سٹیج کے معروف اداکار ناصر چینیوٹی نے اپنے حالیہ انٹرویو میں کہا ہے کہ میں نے ہمیشہ سوچ سمجھ کر کسی بھی پراجیکٹ کا انتخاب کیا ہے۔ میری فلم موجاں ای موجاں میں میرا کردار پہلے جو میں نے تمام کردار کئے ہیں ان سے ہٹ کر ہے۔ مجھے بہت امید ہے کہ شائقین پسند کریں گے۔ ناصر چینیوٹی نے کہا کہ دونوں ملکوں کے فنکاروں کا ایک دوسرے کے ملک میں آنا خوشی کی بات ہے۔ گپی گریوال جو کہ جنے لاہور نئیں ویکھیا جمیا نئیں لاہور میں شوٹ کرنے کا ارادہ رکھتے ہیں اس حوالے سے سارا پیپر ورک میں یہاں کررہا ہوں۔
اس کے علاوہ اور بھی پراجیکٹس ہیں جن کے لئے بھارتی پنجابی فنکار پاکستان آئیں گے ، ایمی ورک نے بھی ایک سکرپٹ تیار کررکھا ہے اس میں نہ صرف ہو پاکستانی فنکاروں کو کاسٹ کریں گے بلکہ یہاں آکر شوٹنگ بھی کریں گے۔ باقی حکومتی معاملات پر آکر بات ٹھہرتی ہے، جب ہماری حکومتیں فنکاروں کو ویزہ جاری کریں گی تبہی زور و شور سے کام شروع ہوجائیگا۔ ناصر چینیوٹی نے کہا کہ جس طرح پاکستانی انڈین فنکاروں کوعزت دیتے ہیں اسی طرح سے بھارتی عوام بھی پاکستانی فنکاروں سے بہت محبت کرتی ہے۔