Tag: Ghani Mehmood Bhatti

قصور
تیز برسات سے موسم خوشگوار،ناقص نکاسی آب سے شہریوں کی زندگیاں عذاب

تفصیلات کے مطابق قصور میں شدید بارش سے نظامِ نکاسی ناکام۔ہو گیا جس سے شہریوں کو شدید مشکلات کا سامنا ہے
قصور میں گزشتہ شام 7 بجے سے رات گئے تک تیز بارش کا سلسلہ جاری رہا جس سے موسم تو خوشگوار ہو گیا مگر ناقص نکاسیٔ آب کے باعث شہر کی متعدد سڑکیں تالاب کا منظر پیش کرنے لگیں ہیں اور نشیبی علاقوں میں پانی جمع ہونے سے ٹریفک جام، بجلی کی فراہمی متاثر اور معمولاتِ زندگی درہم برہم ہوگئی
بارش کے بعد گلی محلوں میں پانی کھڑا ہونے سے شہریوں کو آمدورفت میں شدید دشواری کا سامنا کرنا پڑا جبکہ موٹر سائیکلیں اور گاڑیاں بند ہوتی رہیں
کئی علاقوں میں گھروں اور دکانوں میں پانی داخل ہو گیا شہریوں کا کہنا ہے کہ بلدیاتی اداروں کی عدم توجہی کے باعث ہر بارش عذاب بن جاتی ہے
شہری حلقوں نے اعلیٰ حکام سے صورتحال کا فوری نوٹس لینے، نکاسیٔ آب کے مؤثر انتظامات کرنے، نالوں کی صفائی یقینی بنانے اور ذمہ دار افسران کے خلاف کارروائی کا مطالبہ کیا ہے تاکہ آئندہ بارشوں میں عوام کو مشکلات سے بچایا جاسکے

قصور
پھولنگر کے معروف صحافی جمیل گجر قتل،صحافی برادری کا اظہار افسوس،انصاف کی اپیل

تفصیلات کے مطابق قصور کے شہر پھولنگر میں ایک دلخراش اور افسوسناک واقعہ پیش آیا جہاں نیشنل پریس کلب پھول نگر کے رکن اور سینئر صحافی جمیل گجر کو آئس کے نشے میں دھت ایک نوجوان نے چھرا مار کر مبینہ طور پر قتل کر دیا
ابتدائی اطلاعات کے مطابق واقعہ اس وقت پیش آیا جب ملزم نشے کی حالت میں تھا اور کسی تنازع کے دوران اس نے تیز دھار آلے سے جمیل گجر پر وار کیا جو جان لیوا ثابت ہوا
شدید زخمی حالت میں صحافی کو قریبی ہسپتال منتقل کیا گیا تاہم وہ زخموں کی تاب نہ لاتے ہوئے دم توڑ گئے
واقعے کی اطلاع ملتے ہی پولیس موقع پر پہنچ گئی اور شواہد اکٹھے کیے گئے اجبکہ لاش کو پوسٹ مارٹم کے لئے ہسپتال منتقل کر دیا گیا پولیس کے مطابق ملزم کی گرفتاری کے لئے کارروائی جاری ہے جبکہ واقعے کے تمام پہلوؤں سے تفتیش کی جا رہی ہے
جمیل گجر کے قتل پر ضلع بھر کے صحافتی حلقوں میں شدید غم و غصہ پایا جاتا ہے
ڈسٹرکٹ پریس کلب قصور و نیشنل پریس کلب پھولنگر سمیت مختلف صحافتی تنظیموں نے واقعہ کی شدید مذمت کرتے ہوئے مطالبہ کیا ہے کہ ملزم کو فوری گرفتار کر کے قانون کے کٹہرے میں لایا جائے اور صحافیوں کو تحفظ فراہم کیا جائے
مرحوم جمیل گجر ایک نڈر، اصول پسند اور متحرک صحافی کے طور پر جانے جاتے تھے ان کی ناگہانی موت سے صحافتی برادری ایک مخلص آواز سے محروم ہو گئی ہے

قصور
غفلت،لاپرواہی اور ون ویلنگ کرکے شہریوں کی جان و مال خطرے میں ڈالے والے موٹر سائیکل سواروں کے خلاف مقدمات درج
تفصیلات کے مطابق قصور شہر کے مختلف علاقوں میں خطرناک انداز سے موٹر سائیکلیں چلانے والے پانچ افراد کے خلاف پولیس نے کارروائی کرتے ہوئے مقدمات درج کر لیے ہیں
پولیس تھانہ صدر قصور کے سب انسپکٹر محمد ارشاد کے مطابق بائی پاس قصور پر نوران، ہمایوں طاہر، وسیم اسلم، احمد ولد یٰسین اور رجب نامی افراد نے غفلت، لاپرواہی اور تیز رفتاری کے باعث موٹر سائیکل چلا کر عوام الناس کی جان و مال کو خطرے میں ڈالا ہے
ان کے خلاف دفعات 279 ت پ کے تحت مقدمات درج کر دیے گئے ہیں اور پولیس اس سلسلے میں مذید کارروائی کر رہی ہے قصور پولیس کی جانب سے شہریوں کو ہدایت کی گئی ہے کہ سڑکوں پر محتاط رہیں اور قوانین کی پابندی کریں
ون ویلنگ اور خطرناک انداز سے موٹر سائیکل چلا کر لوگوں کی زندگیاں خطرے میں ڈالنے والے اب پولیس سے بچ نہیں سکیں گے
واضع رہے کہ میڈیا نے بہت عرصے سے اس بات کو ہائی لائیٹ کیا ہے کہ قصور بائی پاس پر سرعام ون ویلنگ سے لوگوں کی زندگیاں خطرے میں ہیں

قصور
فارمیسی میں چوری کی بڑی واردات،ایس ایچ او و ڈی پی او سے نوٹس لینے کی اپیل

تفصیلات کے مطابق قصور کے تھانہ بی ڈویژن کی حدود میں واقع میڈیسن پینل فارمیسی میں نامعلوم چوروں نے رات کی تاریکی میں چوری کی بڑی واردات کر ڈالی
چور فارمیسی سے تقریباً 3 لاکھ 74 ہزار روپئے مالیت کا قیمتی سامان، کیمرے اور نقدی سمیٹ کر فرار ہو گئے جس کے باعث متاثرہ دکاندار کو بھاری مالی نقصان اٹھانا پڑا جس کے باعث وہ سخت پریشان ہے
درخواست گزار محمد اشفاق کے مطابق چوری کی واردات رات کے وقت اس وقت پیش آئی جب فارمیسی بند تھی نامعلوم ملزمان نے موقع سے نہ صرف نقدی بلکہ دیگر قیمتی اشیاء بھی چرا لیں
واردات کی سی سی ٹی وی فوٹیج موجود ہے جس میں تمام واقعات واضح طور پر ریکارڈ ہیں
واقعے کی اطلاع ملنے پر پولیس تھانہ بی ڈویژن نے نامعلوم ملزمان کے خلاف مقدمہ درج کر کے تفتیش کا آغاز کر دیا ہے
متاثرہ شہری نے ڈی پی او قصور عیسیٰ سکھیرا اور ایس ایچ او تھانہ بی ڈویژن اسلم بھٹی سے فوری نوٹس لینے اور ملزمان کو جلد از جلد گرفتار کر کے قانون کے کٹہرے میں لانے کا مطالبہ کیا ہے

قصور میں جعلی سرکاری نوکریوں کے نام پر بڑے مالی فراڈ کا ایک اور اسکینڈل سامنے آ گیا ہے، جس میں تقریباً پچاس لاکھ روپے ہتھیانے کا انکشاف ہوا ہے۔ متاثرہ شہریوں نے اینٹی کرپشن قصور میں باقاعدہ درخواستیں جمع کروا دی ہیں، جن میں ایک منظم گینگ پر سنگین الزامات عائد کیے گئے ہیں۔
ذرائع کے مطابق اس کیس میں رانا حشنام صابر کو مرکزی ملزم نامزد کیا گیا ہے، جبکہ تحقیقات کے دوران میڈم صدف (اے ای او شالیمار) کا نام بھی مبینہ طور پر سامنے آیا ہے۔ اس کے علاوہ شاویز عرف ببی، سکنہ ٹھینگ موڑ، اور رانا فرمان بھی تفتیش کی زد میں ہیں۔
درخواست گزاروں کا مؤقف ہے کہ ملزمان سادہ لوح اور بے روزگار افراد کو مختلف سرکاری محکموں میں نوکری دلوانے کا جھانسہ دے کر بھاری رقوم وصول کرتے رہے۔ متاثرین کے مطابق نہ تو انہیں ملازمت فراہم کی گئی اور نہ ہی دی گئی رقم واپس کی گئی۔
اینٹی کرپشن حکام کا کہنا ہے کہ موصول ہونے والی درخواستوں پر ابتدائی جانچ پڑتال شروع کر دی گئی ہے، شواہد اکٹھے کیے جا رہے ہیں اور متاثرہ افراد کے بیانات قلمبند کیے جا رہے ہیں۔ حکام کے مطابق تحقیقات مکمل ہونے کے بعد مزید قانونی کارروائی عمل میں لائی جائے گی۔
متاثرہ شہریوں نے اعلیٰ حکام سے مطالبہ کیا ہے کہ جعلی نوکریوں کے اس نیٹ ورک میں ملوث تمام افراد کے خلاف بلا امتیاز سخت کارروائی کی جائے تاکہ عوام کو لوٹنے والے عناصر کو قانون کے کٹہرے میں لایا جا سکے

قصور
نواحی گاؤں کھارا میں جسم کے باہر دل والے بچے کی پیدائش، والدین بچے کی جان بچانے کیلئے گورنمنٹ سے فریاد کناں

تفصیلات کے مطابق قصور کے نواحی گاؤں موضع کھارا نزد قصور بائی پاس میں 5 جنوری 2026 کو مقامی مزدور محمد دین ولد صاحب الدین قوم میو کی زوجہ کے ہاں بیسک ہیلتھ یونٹ کھارا میں نارمل ڈیلیوری سے ایک بچے نے جنم لیا جس کا دل قدرتی طور پر جسم کے اندر ہونے کی بجائے جسم کے باہر ہے
بچے کے والدین نے فوری طور پر اسے چلڈرن ہسپتال لاہور ایڈمٹ کروایا تاکہ بچے کی جان کو بچایا جائے تاہم چلڈرن ہسپتال لاہور کے عملے نے 3 روز داخل رکھنے کے بعد بغیر کچھ بتلائے اور دوائی دیئے اتنا کہتے ہوئے چھٹی دے دی کہ اس کو گھر لیجائیں
اب بچے کی حالت یہ ہے کہ اسکے دل کی سائیڈوں پر پیپ پڑ رہی ہے اور اس کو چھوٹے پیشاب کیساتھ خون بھی آ رہا ہے جس کی وجہ سے بچے کے لواحقین و اہلیان علاقہ سخت پریشان ہیں
اہلیان علاقہ کی ضلعی انتظامیہ و صوبائی محکمہ صحت سے اپیل ہے کہ بچے کی جان بچانے کیلئے سرکاری طور پر وسائل بروئے کار لا کر اس کا علاج کیا جائے

قصور
موٹر سائیکل کے سائلنسر سے فائرنگ کرنے والے کب قابو ہونگے؟ عوام کا سوال

تفصیلات کے مطابق ضلع قصور میں قانون کا نفاذ یکطرفہ نظر آتا ہے
ٹریفک پولیس کی جانب سے بغیر ہیلمٹ موٹر سائیکل چلانے پر تو سرعام چالان ہو رہے ہیں مگر عوام کو ذلیل و خوار کرنے والے ون ٹو فائیو سواروں اور سائلنسر سے فائرنگ جیسی آوازیں نکالنے والی موٹر سائیکلوں کے خلاف مؤثر کارروائی دکھائی نہیں دیتی عوام کا کہنا ہے کہ شاید ہو گی بھی نہیں
شہر کی سڑکوں پر بغیر سائلنسر موٹر سائیکلیں تیز اور اذیت ناک آوازوں کے ساتھ دندناتی پھرتی ہیں جن سے نہ صرف شہریوں کا سکون برباد ہو رہا ہے بلکہ مساجد، تعلیمی اداروں اور حتیٰ کہ گھروں تک میں مردوں،عورتوں،بوڑھوں اور بچوں کو شدید تکلیف کا سامنا ہے
یہ شور نہ صرف قانون کی کھلی خلاف ورزی ہے بلکہ معاشرتی اقدار اور انسانی وقار کی بھی توہین ہے
اس سے پتہ نہیں چلتا کہ فائرنگ ہو رہی ہے کہ کوئی موٹر سائیکل کے سائلنسر سے ہوائی فائرنگ کا شوق پورا کرکے کمزور دل لوگوں کو مارنے کی کوشش کر رہا ہے
سوال یہ ہے کہ جب قوانین موجود ہیں تو ان پر عملدرآمد کب ہو گا؟
کیا ٹریفک قوانین صرف عام شہری کیلئے ہیں اور خوف و ہراس پھیلانے والوں کیلئے کوئی ضابطہ نہیں؟
قصور کے عوام مطالبہ کر رہی ہے کہ بغیر سائلنسر، خطرناک آوازیں نکالنے والی موٹر
سائیکلوں اور ون ٹو فائیو کلچر کے خلاف بلا امتیاز سخت کارروائی کی جائے تاکہ شہر میں امن، سکون اور قانون کی بالادستی بحال ہو سکے

قصور
تاریخی شہر قصور کا تاریخی ریلوے اسٹیشن گندگی کا ڈھیر بن گیا، مسافروں کو شدید مشکلات کا سامنا
تفصیلات کے مطابق تاریخی قصور کا تاریخی ریلوے اسٹیشن جو کبھی لیڈر انڈسٹری اور بھارت تک سفری رابطے کے باعث خاص پہچان رکھتا تھا آج بدانتظامی اور غفلت کی بدترین مثال بن چکا ہے
ناقص صفائی کے باعث اسٹیشن کے مختلف حصوں میں کوڑے کے ڈھیر لگے ہوئے ہیں جبکہ بدبو نے ماحول کو ناقابلِ برداشت بنا دیا ہے
گندگی کی اس صورتحال نے مسافروں خصوصاً خواتین، بچوں اور بزرگوں کے لیے سفر کو شدید اذیت ناک بنا دیا ہے انتظار گاہیں، پلیٹ فارمز اور داخلی راستے صفائی کے بنیادی معیار سے بھی محروم نظر آتے ہیں مگر ریلوے انتظامیہ کی جانب سے کوئی عملی اقدام دکھائی نہیں دیتا
واضح رہے کہ یہ وہی ریلوے اسٹیشن ہے جہاں سے ماضی میں دن بھر ریل و مال گاڑیوں کی آمدورفت رہتی تھی مگر آج صورتحال یہ ہے کہ پورے دن میں محض دو ٹرینیں گزرتی ہیں جبکہ باقی سروسز بند پڑی ہیں
نیز صفائی کا ناقص انتظام عوام کے زخموں پر نمک چھڑکنے کے مترادف ہے
شہریوں اور مسافروں نے اعلیٰ حکام سے مطالبہ کیا ہے کہ فوری نوٹس لیا جائے اور تاریخی ورثہ کے حامل اس ریلوے اسٹیشن کو مذید تباہی سے بچایا جائے ورنہ قصور کا یہ اہم عوامی مقام مکمل طور پر کھنڈر بن جائے گا