول کی شناخت 17 سالہ روشم ولد ڈاکٹر روئداد خان کے نام سے کی گئی، مقتول کے والد نے میڈیا سے گفتگو کرتے ہوئے بتایا کہ مقتول 8 بہنوں میں سب سے بڑا تھا ،روشم نے حال ہی میں میٹرک کیا اور پوزیشن ہولڈر تھا۔
مقتول کے والد کے مطابق 6 مسلح ڈاکو گھر میں داخل ہوئے جن میں سے 2 نے پولیس کی وردی پہن رکھی تھی،نقاب پوش ڈاکوؤں کو دیکھ کر انہوں نے اپنا لائسنس یافتہ پستول نکالا اور باہر کی جانب آرہے تھے کہ اسی دوران دوسرے کمرے سے ان کا بیٹا باہر آگیا، بیٹے کو اور ان کے ہاتھ میں پستول دیکھ کر پو لیس وردی میں ملبوس ڈاکوؤں نے اندھا دھند فائرنگ کردی جس کے نتیجے میں ایک گولی روشم کے سینے پر لگی اور وہ موقع پر ہی جاں بحق ہوگیا، ڈاکو فائر نگ کرتے ہوئے موقع سے فرار ہوگئے-
ان کا کہنا تھا کہ انہوں نے ڈاکوؤں پر اس لیے فائرنگ نہیں کی کہ وہ پولیس والے نہ ہوں کیونکہ ڈر تھا کہ اگر وہ پولیس والے ہوئے اور ان پر فائرنگ کی گئی تو وہ پولیس والے ان کے پورے خاندان کو ختم کر دیتے ان کے گھر آنے سے پہلے ڈاکو 4 گھروں کا پہلے بھی صفایا کر چکے تھے، انہوں نے بتایا کہ گزشتہ کئی ماہ سے علاقے میں وارداتیں ہو رہی تھیں اور وارداتیں کرنے والے پولیس کی وردی میں ہوتے تھے۔
انہوں نے کہا کہ علاقہ مکینوں کی جانب سے دو ماہ قبل منگھو پیر تھانے میں وارداتوں کے حوالے سے تین درخواستیں دی جا چکی ہیں تاہم پولیس نے نہ تو کوئی کارروائی کی اور نہ ہی گشت میں اضافہ کیا، رات کے وقت منھگو پیر پولیس تھانے سے ہی باہر نہیں جاتی ہے۔
مقتول کے والد نے انتہائی جذباتی انداز میں کہا کہ وہ اپنے بیٹے کو اس وقت تک سپرد خاک نہیں کریں گے جب تک واردات میں ملوث ملزمان کو گرفتار نہیں کر لیا جاتا، پولیس اگر چاہے تو چند گھنٹوں میں ہی ڈاکوؤں کو گرفتار کر سکتی ہے وہ بیٹے کی لاش کے ہمراہ سائٹ حبیب بینک چورنگی، کراچی پریس کلب اور صدر پاکستان آصف علی زرداری کے گھر کے باہر پرامن احتجاجی دھرنا دینگے چاہے جتنے دن بھی لگ جائیں وہ اجتجاج کرتے رہیں گے، پولیس نے ضا بطے کی کارروائی کے بعد لاش مقتول کے والد کے سپرد کر دی۔
