کراچی: اسٹیٹ بینک آف پاکستان نے پاکستان کے75 ویں یوم آزادی کی مناسبت سے 75 روپےکا اعزازی بینک نوٹ جاری کردیا۔
اسٹیٹ بینک کے مطابق بینک کے صدر دفتر میں 14 اگست مناتے ہوئے اعزازی بینک نوٹ کا ڈیزائن پیش کیا گیا تھا، عوام کے لیے 75 روپے کا اعزازی بینک نوٹ آج سے جاری کیا جا رہا ہے۔اسٹیٹ بینک کا کہنا ہےکہ اعزازی نوٹ ملک بھر میں خریداری کے لیے استعمال کیا جاسکےگا۔
مرکزی بینک سے جاری نوٹیفکیشن کے مطابق یادگاری نوٹ اسٹیٹ بینک آف پاکستان کے بی ایس سی دفاتر اور کمرشل بینکوں کی برانچز میں دستیاب ہوگا۔اسٹیٹ بینک کا کہنا ہے کہ عوام بھی 75 روپے کا یادگاری نوٹ کل (جمعہ 30 ستمبر) سے خرید سکیں گے۔
اسٹیٹ بینک کے مطابق 75 روپےکے نوٹ کا ڈیزائن اسٹیٹ بینک اور مقامی آرٹسٹوں نے مرتب کیا، نوٹ کےایک جانب قائداعظم، علامہ اقبال، سرسید احمد خان اور فاطمہ جناح کی تصاویر ہیں، نوٹ کےدوسری جانب مار خور اور دیودارکےدرخت کی تصاویرہیں، نوٹ کی پشت کو ماحولیاتی تبدیلیوں پرقومی عزم کو مدنظر رکھتےہوئےمرتب کیا گیا ہے۔
پاکستان کی 75ویں سالگرہ پر جاری یادگاری نوٹ سبز زمرد رنگ کا ہے جبکہ اس کا سائز 147 ملی میٹر چوڑا اور 65 ملی اونچا ہے اور اس کے عقب پر قومی جانور مارخور اور پہاڑوں کے ساتھ دیودار درخت بھی دکھائے گئے ہیں۔
