Tag: cricket

اسلام آباد: انڈر19 ایشیا کرکٹ کپ کی تیاریوں کےلئے قومی ٹیم کا تربیتی کیمپ جمعہ سے شروع ہوگا.

تفصیلات کے مطابق ایشیا کرکٹ کپ انڈر 19 ایشیا کرکٹ کپ کےلئے قومی ٹیم کا تربیتی کیمپ جمعہ سے کراچی میں شروع ہوگا۔ ایونٹ کی تیاری کےلئے قومی انڈر19 ٹیم کا تربیتی کیمپ کوچ اعظم خان کی زیرنگرانی جمعہ سے کراچی میں شروع ہو گا جبکہ 26 اور 28 اگست کو پریکٹس میچ کھیلےجائیں گے، 15 رکنی قومی ٹیم روحیل نذیر کی قیادت میں 3 ستمبر کو کولمبو روانہ ہوگی، ٹیم کے بقیہ کھلاڑیوں میں حیدر علی، عامر علی، ابو ہریرہ، عبدالواحد، اختر شاہ، فہد منیر، محمد عامر، محمد عباس آفریدی، محمد باسط علی، محمد حارث، محمد عرفان خان، محمد وسیم جونیئر، نسیم شاہ اور قاسم اکرم شامل ہیں۔

واضح رہے کہ انڈر19 ایشیا کپ 5 سے 14 ستمبر تک سری لنکا میں کھیلا جائے گا جس میں آٹھ ٹیمیں شرکت کریں گی۔ 7 ستمبر کو قومی ٹیم اپنے دوسرے میچ میں روایتی حریف بھارت کیخلاف میچ کھیلے گی.

اسلام آباد (اے پی پی) یوم دفاع ٹی 20 کرکٹ کپ 6 ستمبر سے اسلام آباد میں شروع ہوگا.

تفصیلات کے مطابق یوم دفاع ٹی 20 کرکٹ کپ ٹورنامنٹ 6 ستمبر سے الیون سٹار کرکٹ گراﺅنڈ اسلام آباد میں شروع ہوگا۔ ٹورنامنٹ کے چیف آرگنائزر معید شیخ نے بتایا کہ ٹورنامنٹ کی تیاریاں زور و شور سے جاری ہیں۔ انہوں نے کہا کہ ٹورنامنٹ میں 16 ٹیمیں حصہ لیں گی۔ ٹورنامنٹ کا پہلا مرحلہ ناک آﺅٹ اور دوسرا لیگ سسٹم کی بنیاد پر پی سی بی کرکٹ قوانین کے مطابق کھیلا جائے گا۔ ٹورنامنٹ کی انٹری فیس 15 ہزار روپے مقرر کی گئی ہے جبکہ ٹورنامنٹ میں پہلی پوزیشن حاصل کرنے والی ٹیم کو 50 ہزار روپے اور دوسری پوزیشن حاصل کرنے والی ٹیم کو 25 ہزار روپے نقد انعام دیا جائے گا۔ ٹورنامنٹ میں شرکت کی خواہش رکھنے والی ٹیمیں اپنے، اپنے ناموں کا اندراج 29 اگست سے قبل انٹری فیس کے ساتھ کرواسکتی ہیں۔

دوسری جانب گراﺅنڈ کے چیئرمین ہارون بٹ، ٹیکنکل کمیٹی کے چیئرمین سعداللہ اور استقبالیہ کمیٹی کے چیئرمین محمد احسان ہونگے۔

لاہور: دورہ پاکستان کے حوالے سے سری لنکن کرکٹ بورڈ کو حکومت کی کلیئرنس کا انتظار ہے.

تفصیلات کے مطابق دورہ پاکستان کے حوالے سے سری لنکن کرکٹ بورڈ نے گیند حکومت کے کورٹ میں ڈال دی، حکام کوئی بھی فیصلہ کرنے سے قبل کلیئرنس کے منتظر ہیں۔ گزشتہ دنوں سری لنکن کرکٹ بورڈ کا ایک سیکیورٹی وفد موہن ڈی سلوا کی سربراہی میں پاکستان آیا، کراچی کے بعد لاہور میں بھی مہمانوں کو حفاظتی انتظامات سے آگاہ کیا گیا، متعلقہ اداروں کے حکام نے بریفنگ بھی دی۔ یہ اطلاعات بھی آئیں کہ سیکیورٹی وفد کی رپورٹ مثبت ہے،اب سری لنکن میڈیا نے دعویٰ کیا کہ اگرچہ رپورٹ پر بات چیت ضرور ہوئی لیکن اسے منظوری کیلیے ایگزیکٹیو کمیٹی کے اجلاس میں پیش ہی نہیں کیا گیا۔ یہ معاملہ اس کیلیے بھی تعطل کا شکار ہے کہ بورڈ پاکستان سے کسی بھی قسم کا وعدہ کرنے سے قبل اپنی حکومت کی جانب سے کلیئرنس حاصل کرنے کا منتظر ہے، دوسری جانب سری لنکن میڈیا ذرائع سے یہ بات بھی سامنے آئی کہ پی سی بی کی جانب سے ٹور کے 2 شیڈول سری لنکن کرکٹ بورڈ کو بھجوائے گئے ہیں، ایک شیڈول کے مطابق ٹیسٹ میچز یو اے ای اور دسمبر میں محدود اوورز کے میچز پاکستان میں رکھے گئے جبکہ دوسرے شیڈول میں دونوں ٹیسٹ کے کراچی اور لاہور میں انعقادکا درج ہے، ٹور کے حوالے سے کوئی حتمی فیصلہ کیے جانے سے قبل چند معاملات کا جائزہ لینا ضروری ہوگا، حکومتی منظوری اور دیگر تحفظات دور ہونے کے بعد بھی اگلا مرحلہ کرکٹرز کو پاکستان آنے پر آمادہ کرنا ہوگا۔

واضح رہے کہ 2009ء میں لاہور ٹیسٹ کے دوران سری لنکن ٹیم پر دہشت گردوں نے حملہ کر دیا تھا،اس کے بعد پاکستان میں کھیلوں کے میدان ویران ہوگئے تھے، جس کے بعد سے ہی پاکستان میں کوئی ٹیسٹ میچ نہیں کھیلا گیا.

دبئی: آئی سی سی نے ٹیسٹ کرکٹ کی تازہ ترین رینکنگ جاری کردی، جس کے مطابق پاکستان ساتویں نمبر پر موجود ہے.

تفصیلات کے مطابق انٹرنیشنل کرکٹ کونسل نے ٹیسٹ کرکٹ کی تازہ ترین رینکنگ جاری کردی ہے. پاکستان 84 پوائنٹس کے ساتھ ساتویں نمبر پر موجود ہے. جبکہ پاکستان کی ساتویں پوزیشن کو بھی ویسٹ انڈیز سے خطرہ لاحق ہوگیا۔ ویسٹ انڈیز اور بھارت کے درمیان 2 ٹیسٹ میچز کی سیریز میں پاکستان کی رینکنگ میں ساتویں پوزیشن بھی داؤ پر لگی ہوگی، اگر کیریبیئن سائیڈ نے یہ سیریز 1-0 کے مارجن سے بھی جیتی تو اس کے پوائنٹس 82 سے ایکدم 88 ہوجائیں گے، یوں84 پوائنٹس کی حامل پاکستانی ٹیم کو مزید تنزلی کا شکار ہوکر آٹھویں نمبر پر جانا پڑے گا، اس صورت میں بھارت بھی اپنی ٹاپ پوزیشن گنوا دے گا،البتہ کوہلی الیون کے سیریز میں کلین سوئپ کی صورت میں ویسٹ انڈیز کے پوائنٹس 80 رہ جائیں گے۔

واضح رہے کہ اشیز سیریز کے دوسرے ٹیسٹ میچ کے خاتمے پر آئی سی سی نے ٹیسٹ رینکنگ جاری کی ہے.

دبئی (اے پی پی) نیوزی لینڈ ٹیم کے کپتان کین ولیمسن اور سری لنکن سپنر دانن جایا کے باﺅلنگ ایکشن کو مشکوک قرار دیدیا گیا ہے.

نیوزی لینڈ ٹیم کے کپتان کین ولیمسن اور سری لنکن سپنر دانن جایا کے باﺅلنگ ایکشن کو مشکوک قرار دے دیا گیا۔ سری لنکا اور نیوزی لینڈ کی ٹیموں کے درمیان کھیلے گئے پہلے ٹیسٹ میچ میں دونوں کرکٹرز کے باﺅلنگ ایکشن کو رپورٹ کیا گیا۔ انٹرنیشنل کرکٹ کونسل (آئی سی سی) کی طرف سے جاری کردہ بیان کے مطابق میچ آفیشلز نے نیوزی لینڈ اور سری لنکا کے درمیان کھیلے گئے پہلے ٹیسٹ میچ میں ولیمسن اور اکیلا دانن جایا کے باﺅلنگ ایکشن کو مشکوک قرار دیتے ہوئے دونوں ٹیموں کی مینجمنٹ کو رپورٹ کر دی ہے۔ آئی سی سی کے قوانین کے مطابق ایکشنز رپورٹ ہونے کے بعد اب دونوں کھلاڑیوں کو 14 روز میں باﺅلنگ ایکشن ٹیسٹ دینا ہو گا تاہم ایکشن کی رپورٹ آنے تک وہ باﺅلنگ جاری رکھ سکیں گے۔ دانن جایا نے پہلی اننگز میں 5 وکٹیں لیکر سری لنکن ٹیم کی جیت میں اہم کردار ادا کیا تھا جبکہ ولیمسن نے صرف تین اوورز کرائے تھے۔

واضح رہے کہ اس سے قبل بھی ولیمسن اور دانن جایا کے باﺅلنگ ایکشنز کو غیرقانونی قرار دیا جا چکا ہے، ولیمسن کا 2014ء اور دانن جایا کا 2018ء میں ایکشن رپورٹ ہوا تھا۔

لاہور: پاکستان کرکٹ ٹیم کے سابق کپتان سلمان بٹ نے پی سی بی پر الزام لگاتے ہوئے کہا ہے کہ پی سی بی اپنی پسند کے فیصلے کرتا ہے.

تفصیلات کے مطابق سلمان بٹ نے اپنے حالیہ بیان میں کہا ہے کہ پی سی بی اپنی پسند کے فیصلے کرتا ہے.سلمان بٹ نے کہا کہ ماضی میں ڈومیسٹک کرکٹ کے پرفارمرز کو نظر انداز کرتے ہوئے من پسند فیصلے کئے جاتے رہے لیکن امید ہے کہ اب ایسا نہیں ہوگا کیونکہ ڈومیسٹک کرکٹ میں اچھی کارکردگی دکھانے والوں کو ترجیح دیں گے تب ہی نیا سسٹم کامیاب ہوسکتا ہے. انہوں نے ماضی کے بورڈ حکام پر امتیازی سلوک کا الزام عائد کرتے ہوئے کہا ہے کہ ایک کھلاڑی کیلئے الگ اور دوسروں کیلئے الگ رویہ رکھا گیا۔ اس کا جواب سابق چیئرمین پی سی بی شہریار خان اور نجم سیٹھی ہی دے سکتے ہیں کہ کیوں ایک کھلاڑی کیلئے الگ اور دوسروں کیلئے الگ رویہ رکھا گیا۔

محمد عامر کو خصوصی رعایت دینے کے سوال کا جواب دیتے ہوئے سلمان بٹ نے کہا کہ میری 5سال کی سزا مکمل ہوگئی تھی جس کے بعد ہرسال ڈومیسٹک کرکٹ میں تسلسل کے ساتھ عمدہ کارکردگی کا بھی مظاہرہ کیا لیکن پھر بھی میرے معاملے میں امتیازی سلوک کیوں کیا گیا.

کابل (اے پی پی) افغانستان نے بنگلہ دیش کے خلاف واحد ٹیسٹ میچ اور سہ ملکی ٹی ٹونٹی سیریز کیلئے سکواڈز کا اعلان کردیا.

تفصیلات کے مطابق افغانستان کرکٹ بورڈ کی سلیکشن کمیٹی نے بنگلہ دیش کے خلاف واحد ٹیسٹ میچ اور سہ ملکی ٹی ٹونٹی انٹرنیشنل کرکٹ سیریز کیلئے الگ الگ سکواڈز کا اعلان کردیا۔ رواں برس کے شروع میں آئرلینڈ کے خلاف واحد ٹیسٹ کھیلنے والے سکواڈ سے 5 کھلاڑیوں کو ڈراپ کیا گیا ہے جس میں معطلی کا شکار اوپننگ بیٹسمین محمد شہزاد بھی شامل ہیں، لیفٹ آرم فاسٹ باﺅلر شاہ پور زدران کو سکواڈ میں طلب کر لیا گیا ہے۔ ٹیسٹ میچ کیلئے اعلان کردہ افغانی سکواڈ کپتان راشد خان، اصغر افغان، حشمت اللہ شاہدی، احسان اللہ، اکرام علی خیل، جاوید احمدی، محمد نبی، رحمت شاہ، یامین احمدزئی، شاہ پور زدران، ابراہیم زدران، ظاہر خان، سید احمد شیرزاد، افسر زیزئی اور قیاس احمد پر مشتمل ہے۔ سہ ملکی ٹی ٹونٹی سیریز کیلئے اعلان کردہ سکواڈ میں کپتان راشد خان، اصغر افغان، محمد نبی، حضرت اللہ زیزئی، نجیب، مجیب الرحمان، شراف الدین اشرف، نجیب زدران، شاہداللہ کمال، گلبدین نائب، فرید احمد، شفیق اللہ شفیق، فضل نیازی، دولت زدران، نوین الحق اور رحمان اللہ گرباز شامل ہیں۔

واضح رہے کہ افغانی ٹیم بنگلہ دیش کے خلاف واحد ٹیسٹ میچ کھیلنے کے بعد سہ ملکی ٹی ٹونٹی سیریز کھیلے گی جس میں افغانستان کے علاوہ میزبان بنگلہ دیش اور زمبابوے کی ٹیمیں شرکت کریں گی۔

لیڈز (اے پی پی) آسٹریلوی بلےباز سٹیون سمتھ فٹنس مسائل کے باعث انگلینڈ کے خلاف تیسرے ایشز ٹیسٹ میچ سے باہر ہو گئے.

تفصیلات کے مطابق آسٹریلوی ٹیم کو انگلینڈ کے خلاف شیڈول تیسرے ایشز کرکٹ ٹیسٹ میچ سے قبل بڑا دھچکا لگا ہے اور سٹار بلے باز سٹیون سمتھ فٹنس مسائل کے باعث لیڈز ٹیسٹ میچ سے باہر ہو گئے۔ وہ دوسرے ٹیسٹ کی پہلی اننگز میں جوفرا آرچر کا باﺅنسر لگنے سے گردن کی انجری کا شکار ہوئے تھے جس کے باعث انہیں دوسری اننگز سے دستبرداری اختیار کرنا پڑی تھی. آسٹریلوی ٹیم کے کوچ جسٹن لینگر کے مطابق سمتھ تاحال سو فیصد فٹ نہیں ہو سکے اسلئے وہ تیسرے ٹیسٹ میچ میں ٹیم کو دستیاب نہیں ہوں گے، سمتھ کے تیسرے ٹیسٹ سے باہر ہونے کا مطلب ہے کہ مارنس لبو چگ نے جنہیں دوسری اننگز میں سمتھ کے متبادل کے طور پر سکواڈ میں شامل کیا گیا تھا پلیئنگ الیون کا حصہ ہوں گے۔

واضح رہے کہ آسٹریلیا اور انگلینڈ کی ٹیموں کے درمیان تیسرا ایشز ٹیسٹ میچ جمعرات سے شروع ہو گا اور آسٹریلوی ٹیم کو سیریز میں 1-0 کی برتری حاصل ہے۔

دبئی: پیٹ کمنز نے 914رینکنگ پوائنٹس حاصل کر کے میگراتھ کا 18 سال پرانا ریکارڈ برابر کردیا.

تفصیلات کے مطابق آسٹریلوی فاسٹ باﺅلر پیٹ کمنز نے انٹرنیشنل کرکٹ کونسل کی تازہ ترین ٹیسٹ پلیئرز رینکنگ میں باﺅلرز میں ٹاپ پوزیشن مزید مستحکم کرنے کے ساتھ ساتھ 914 رینکنگ پوائنٹس حاصل کر کے آسٹریلیا کی جانب سے بہترین پوائنٹس حاصل کرنے کا سابق ہم وطن باﺅلر گلین میگراتھ کا 18 سال پرانا ریکارڈ برابر کردیا، جنہوں نے 2001ءمیں یہ کارنامہ انجام دیا تھا۔ اسطرح کمنز بہترین رینکنگ پوائنٹس حاصل کرنے والے مشترکہ طور پر پانچویں باﺅلر بن گئے ہیں۔

دوسری جانب ٹیسٹ کرکٹ کی تاریخ میں باﺅلرز میں بہترین رینکنگ پوائنٹس حاصل کرنے کا عالمی اعزاز سابق انگلش باﺅلر سڈنی بارنز کو حاصل ہے جنہوں نے 1914ءمیں 932 رینکنگ پوائنٹس حاصل کر کے تاریخ رقم کی تھی۔

لارڈز (اے پی پی) آسٹریلیا اور انگلینڈ کی ٹیموں کے درمیان دوسرا ایشز ٹیسٹ میچ ڈرا ہوگیا.

تفصیلات کے مطابق آسٹریلیا اور انگلینڈ کی کرکٹ ٹیموں کے درمیان دوسرا ایشز ٹیسٹ میچ ہار جیت کے فیصلے کے بغیر ختم ہو گیا۔ آسٹریلوی ٹیم نے 267 رنز کے ہدف کے تعاقب میں اپنی دوسری اننگز میں 6 وکٹوں پر 154 رنز بنائے تھے، سٹوکس کی شاندار سنچری، میچ کے بہترین کھلاڑی قرار پائے. انگلش ٹیم نے 258 رنز 5 کھلاڑی آﺅٹ پر دوسری اننگز ڈیکلیئر کر کے کینگروز کو فتح کیلئے مجموعی طور پر 267 رنز کا ہدف دیا۔ بین سٹوکس نے ڈٹ کر کینگروز باﺅلرز کا مقابلہ کیا اور سنچری سکور کی۔ سٹوکس 115 رنز بنا کر ناٹ آﺅٹ رہے۔ جواب میں آسٹریلوی ٹیم نے آخری روز کھیل ختم ہونے تک اپنی دوسری اننگز میں 6 وکٹوں پر 154 رنز بنائے تھے۔ اس طرح دونوں ٹیموں کے درمیان میچ ڈرا ہو گیا۔ آرچر اور لیچ نے 3، 3 کھلاڑیوں کو آﺅٹ کیا۔ سٹوکس میچ کے بہترین کھلاڑی قرار پائے۔

دوسری جانب انگلینڈ اور آسٹریلیا کے درمیان تیسرا ایشز ٹیسٹ میچ 22 اگست سے شروع ہوگا جس میں آسٹریلوی بلےباز سٹیون سمتھ کی شرکت مشکوک ہوگئی ہے.