پاکستانی صحافی، دانشور اور کالم نویس ارشاد حقانی 06 ستمبر 1928ء کو قصور میں پیدا ہوئے۔ وہ اپنی نوجوانی میں جماعت اسلامی سے وابستہ رہے اور پچاس کی دہائی میں انھوں نے جماعت اسلامی کے جریدے ’تسنیم‘ کے لیے بھی کام کیا1956ء ماچھی گوٹھ میں ہونے والے اجتماع میں ارشاد احمد حقانی امین احسن اصلاحی کے ہمراہ جماعت اسلامی سے الگ ہوگئے تھے۔
انھوں نے اپنی پیشہ وارانہ زندگی کا آغاز گورنمنٹ کالج قصور میں بحیثیت لیکچرار کیا۔ 1981ء میں جب لاہور سے جنگ اخبار کی اشاعت شروع ہوئی تو وہ اس کے ساتھ منسلک ہوگئے۔ ارشاد احمد حقانی روزنامہ جنگ کے سینئر مدیر رہے اور ان کا کالم ”حرف تمنا“ کے عنوان سے شائع ہوتا رہا۔
1996ء میں جب صدر سردار فاروق احمد خان لغاری نے سابق وزیر اعظم بے نظیر بھٹو کی حکومت ختم کی تو ملک معراج خالد کی نگراں کابینہ میں وزیر اطلاعات بھی رہےموصوف طویل عرصے سے عارضۂ قلب میں مبتلاء تھے۔ ارشاد احمد حقانی کا انتقال 24 جنوری 2010ء کو ہوا۔ مرحوم کو قصور میں موجود ان کے آبائی قبرستان میں سپرد خاک کیا گیا۔
