سندھ حکومت نے کپاس، گندم، سرسوں، بیری کی 12 نئی زرعی اجناس کی منظوری دے دی ہے.
کراچی: باغی ٹی وی کی رپورٹ کے مطابق سندھ کے زرعی سائنس دانوں نے زیادہ پیداوار دینے والی نئی زرعی اجناس تیار کر لی ہیں، سندھ حکومت نے کپاس، گندم، سرسوں، بیری کی 12 نئی زرعی اجناس کی منظوری دے دی۔وزیرزراعت اور بیورو آف سپلائی سردار محمد بخش خان مہر کی صدارت میں سندھ سیڈ کاؤنسل کا 36 واں اہم اجلاس منعقد ہوا، جس میں نئے بیجوں کی خصوصیات، نئی متعارف کردہ اقسام کی کاشت کے لیے منظوری دی گئی۔اجلاس میں نئی زرعی اجناس میں کپاس کی کرس 644، کرس 674، کرس 682، نیا بی ٹی 2021 اور میاں ریشم نان بی ٹی کی منظوری دی گئی، گندم کی IV-3، جب کہ عروج 22، اکبر 19، صبحانی 21، نیا میک پاسطہ کی جزوی ایک سال کے لیے منظوری دی گئی، سرسوں کی کیزولہ، بیری کی لیمائی گولو کی منظوری دی گئی۔کاشت کاروں نے اجلاس میں شکایت کی کہ پنجاب کے چاول کے بیج کی وجہ سے سندھ کے کسانوں کو لاکھوں روپے کا نقصان ہوا ہے، جس پر وزیر زراعت محمد بخش مہر نے کاشت کاروں کی شکایت پر سخت نوٹس لیا اور محکمے کو انکوائری کی ہدایت کر دی، اور ان سے اس سلسلے میں رپورٹ طلب کی ہے۔
محمد بخش مہر نے کہا محکمہ زراعت میں کافی بہتری آئی ہے مگر کمزوری بھی ہے جسے مزید بہتر کرنے کی ضرورت ہے، کاشت کاروں کی مشاورت سے ہی نئی زرعی اجناس کی منظوری دی جائے گی، سندھ حکومت سیڈ ایکٹ پر کام کر رہی ہے، ایکٹ منظور ہونے کے بعد دیگر صوبوں کی جعلی زرعی اجناس اور کمپنیوں کے خلاف سندھ کے افسران کارروائی کر سکیں گے.
وزیر زراعت محمد بخش مہر نے کہا موسمی تبدیلی کی وجہ سے زرعی ترقی کا عمل متاثر ہو رہا ہے، کیوں کہ کاشت کار طبقہ قدرتی آفات سے زیادہ متاثر ہو رہا ہے، موسمی حالات کو مدنظر رکھ کر زرعی سائنس دان تحقیقی سرگرمیاں مزید تیز کریں۔
ڈائریکٹر جنرل ریسرچ مظہر کیریو اجلاس میں بریفنگ کے دوران کہنا تھا کہ مذکورہ نئی اقسام جدید سائنسی طریقوں کے ذریعے تیار کی گئی ہیں، اور یہ اقسام نہ صرف صوبے میں زرعی پیداوار میں اضافہ کی حامل ثابت ہونگی بلکہ زرعی سائنسدانوں کی یہ کاوشیں زرعی میدان میں سندھ کو خود کفیل بنانے میں انتہائی اہم کردار ادا کریں گی. کاشت کار رہنما ندیم شاہ نے کہا کہ اجناس کی نئی ورائٹیاں منظور ہونے سے سندھ کپاس اور گندم میں خود کفیل ہو جائے گا.
اجلاس میں سیکریٹری زراعت رفیق احمد برڑو،ڈائریکٹر جنرل ریسرچ مظہر کیریو، ڈی جی فیڈرل سیڈ سرٹی فکیشن، سیڈ کمپنیز کے نمائندے، ڈی جی زراعت منیر احمد جمانی، ممبران کاشتکار رہنما سید ندیم شاہ، سید میران محمد شاہ، سید زین شاہ، ڈپٹی ڈائریکٹر زرعی اطلاعات منیر احمد کاکا اور دیگر زرعی سائنسدان شریک ہوئے۔
