اوکاڑہ (نامہ نگار ملک ظفر) ڈپٹی کمشنر احمد عثمان جاوید کی زیر صدارت عیدالاضحیٰ کے انتظامات کے حوالے سے ایک اعلیٰ سطحی اجلاس منعقد ہوا، جس میں ایم این اے چوہدری ریاض الحق جج، ممبران صوبائی اسمبلی میاں محمد منیر اور چوہدری جاوید علاؤالدین سمیت ضلعی انتظامیہ اور متعلقہ محکموں کے افسران نے شرکت کی۔اجلاس میں کیٹل مارکیٹ مینجمنٹ کمپنی اور میونسپل کمیٹی کے حکام نے مویشی منڈیوں کے قیام اور انتظامات پر بریفنگ دی، جبکہ منیجنگ ڈائریکٹر ستھرا پنجاب کمپنی چوہدری عبدالجبار گجر نے صفائی ستھرائی اور ویسٹ مینجمنٹ پلان سے آگاہ کیا۔عوامی نمائندوں نے مویشی منڈیوں میں مقامی بیوپاریوں کو زیادہ سے زیادہ ریلیف فراہم کرنے کی تجاویز پیش کیں۔ اس موقع پر ڈپٹی کمشنر احمد عثمان جاوید نے ہدایت جاری کی کہ عوامی سہولت کو مدنظر رکھتے ہوئے منڈیوں میں بہترین انتظامات یقینی بنائے جائیں اور افسران باقاعدگی سے مانیٹرنگ کریں۔انہوں نے واضح کیا کہ فرائض میں غفلت برتنے والے اہلکاروں کے خلاف سخت کارروائی عمل میں لائی جائے گی۔ مزید کہا کہ کیٹل مینجمنٹ کمپنی بیوپاریوں اور خریداروں کو تمام ضروری سہولیات فراہم کرے، جبکہ متعلقہ افسران کیمپس میں سہولیات اور ڈیوٹی اہلکاروں کی نگرانی جاری رکھیں۔ڈپٹی کمشنر نے ہدایت کی کہ عیدالاضحیٰ کے مائیکرو پلان پر مکمل عملدرآمد کیا جائے، منڈیوں میں پینے کے پانی کی باقاعدہ ٹیسٹنگ کروائی جائے اور سیکیورٹی پلان پر سختی سے عمل کیا جائے۔ انہوں نے اس عزم کا اظہار کیا کہ عید کے موقع پر صفائی ستھرائی کے بہترین انتظامات کو یقینی بنایا جائے گا۔
Tag: #BreakingNews
-
جروار شہر میں ZONG انٹرنیٹ سروس مکمل طور پر بند، ہزاروں صارفین شدید متاثر
گہوٹکی باغی ٹی وی/نامہ نگار مشتاق علی لغاری
ضلع گھوٹکی کی تحصیل میرپور ماتھیلو کے نواحی علاقے جروار شہر میں ZONG کی انٹرنیٹ سروس کی مسلسل بندش اور شدید خرابی نے صورتحال کو انتہائی سنگین اور تشویشناک بنا دیا ہے۔ نیٹ ورک کی مکمل ناکامی کے باعث ہزاروں صارفین شدید مشکلات، ذہنی اذیت اور مالی نقصان کا شکار ہیں تفصیلات کے مطابق گزشتہ کئی روز سے جروار شہر اور گردونواح میں ZONG نیٹ ورک یا تو مکمل طور پر بند ہے یا انتہائی ناقابلِ استعمال سست رفتاری کا شکار ہے۔ بار بار کی بندش اور مسلسل خرابی نے انٹرنیٹ سروس کو مکمل طور پر غیر مؤثر بنا دیا ہے، جس کے باعث صارفین کے ہزاروں روپے مالیت کے ڈیٹا پیکیجز ضائع ہو رہے ہیں۔اس بدترین صورتحال نے پورے علاقے کا نظام زندگی بری طرح متاثر کر دیا ہے۔ کاروباری طبقہ مکمل طور پر مفلوج ہو چکا ہے، آن لائن تجارت اور ڈیجیٹل لین دین رک جانے سے تاجروں اور دکانداروں کو بھاری مالی نقصان کا سامنا ہے۔ روزانہ کی بنیاد پر کمائی کرنے والے چھوٹے کاروباری افراد بھی شدید بحران میں مبتلا ہیں۔اسی طرح طلبہ آن لائن تعلیم اور تعلیمی سرگرمیوں سے محروم ہو چکے ہیں، جس کے باعث ان کا تعلیمی نقصان مسلسل بڑھ رہا ہے۔ فری لانسرز، سوشل میڈیا ورکرز اور آن لائن روزگار سے وابستہ افراد کی آمدن مکمل طور پر بند ہو گئی ہے، جبکہ عام شہری بھی رابطہ نظام اور ضروری امور میں سخت مشکلات کا سامنا کر رہے ہیں۔علاقہ مکینوں کا کہنا ہے کہ مہنگے انٹرنیٹ پیکیجز خریدنے کے باوجود سروس نہ ملنا کھلی ناانصافی اور سنگین غفلت ہے۔ عوام میں شدید غم و غصہ اور بے چینی پائی جا رہی ہے، جبکہ صورتحال کسی بھی وقت بڑے عوامی ردعمل میں تبدیل ہونے کا خدشہ ظاہر کیا جا رہا ہے۔شہریوں اور متاثرہ طبقوں نے سخت اور دوٹوک الفاظ میں مطالبہ کیا ہے کہ ZONG انتظامیہ فوری طور پر ہنگامی بنیادوں پر نوٹس لے، جروار شہر سمیت تمام متاثرہ علاقوں میں انٹرنیٹ سروس بلا تاخیر بحال کرے اور اس بحران کا مستقل حل یقینی بنائے۔ عوام نے خبردار کیا ہے کہ اگر فوری اور مؤثر کارروائی نہ کی گئی تو احتجاجی تحریک شروع کی جائے گی، جس کی مکمل ذمہ داری متعلقہ کمپنی اور متعلقہ حکام پر عائد ہوگی۔ -
سیالکوٹ میں آل پارٹیز کانفرنس، آپریشن بنیان المرصوص کی کامیابی پر پاک افواج کو خراجِ تحسین
سیالکوٹ (بیورو چیف مدثر رتو) پاکستان مرکزی مسلم لیگ کے زیر اہتمام سیالکوٹ میں ایک اہم آل پارٹیز کانفرنس کا انعقاد کیا گیا، جس میں آپریشن بنیان المرصوص کی کامیابی کو ایک سال مکمل ہونے پر پاکستان کی عظیم کامیابی کو شاندار انداز میں خراجِ تحسین پیش کیا گیا۔کانفرنس میں مزمل اقبال ہاشمی، طاہر ہندلی، شیخ فیاض احمد، امتیاز احمد بریار، انجینیئر اعجاز نصر، پیر سید محبوب احمد گیلانی، حافظ جاوید گورایہ، آغا فدا حسین، الشیخ حکیم محمد عبدالواحد اور شیخ جاوید حیدر سمیت مختلف سیاسی، مذہبی اور سماجی شخصیات نے بھرپور شرکت کی۔شرکاء نے پاک افواج کی قربانیوں، پیشہ ورانہ مہارت اور دفاعِ وطن میں ان کے کردار کو زبردست خراجِ تحسین پیش کرتے ہوئے اس عزم کا اظہار کیا کہ ملک دشمن عناصر کے خلاف پوری قوم متحد ہے اور پاکستان کے دفاع کیلئے سیسہ پلائی دیوار بن کر کھڑی ہے۔مقررین نے کہا کہ پاکستان کی سلامتی، خودمختاری اور استحکام پر کوئی سمجھوتہ نہیں کیا جائے گا اور پوری قوم اپنی بہادر افواج کے شانہ بشانہ کھڑی ہے۔ انہوں نے کہا کہ آپریشن بنیان المرصوص کے بعد پاکستان ایک مضبوط اور مستحکم ریاست کے طور پر دنیا کے سامنے ابھرا ہے۔مقررین کا کہنا تھا کہ 10 مئی کے بعد عالمی سطح پر پاکستان کو ایک نئے زاویے سے دیکھا گیا، جہاں ملک نے اپنی مضبوط معیشت، جدید ٹیکنالوجی اور پیشہ ور افواج کے ذریعے اپنی صلاحیتوں کا بھرپور اظہار کیا۔کانفرنس کے اختتام پر ملک کی سلامتی، ترقی اور استحکام کیلئے خصوصی دعا بھی کی گئی۔
-
اوکاڑہ میں معرکۂ حق کے شہدا کو شاندار خراجِ عقیدت، جناح پارک میں خصوصی تقریب
اوکاڑہ (نامہ نگار ملک ظفر) اوکاڑہ میں معرکۂ حق کے شہدا کو خراجِ عقیدت پیش کرنے کیلئے جناح پارک میں خصوصی تقریب کا انعقاد کیا گیا، جس میں اسسٹنٹ کمشنر مرزا راحیل بیگ اور سی او ایم سی عمر نسیم نے شرکت کی۔تقریب کے دوران شہدائے وطن کی یاد میں شمعیں روشن کی گئیں جبکہ سول سوسائٹی، شہریوں اور مختلف شعبہ ہائے زندگی سے تعلق رکھنے والے افراد کی بڑی تعداد جناح پارک پہنچی۔ شرکاء نے شمعیں روشن کر کے شہداء سے اپنی محبت اور عقیدت کا اظہار کیا۔اس موقع پر اسسٹنٹ کمشنر مرزا راحیل بیگ نے کہا کہ شہدا کا خون قوم پر ایک عظیم قرض ہے اور ملک کی خاطر جانیں قربان کرنے والے ہمارے حقیقی ہیرو ہیں۔ انہوں نے کہا کہ شہداء کی قربانیاں کبھی رائیگاں نہیں جائیں گی اور پوری قوم ان کی عظیم خدمات کو سلام پیش کرتی ہے۔انہوں نے مزید کہا کہ وطن کی آزاد فضائیں غازیوں اور شہدا کی مرہونِ منت ہیں اور قوم ہمیشہ اپنے شہدا کو یاد رکھے گی۔
-
صوبائی وزیر سعید غنی سے حمید کریم کی ملاقات، عوامی مسائل کے حل پر پیش رفت کا عزم
کشمور (رپورٹ وقار احمد اعوان) صوبائی وزیر سعید غنی سے حمید کریم کی ایک اہم اور بامقصد ملاقات ہوئی جس میں صوبے خصوصاً متعلقہ علاقوں کو درپیش مسائل مزدوروں کے حقوق روزگار کے مواقع اور سوشل پروٹیکشن کے نظام کو مؤثر بنانے جیسے اہم امور پر تفصیلی اور سنجیدہ تبادلہ خیال کیا گیا ذرائع کے مطابق ملاقات خوشگوار ماحول میں منعقد ہوئی جہاں حمید کریم نے اپنے علاقے کے عوام کو درپیش بنیادی مسائل ترقیاتی کاموں میں درپیش رکاوٹوں اور فلاحی منصوبوں کی ضرورت پر جامع انداز میں روشنی ڈالی انہوں نے خاص طور پر نوجوانوں کے لیے روزگار کے مواقع بڑھانے مزدور طبقے کے حقوق کے تحفظ اور سوشل سیکیورٹی کے نظام کو مزید فعال بنانے پر زور دیا اس موقع پر صوبائی وزیر سعید غنی نے گفتگو کرتے ہوئے کہا کہ حکومت سندھ مزدوروں اور محنت کش طبقے کی فلاح و بہبود کے لیے عملی اقدامات کر رہی ہے اور محکمہ محنت ہیومن ریسورسز و سوشل پروٹیکشن کے تحت جاری منصوبوں کو مزید مؤثر اور عوام دوست بنایا جا رہا ہے انہوں نے یقین دہانی کرائی کہ پیش کیے گئے مسائل کو ترجیحی بنیادوں پر حل کیا جائے گا اور متعلقہ حکام کو فوری ہدایات جاری کی جائیں گی ملاقات میں باہمی تعاون کے فروغ ترقیاتی عمل کو تیز کرنے اور عوامی مسائل کے پائیدار حل کے لیے مسلسل رابطے میں رہنے پر بھی اتفاق کیا گیا اس موقع پر اس عزم کا اظہار کیا گیا کہ عوام کی فلاح و بہبود اور علاقے کی ترقی کے لیے مشترکہ کوششیں جاری رکھی جائیں گی آخر میں حمید کریم نے صوبائی وزیر سعید غنی کا شکریہ ادا کرتے ہوئے امید ظاہر کی کہ اس ملاقات کے مثبت اثرات جلد سامنے آئیں گے اور عوام کو درپیش مسائل میں واضح بہتری آئے گی۔
-
میرپورخاص سول ہسپتال: سیکیورٹی اور بھرتیوں پر سنگین سوالات، شفاف انکوائری کا مطالبہ
میرپورخاص سول ہسپتال: سیکیورٹی یا سازش؟ عوامی جان و مال داؤ پر!میرپورخاص (رپورٹ سید شاہزیب شاہ ): کیا عوام کی جان و مال کی حفاظت کے لیے مامور اسٹاف اب خود ایک سوالیہ نشان بن چکی ہے؟ میرپورخاص کا سول ہسپتال، جسے تحفظ اور علاج کی علامت ہونا چاہیے تھا، اب سنگین الزامات اور شکوک و شبہات کی زد میں ہے۔ڈاکٹر اسٹاف اور اکاونٹ انچارج پر سنگین الزامات سول ہسپتال میرپورخاص کے اکاونٹ انچارج کے خلاف سنگین شکایات کے سامنے آئی ہیں۔ عوامی حلقوں اور ملازمین کی جانب سے اٹھائے گئے سوالات نے ہسپتال انتظامیہ کی کارکردگی پر مہرِ تصدیق ثبت کر دی ہے:بغیر تصدیق بھرتیاں کے : الزام ہے کہ ہسپتال میں اسٹاف کو بغیر کسی پولیس ویریفکیشن اور شناختی کارڈز کی مکمل جانچ پڑتال کے بھرتی کیا گیا ہے۔ کیا کسی بھی شخص کو بغیر کسی کولیفکشن اور بغیر تجربہ کے ڈیوٹی پر رکھنا عوام کی زندگیوں سے کھیلنا نہیں ہے؟اقربا پروری (نیپوٹزم): میرٹ کو پسِ پشت ڈالتے ہوئے ایک ہی برادری کے افراد کو بڑی تعداد میں بھرتی کرنے کے الزامات ہیں۔ کیا یہ تعیناتیاں قابلیت کی بنیاد پر کی گئیں یا "اپنوں کو نوازنے” کی پالیسی اپنائی گئی اور عوام کی زندگی سے کھیلنا کھاں کا انصاف ھے یہ نہ صرف بدانتظامی ہے بلکہ کھلی ناانصافی اور انسانی حقوق کی خلاف ورزی ہے۔
حساس ذمہ داری اور انتظامی خاموشیسوال یہ پیدا ہوتا ہے کہ کیا ایسے شخص کو اکاؤنٹنٹ کی حساس ذمہ داری سونپی جانی چاہیے جس پر اتنے سنگین الزامات ہوں؟ کیا انتظامیہ کسی بڑے حادثے کا انتظار کر رہی ہے؟ بے چینی اور انتظامیہ کی خاموشی کسی بڑے طوفان کا پیش خیمہ ثابت ہو سکتی ہے۔مطالبات: شفاف انکوائری کا وقت تعین کیا جاےعوامی حلقوں اور متاثرہ عوام کی جانب سے درج ذیل مطالبات سامنے آئے ہیں:
ایس ایس پی میرپورخاص فوری طور پر ان الزامات کی شفاف انکوائری کا حکم دیں۔اگر الزامات ثابت ہو جاتے ہیں، تو ذمہ داران کے خلاف سخت قانونی کارروائی عمل میں لائی جائے۔یہ محض ایک انتظامی مسئلہ نہیں بلکہ ہزاروں مریضوں اور شہریوں کے زندگی کے تحفظ کا سوال ہے۔ اب خاموشی اختیار کرنا مزید خطرات کو دعوت دینے کے مترادف ہے۔ سچ کا سامنے آنا اور انصاف ہونا ناگزیر ہے! -
اوکاڑہ: معرکہ حق کی سالگرہ، سی ای او ایجوکیشن کی زیر صدارت تقریب
اوکاڑہ میں “معرکہ حق” کی پہلی سالگرہ کے موقع پر گورنمنٹ ایم سی ہائی سکول میں ایک پروقار مرکزی تقریب منعقد ہوئی۔ اس تقریب کی صدارت سی ای او ایجوکیشن محمد یوسف نے کی جبکہ ضلع بھر کے سرکاری و نجی تعلیمی اداروں میں بھی خصوصی تقریبات کا اہتمام کیا گیا۔
سی ای او ایجوکیشن محمد یوسف نے اپنے خطاب میں “معرکہ حق” کی اہمیت کو اجاگر کرتے ہوئے کہا کہ یہ ہماری دفاعی تاریخ کا ایک روشن باب ہے اور اس میں افواجِ پاکستان کی قربانیاں اور کامیابیاں قوم کے لیے فخر کا باعث ہیں۔ انہوں نے کہا کہ پوری قوم اپنی مسلح افواج کے شانہ بشانہ کھڑی ہے۔
تقریب میں مختلف سکولوں کے طلباء نے بھی جوش و جذبے سے تقاریر کیں اور پاک افواج کی قربانیوں، بہادری اور کامیابیوں کو خراجِ تحسین پیش کیا۔ طلباء نے اس عزم کا اظہار کیا کہ پاکستان کی افواج دنیا کی بہترین اور ناقابلِ تسخیر افواج ہیں جو ہر قسم کے خطرات کا مقابلہ کرنے کی صلاحیت رکھتی ہیں۔
تقریب کے اختتام پر ملکی سلامتی، استحکام اور افواجِ پاکستان کی سربلندی کے لیے خصوصی دعائیں بھی مانگی گئیں۔ -
اوکاڑہ: ایڈیشنل ڈپٹی کمشنر ریونیو کی عدالت میں تیز رفتار فیصلے، متعدد کیسز نمٹا دیے گئے
اوکاڑہ (نامہ نگار ملک ظفر) ایڈیشنل ڈپٹی کمشنر ریونیو محمد شعجین وسطرو نے ریونیو کورٹ میں کیسز کی سماعت کرتے ہوئے میرٹ اور شفافیت کو یقینی بنایا اور متعدد مقدمات کو موقع پر ہی نمٹا دیا۔انہوں نے زیر التواء کیسز کو ترجیحی بنیادوں پر سنا اور ہدایت کی کہ تمام کیسز کی تیاری مکمل اور ریکارڈ درست رکھا جائے تاکہ سائلین کو غیر ضروری تاخیر کا سامنا نہ کرنا پڑے۔ایڈیشنل ڈپٹی کمشنر ریونیو محمد شعجین وسطرو نے کہا کہ ریونیو معاملات میں عوام کو بروقت اور بلا امتیاز انصاف کی فراہمی اولین ترجیح ہے۔ انہوں نے واضح کیا کہ ریونیو سسٹم میں شفافیت اور میرٹ کو ہر صورت برقرار رکھا جائے گا اور کسی بھی قسم کا دباؤ برداشت نہیں کیا جائے گا۔
-
دیپالپور میں کرایوں کی اوورچارجنگ پر کریک ڈاؤن، 3 گاڑیاں بند، ڈرائیورز گرفتار
اوکاڑہ (نامہ نگار ملک ظفر) دیپالپور میں اسسٹنٹ کمشنر فیصل شہزاد چیمہ نے کرایوں میں اوور چارجنگ کے خلاف سخت کارروائی کرتے ہوئے 3 مسافر گاڑیوں کو بند کر دیا جبکہ ڈرائیورز کو گرفتار کر کے قانونی کارروائی کا آغاز کر دیا گیا۔انہوں نے جنرل بس اسٹینڈ پر گاڑیوں کی چیکنگ کے دوران مسافروں سے براہِ راست کرایوں کے بارے میں دریافت کیا، جس پر زائد کرایہ وصول کرنے کی شکایات درست ثابت ہوئیں۔اس موقع پر اسسٹنٹ کمشنر فیصل شہزاد چیمہ نے کہا کہ پٹرولیم مصنوعات کی قیمتوں میں اضافے کی آڑ میں اوور چارجنگ کسی صورت برداشت نہیں کی جائے گی۔ عوام کا استحصال کرنے والوں کے خلاف بلاامتیاز کارروائی جاری رہے گی۔انہوں نے ٹرانسپورٹرز کو ہدایت کی کہ سرکاری مقرر کردہ کرایہ ناموں پر مکمل عملدرآمد یقینی بنایا جائے اور کرایہ لسٹیں نمایاں جگہوں پر آویزاں کی جائیں، بصورت دیگر اڈہ مالکان کے خلاف بھی سخت ایکشن لیا جائے گا۔
-
ننکانہ صاحب: وساکھی میلہ سر پر، سیوریج منصوبہ نامکمل — یاتریوں کو مشکلات کا خدشہ
ننکانہ صاحب باغی ٹی وی نامہ نگار احسان اللہ ایاز وساکھی میلہ میں 2 دن باقی کیا ترقیاتی کام مکمل ہو جائیں گے کیا مسائل جوں کے توں رہیں گےننکانہ صاحب میگا سیوریج پراجیکٹ سست روی کا شکار، واسا کی کارکردگی پر سوالیہ نشان سیکرٹری ہاؤسنگ نورالامین مینگل کے احکامات کے باوجود کیپٹن حسنین نواز شہید روڈ کلیئر نہ ہو سکی دنیا بھر سے آنے والے سکھ یاتریوں کو شدید مشکلات کا خدشہ، مرکزی شاہراہ کھدائی اور پائپوں سے بھر گئی وزیراعلیٰ پنجاب مریم نواز شریف اور ڈپٹی کمشنر محمد تسلیم اختر راؤ سے فوری نوٹس کا مطالبہ ضلعی انتظامیہ کے لیے وساکھی کے دنوں میں کیپٹن حسنین نواز شہید روڈ کلیئر کرنا بڑا چیلنج بن گیاننکانہ صاحب وساکھی میلہ کی تقریبات میں محض 3 دن باقی رہ گئے ہیں تاہم ننکانہ صاحب میں جاری سیوریج میگا پراجیکٹ تاحال سست روی کا شکار ہے جس کے باعث واسا کی کارکردگی پر سنگین سوالات اٹھنے لگے ہیں،سیکرٹری ہاؤسنگ نورالامین مینگل کی جانب سے واضح احکامات اور سات روزہ ڈیڈ لائن کے باوجود کیپٹن حسنین نواز شہید روڈ پر کام مکمل نہ ہو سکا، جبکہ سڑک کے مختلف حصوں میں کھدائی، بکھرے پائپ اور ادھورا کام شہریوں اور زائرین کے لیے مشکلات کا باعث بن رہا ہے،10 اپریل سے شروع ہونے والی تقریبات میں بھارت سمیت دنیا بھر سے ہزاروں سکھ یاتری ننکانہ صاحب پہنچیں گے، جو اپنے قیام کے دوران مختلف مقامات کی یاترا کریں گے،جن میں گوردوارہ جنم استھان، گوردوارہ تنبو صاحب، گوردوارہ پانچویں اور چھٹی پاتشاہی، گوردوارہ مال جی صاحب اور گوردوارہ کیارہ صاحب سمیت شہر کے اہم گوردوارے اسی مرکزی شاہراہ پر واقع ہیں،جبکہ شہر کے بڑے بازار بھی اسی روڈ سے منسلک ہیں،موجودہ صورتحال میں خدشہ ظاہر کیا جا رہا ہے کہ اگر سیوریج لائن کی کھدائی اور سڑک پر پڑے پائپ بروقت نہ ہٹائے گئے تو سکھ یاتریوں کو شدید مشکلات کا سامنا کرنا پڑ سکتا ہے، جو نہ صرف انتظامی کارکردگی بلکہ شہر کی ساکھ پر بھی اثر انداز ہوگا،شہری حلقوں نے وزیراعلیٰ پنجاب مریم نواز شریف اور ڈپٹی کمشنر محمد تسلیم اختر راؤ سے فوری نوٹس لینے کا مطالبہ کرتے ہوئے کہا ہے کہ وساکھی میلے کے دنوں میں اس اہم شاہراہ کو کلیئر کروانا انتظامیہ کے لیے ایک بڑا امتحان بن چکا ہے اور سوال پیدا ہوتا ہے کہ کیا واسا اور ضلعی انتظامیہ وساکھی میلے سے قبل اس اہم شاہراہ کو کلیئر کر کے اپنی کارکردگی ثابت کر پائیں گے، یا مسائل جوں کے توں رہیں گے.