پاکستانی طالبِ علم ڈاکٹر محمد طحہٰ چیمہ نے بلغاریہ کی ایک معروف میڈیکل یونیورسٹی میں تاریخی کامیابی حاصل کرتے ہوئے 375 بین الاقوامی طلبہ میں پہلی پوزیشن حاصل کر لی۔
گوجرانوالہ سے تعلق رکھنے والے جرمن/پاکستانی طالبِ علم یونیورسٹی کی تاریخ میں بطور بین الاقوامی طالب علم ٹاپ گریجویٹ قرار پانے والے پہلے پاکستانی بن گئے ہیں ڈاکٹر محمد طحہٰ چیمہ نے نہ صرف اپنی میڈیکل ڈگری امتیازی نمبروں کے ساتھ مکمل کی بلکہ اعلیٰ ترین GPA حاصل کرنے پر انہیں گریجویٹنگ کلا س 2026 کا ’ویلڈیکٹورین‘ بھی منتخب کیا گیا۔
گریجویشن تقریب کے دوران ڈاکٹر طحہٰ چیمہ نے الوداعی خطاب بھی کیا، جس میں انہوں نے بابائے قوم محمد علی جناح کے الفاظ Unity, Faith, Discipline کو دہراتے ہوئے موجودہ عالمی تنازعات کے تناظر میں امن اور ہم آہنگی کا پیغام دیا۔
پروگرام کے آغاز میں 375 طلبہ نے داخلہ لیا تھا تاہم ڈاکٹر محمد طحہٰ چیمہ نے مسلسل محنت، شاندار تعلیمی کارکردگی اور غیر معمولی صلاحیتوں کی بدولت تمام طلبہ میں نمایاں مقام حاصل کیا۔