وزیراعظم شہباز شریف کا کہنا ہے کہ حکومت آئندہ ماہ اپنی مدت پوری ہونے سے قبل اقتدار عبوری سیٹ اپ کے حوالے کر دے گی جبکہ آئی ایم ایف کے ساتھ معاہدہ کی وجہ سے روپے کی قدر میں استحکام آیا ہے، پٹرولیم مصنوعات کی قیمتوں میں کمی کرکے عوام کو ریلیف دیا، معیشت مضبوط ہوگی تو قرض سے نجات ملے گی۔ خیال رہے کہ ان خیالات کا اظہار وزیراعظم نے سیالکوٹ میں گورنمنٹ کالج ویمن یونیورسٹی میں لیپ ٹاپ سکیم کی تقریب سے خطاب کرتے ہوئے کیا ہے۔ اس موقع پر وزیراعظم نے ہونہار طالبات میں لیپ ٹاپ بھی تقسیم کئے ہیں۔ تقریب سے وزیر دفاع خواجہ محمد آصف، چیئرمین ہائر ایجوکیشن کمیشن ڈاکٹر مختار احمد نے بھی خطاب کیاجبکہ تقریب میں اراکین قومی اسمبلی بھی موجود تھے۔
وزیراعظم کا مزید کہنا تھا کہ پاکستان کی ہونہار بچیوں سے مل کر خوشی ہوئی ہے، خواجہ آصف سے میری رقابت گورنمنٹ کالج کے دور طالب علمی سے ہے، وزیراعظم یوتھ پروگرام کے تحت طالبات کو لیپ ٹاپ کی فراہمی ان کی قابلیت کا اعتراف ہے، یہ کوئی احسان نہیں ہے، میرٹ کو آپ کو یہ لیپ ٹاپ دیئے گئے ہیں اس میں کوئی علاقہ یا سفارش مدنظر نہیں رکھی گئی ہے اسی پالیسی پر عمل پیرا ہو کر پاکستان کو عظیم قوم بنایا جائے گا، دنیا نے اسی پالیسی کے تحت عروج حاصل کیا جبکہ انہوں نے کہا کہ لیپ ٹاپ کی تقسیم کا منصوبہ 2011 ء میں شروع ہوا اور میرٹ پر پنجاب کے علاوہ دیگر صوبوں کے طالب علموں کو بھی لیپ ٹاپ دیئے گئے۔ بطور وزیراعلیٰ پنجاب دوسرے صوبوں کے لئے بھی سوچا کیونکہ اسی طرح پاکستان ترقی کرسکتا تھا۔ ایک لاکھ لیپ ٹاپ کی تقسیم کا منصوبہ 2022-23ء کا ہے، رواں مالی سال ایک لاکھ مزید لیپ ٹاپ دینے کا منصوبہ ہے، ہم نے خوراک، ادویات اور پیٹرولیم کی درآمد کی اجازت دی۔
شہباز شریف نے کہا کہ یہ ہماری ترجیحات تھیں، اس کے علاوہ اتنے چیلنجز تھے انڈسٹری سمیت دیگر ضروری خام مال کی درآمدات میں مشکلات تھیں تاہم یہ علم تھا کہ طالب علموں کو مطلوبہ سہولیات فراہم کرنی ہیں اس لئے 45 ملین ڈالر مہیا کرکے یہ لیپ ٹاپ درآمد کئے، ہم نے طالبعلموں کو تعلیم کے زیور سے آراستہ کرنا ہے تو انہیں وظائف سمیت تمام سہولیات فراہم کرنی ہوں گی۔ ہم نے پاکستان ایجوکیشن انڈومنٹ فنڈ قائم کیا ہے، خواتین کو بااختیار بنانے کیلئے اس سال کے بجٹ میں پانچ ارب روپے مختص کئے ہیں، کوئی قوم خواتین کے بھرپور حصہ کے بغیر ترقی کا سفر طے نہیں کرسکتی اس کیلئے خواتین کو ہرممکن سہولت فراہم کرنا ہوگی۔
مزید یہ بھی پڑھیں؛
شاہراہ قراقرم؛ سیاحوں کی گاڑی کو حادثہ 6 افراد جانبحق
بیوی کے ساتھ کیسے پیش آیا جائے بیٹے کو بتاتی رہتی ہوں غزل صدیق
سلمان خان نےفالج کے بعد میرے اسپتال کے بل ادا کیے، اورکسی جگہ اس کی تشہیر بھی نہیں کی،راہول رائے
وزیراعظم نے کہا کہ دنیا میں خواتین مردوں کے شانہ بشانہ ترقی اور خوشحالی کے سفر میں شامل ہیں۔ ہماری حکومت آئندہ ماہ اپنی مدت پوری کرے گی، آئندہ جو بھی حکومت آئے گی وہ تعلیم کے راستہ میں کوئی رکاوٹ نہ آنے دے اگر نواز شریف کی قیادت میں ہمیں موقع ملا تو قوم سے یہ وعدہ ہے کہ تعلیم کے میدان میں 2011ء میں جوانقلاب شروع کیا تھا اسے پایہ تکمیل تک پہنچائیں گے اور ہر طالب علم کو لیپ ٹاپ دیں گے۔ انہوں نے کہا کہ مسلمان معیاری تعلیمی ادارے نہ ہونے کی وجہ سے تعلیم کے میدان میں پیچھے رہ گئے، مسلمان اپنے علم کی بدولت میں ماضی میں دنیا پر حاوی تھے، تعلیم میں ترقی کا راز مضمر ہے۔
وزیراعظم نے کہا کہ آئی ایم ایف سے ہم نے معاہدہ کیا اس کے نتیجہ میں روپیہ مستحکم ہوا، اس وجہ سے پٹرولیم مصنوعات کی قیمتوں میں کمی کرکے عوام کو ریلیف دیا، معیشت مضبوط ہوگی تو قرضے نہیں لینے پڑیں گے، زراعت ، آئی ٹی، ٹیکسٹائل سمیت ہر شعبہ میں ترقی کیلئے بنیادی شرط محنت ہے۔ ہماری حکومت اگلے ماہ اپنی مدت پوری کرے گی۔ امید کرتے ہیں مدت پوری ہونے سے پہلے چلیں گے اور نئی عبوری حکومت اقتدار سنبھال لے گی۔
