نادیہ خان نے شرمیلا فاروقی پر ہراساں کرنے، شہرت کو نقصان پہچانے اور نامناسب الفاظ استعمال کرنے پر ہتک عزت کے دعوے سمیت ہراسانی اور کرمنل کیس کرنے کا نوٹس بھجوادیا۔
باغی ٹی وی : تفصیلات کے مطابق نادیہ خان نے 4 فروری کو انسٹاگرام اسٹوری میں بتایا کہ شرمیلا فاروقی نے وفاقی محتسب کے ادارے کا استعمال کیا جو کہ خالصتًا کام کی جگہ پر ہراسانی کا نشانہ بننے والی خواتین کی مدد کا ادارہ ہےانہیں وفاقی محتسب کی جانب سے نوٹس بھجوایا گیا جو کہ غیر قانونی ہے، کیوں کہ مذکورہ ادارے کا کام سوشل میڈیا کے تنازع کے کیس سننا نہیں ہے۔
اداکارہ و میزبان کے مطابق وفاقی محتسب کا عہدہ کشمالا طارق کے پاس ہے اور مذکورہ ادارہ خالصتا عوامی ٹیکسز سے چلتا ہے، جس کا غلط استعمال کیا گیا۔
دوسری جانب ’ہائڈ سائڈ میگزین‘ نے نادیہ خان کی جانب سے شرمیلا فاروقی کو 4 فروری کو بھجوائے گئے نوٹس کی کاپی شیئر کرتے ہوئے بتایا کہ ٹی وی میزبان نے سیاستدان کے خلاف کرمنل کیس کرنے کا عندیہ بھی دیا ہے۔
نادیہ خان نے سپریم کورٹ کے وکیل کی توسط سے شرمیلا فاروقی کو پانچ صفحات پر مشتمل نوٹس بھجواتے ہوئے ان سے 14 دن کے اندر معافی مانگنے اور ٹی وی میزبان کے خلاف سوشل میڈیا پر جاری کیے گئے تمام مواد کو ہٹانے کا مطالبہ کیا ہے۔
نادیہ خان نے شرمیلا فاروقی کو نوٹس میں بتایا ہے کہ اگر وہ 14 دن کے اندر ان کے نوٹس کا جواب نہیں دیتیں اور ان سے معافی نہیں مانگتیں تو وہ شرمیلا فاروقی کے خلاف 50 کروڑ ہرجانے کا دعویٰ دائر کریں گی۔
ساتھ ہی پانچ صفحات پر مشتمل نوٹس میں یہ بتایا گیا ہے کہ ٹی وی میزبان ان کے خلاف لوگوں کو اکسانے پر ان کے خلاف تعزیرات پاکستان کی مختلف دفعات کے تحت کرمنل کیس بھی دائر کریں گی نوٹس میں نادیہ خان کے وکیل نے ٹی وی اداکار کو پاکستان کی اوپرا ونفرے بھی قرار دیا اور کہا کہ شرمیلا فاروقی نے اداکارہ کی شہرت کو نقصان پہچانے کی کوشش کی۔
نوٹس میں یہ بھی بتایا گیا کہ نادیہ خان نے 1993 میں انکل سرگم کے ساتھ ٹی وی ڈیبیو کیا اور 1995 میں پہلی بار وہ ڈراموں میں دکھائی دیں نوٹس میں نادیہ خان کی جانب سے جیتے گئے مختلف ایوارڈز کا بھی ذکر کیا گیا ہے۔
نادیہ خان کی جانب سے مذکورہ نوٹس بھجوائے جانے سے قبل یکم فروری کو شرمیلا فاروقی نے بتایا تھا کہ ان کی درخواست پر وفاقی محتسب نے نادیہ خان کو ان کے خلاف بیان بازی سے روکتے ہوئے ٹی وی میزبان کو طلب کرلیا۔
اس سے قبل 29 جنوری کو شرمیلا فارقی نے نادیہ خان کو 5 کروڑ روپے ہرجانے کا قانونی نوٹس بھجوایا تھا جس کے بعد نادیہ خان نے اعلان کیا تھا کہ وہ شرمیلا فاروقی کو 50 کروڑ کا نوٹس بھجوا رہی ہیں اور اب انہوں نے سیاستدان کو نوٹس بھجوادیا۔
