Tag: Sindh police

کراچی میں موٹرسائیکل چور نے پکڑے جانے کے ڈر سے چار منزلہ عمارت سے چھلانگ لگا دی۔پولیس کے مطابق گزشتہ روز ایم اے جناح روڈ پر جوبلی مارکیٹ کے قریب ایک شخص موٹرسائیکل چوری کر رہا تھا کہ شہریوں نے اسے دیکھ لیا،ملزم ذوہیب لوگوں سے بچنے کے لیے 4 منزلہ عمارت پر چڑھ گیا۔

پولیس کا کہنا ہے کہ ملزم نے پکڑے جانے کے ڈر سے چار منزلہ عمارت کی بالکونی سے چھلانگ لگادی۔ملزم نیچے گرکر زخمی ہوگیا۔ نیچے موجود شہریوں نے موٹرسائیکل چور کو پکڑ کر پولیس کے حوالے کردیا۔

ملزم کو طبی امداد کے لیے سول اسپتال میں منتقل کیا گیا جس کے بعد نبی بخش تھانے منتقل کرکے مقدمہ درج کردیا گیا۔

ادھررات کوپاکستان رینجرز (سندھ) اورپولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے بی ون ایریا لیاقت آباد سے اسٹریٹ کرائم، غیر قانونی اسلحہ کی سپلائی اور منشیات فروشی میں ملوث ملزم قیوم بلوچ کو گرفتار کر لیا۔ملزم کے قبضے سے3 عدد نائن ایم ایم پسٹل، 3 عدد 30 بور پسٹل،188 عدد مختلف اقسام کے راؤنڈز، 10 عدد سپیئر میگزین، 125 گرام کرسٹل اور 120 گرام ہیروئن بھی برآمد کر لی گئی۔

تفصیلات کے مطابق ملزم 2017 سے منشیات حب چوکی اور رئیس گوٹھ سے منگوا کر کراچی کے مختلف علاقوں لیاری، چاکیواڑہ، جہان آباد، پرانا گولیمار، پاک کالونی، الیاس گوٹھ اور گارڈن میں سپلائی کرنے میں ملوث ہے۔ ابتدائی تفتیش کے دوران ملزم نے اعتراف کیا کہ وہ منشیات فروشی کے ساتھ ساتھ جرائم پیشہ افراد کو غیر قانونی اسلحہ فراہم کرنے میں بھی ملوث ہے۔ملزم منشیات اور اسلحہ کی سپلائی کے لیے عورتوں اور بچوں کا استعمال کرتا تھا۔

گرفتارملزم کوبمعہ اسلحہ و ایمونیشن، منشیات اور مسروقہ سامان مزید قانونی کاروائی کے لیے پولیس کے حوالے کر دیا گیا ہے۔ عوام سے اپیل ہے کہ ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔

کراچی: سول ایوی ایشن نے ڈائریکٹر جنرل خاقان مرتضیٰ اور اُن کی ٹیم پر لگنے والے کرپشن کے الزامات کو بے بنیاد قرار دیتے ہوئے کہا ہے کہ الزام لگانے والا ملازم زرین گل خود کرپشن کیس میں ضمانت پر رہا ہوا ہے۔

ادارے کی قیادت سے متعلق میڈیا میں زیرگردش کرپشن سے متعلق سول ایوی ایشن کے من گھڑت خط پر ترجمان نے ردعمل دیتے ہوئے کہا کہ کرپشن میں ملوث اور ضمانت پر رہائی پانے والے زرین گل کے ڈی جی سول ایویشن پر الزمات بے بنیاد ہیں جنہیں مسترد کرتے ہیں۔ اپنے آپ کو خودساختہ اور آفیسرز ایسوسی ایشن کا چیئرمین کہنے پر ادارہ زرین گل کیخلاف قانونی پہلوؤں پر غور کررہا ہے۔

ترجمان نے دعویٰ کیا کہ آفیسرز ایسوسیشن کے صدر کیخلاف بھی نیب میں اربوں روپے کی کرپشن کی تحقیقات کررہا ہے، بدنیتی پر مبنی اس قسم کے خط پہلے بھی پھیلائے جاتے رہے ہیں اور ان میں کوئی نئی بات نہیں، خط میں لکھے گیے الزامات حقائق کے منافی اور بے بنیاد ہیں۔ سی اے اے میں میرٹ پالیسوں کی وجہ سے قیادت کے خلاف مہم چلائی گئیں، مفاد پرست عناصر اس قسم کی حرکات سے غلط فہمیاں پھیلانے کی کوشش کرتے رہتے ہیں۔

سول ایوی ایشن کے ترجمان نے کہا کہ ’الزامات لگانے والے افسران کرپٹ اور بدعنوانی میں ملوث ہیں، بد نیتی پر مبنی اس مہم کے پیچھے کمرشل ڈائریکٹوریٹ کے کچھ افسران شامل ہوسکتے ہیں جنہیں بدعنوانی کے باعث کام کرنے سے روک دیا گیا تھا، زرین گل اور یونین کے صدر سمیت ان کرپٹ افسران کیخلاف مقدمات ایف آئی اے میں زیر التواء ہیں اور وفاقی تحقیقاتی ایجنسی افسران کے خلاف تحقیقات کررہی ہے‘۔

انہوں نے دعویٰ کیا کہ ’ڈی جی سول ایوی ایشن نے ایک انچ زمین کسی کو نہ دی اور نہ دینے کا اختیار ہے، ادارہ کرپٹ افسران کیخلاف کاروائیاں جاری رکھے گا، زرین گل اور دوسروں کیخلاف کرپشن پر اعلی قیادت نے کاروائی کی، سول ایوی ایشن کی اعلی قیادت کرپٹ افسران کو گھر تک چھوڑ کر انے کے لئے پر عزم ہے، اس قسم کی حرکات میرٹ بیسڈ پالیسیز اور کرپشن کے خلاف زیرو ٹالرینس کا ردعمل ہیں، ایسے بے بنیاد خطوط ادارے کی ساکھ کو جان بوجھ کر نقصان پہنچانے کی ناکام کوشش ہیں جو کسی کے مفاد میں نہیں ہیں‘۔